ᑲᑎᒪᓂᖅ ᓄᓇᖃᖅᖄᖅᑐᑦ ᐅᖃᐅᓯᖏᑦᑕ ᒥᒃᓵᓄᑦ: ᐱᕈᐃᑎᑦᑎᓂᖅ ᓴᙱᓂᕆᔭᐅᔪᓂᒃ ᐊᒻᒪᓗ ᐱᐊᓂᑦᑎᐊᖅᓯᒪᔪᓂᒃ ᑕᖅᑮᓐᓇᕐᔪᐊᖅ (ᔭᓄᐊᕆ) 25-29, 2021 ᐅᓂᑉᑳᖅ

Sur cette page

• ᓇᓗᓇᐃᖅᓯᓃᑦ
• ᓇᐃᓈᖅᓯᒪᔪᖅ
• ᓱᓇᑐᐃᓐᓇᓄᑦ ᑐᑭᓯᐅᒪᔾᔪᑏᑦ
• ᐅᑉᓗᖅ 1, ᑕᖅᑮᓐᓇᕐᔪᐊᖅ (ᔭᓄᐊᕆ) 25, 2021: ᑐᙵᓱᒃᑎᑦᑎᓂᖅ ᐊᒻᒪᓗ ᐃᓗᐊᓃᑦᑐᑦ
• ᐅᑉᓗᖅ 2, ᑕᖅᑮᓐᓇᕐᔪᐊᖅ (ᔭᓄᐊᕆ) 26, 2021: ᐱᐅᓛᑦ ᐊᑐᖅᑕᐅᖃᑦᑕᖅᑐᑦ
• ᐅᑉᓗᖅ 3, ᑕᖅᑮᓐᓇᕐᔪᐊᖅ (ᔭᓄᐊᕆ) 27, 2021: ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔪᖅ
• ᐅᑉᓗᖅ 4, ᑕᖅᑮᓐᓇᕐᔪᐊᖅ (ᔭᓄᐊᕆ) 28, 2021: ᑎᑎᕋᕐᕕᖓ ᑲᒥᓯᓇᐅᔫᑉ ᓄᓇᖃᖅᖄᖅᑐᓄᑦ ᐅᖃᐅᓯᓕᕆᔨᒃᑯᓐᓄᑦ
• ᓴᐃᓪᓘᓐᓃᑦ ᓄᓇᖅᖃᑎᒌᒃᑐᑦ ᖁᓕᓄᑦ ᐅᑭᐅᓂᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ, 2022-2032
• ᓇᓗᓇᐃᖅᑕᐅᓂᖓ

ᓇᓗᓇᐃᖅᓯᓃᑦ

ᑲᓇᑕᒥᑦ ᐱᖅᖁᓯᕆᔭᐅᔪᓕᕆᔨᒃᑯᑦ ᓇᓗᓇᐃᖅᓯᔪᒪᔪᑦ ᐱᓕᕆᐊᖏᓐᓂᒃ ᑲᑎᒪᔩᑦ ᐃᖅᕿᓖᑦ ᓄᓇᖅᖃᑎᒌᒃᑯᑦ, ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐊᒻᒪᓗ ᒦᑏ ᓄᓇᖅᖃᑎᒌᑦ ᑲᑎᒪᔨᖏᑦ ᐊᒻᒪᓗ ᐃᑲᔪᐃᓂᕆᔭᖏᓐᓂᑦ ᐱᐊᓂᑦᑎᐊᓚᐅᕐᓂᖓᑕ ᑕᖅᖀᓐᓇᕐᔪᐊᖅ (ᔭᓄᐊᕆ) 25-29, 2021-ᒥᑦ ᑲᑎᒪᓂᖅ ᓄᓇᖃᖅᖄᖅᑐᑦ ᐅᖃᐅᓯᖏᑦᑕ ᒥᒃᓵᓄᑦ: ᐱᕈᐃᑎᑦᑎᓂᖅ ᓴᙱᓂᕆᔭᐅᔪᓂᒃ ᐊᒻᒪᓗ ᐱᐊᓂᑦᑎᐊᖅᓯᒪᔪᓂᒃ.

ᖁᔭᓐᓇᒦᒃ ᐃᓚᐅᖃᑕᐅᔪᓗᒃᑖᑦ, ᖃᐅᔨᑎᑦᑎᓂᖃᓗᐊᕐᓗᓂ ᐃᓚᖏᓐᓂᒃ ᐱᓕᕆᐊᖃᓚᐅᖅᑐᓂᒃ ᐊᒻᒪᓗ ᐱᓕᕇᓐᓇᓚᐅᖅᑐᓂᒃ ᑕᓪᓕᒪᐃᑦ ᐅᑉᓗᕐᓂᑦ, ᐅᖃᓪᓚᒃᑎᐅᑉᓗᑎᒃ, ᑲᑎᒪᔪᓃᖃᑕᐅᑉᓗᑎᒃ ᐅᕝᕙᓘᓐᓃᑦ ᑲᒪᔨᐅᑉᓗᑎᒃ. ᖁᔭᓐᓇᒦᒃ Hunter Courchene Group-ᑯᑦ ᐱᐊᓂᑦᑎᐊᓚᐅᕐᓂᖏᓐᓄᑦ ᑲᒪᔭᖃᖅᖢᑎᒃ ᐊᖏᔪᒻᒪᕆᖕᒥᑦ ᐃᓂᓕᐅᕆᓂᕐᓂᒃ ᑲᑎᒪᓂᕐᒧᑦ ᐊᒃᑐᐊᔪᓂᒃ. ᑭᖑᓪᓕᖅᐹᖅ, ᖁᔭᓐᓇᒦᒃ ᑲᓇᑕᒥᑦ ᐱᖅᖁᓯᕆᔭᐅᔪᓕᕆᔨᒃᑯᑦ ᐱᓕᕆᔨᓗᒃᑖᖏᓐᓄᑦ ᐃᑲᔪᓚᐅᖅᑐᑦ ᐋᖅᕿᒃᓱᐃᑉᓗᑎᒃ ᑲᑎᒪᓂᐅᓂᐊᖅᑐᒥᑦ.

ᓇᐃᓈᖅᓯᒪᔪᖅ

ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑲᑎᒪᓂᖅ ᓄᓇᖃᖅᖄᖅᑐᑦ ᐅᖃᐅᓯᖏᑦᑕ ᒥᒃᓵᓄᑦ: ᐱᕈᐃᑎᑦᑎᓂᖅ ᓴᙱᓂᕆᔭᐅᔪᓂᒃ ᐊᒻᒪᓗ ᐱᐊᓂᑦᑎᐊᖅᓯᒪᔪᓂᒃ ᖃᕆᑕᐅᔭᒃᑰᓚᐅᖅᑐᑦ ᑕᖅᖀᓐᓇᕐᔪᐊᖅ (ᔭᓄᐊᕆ) 25-29, 2021-ᒥᑦ ᐊᒻᒪᓗ ᑕᑯᒃᓴᐅᑎᑕᐅᑉᓗᑎᒃ ᐱᖅᖁᓯᒃᑯᑦ ᐃᓂᒋᔭᐅᔪᒥᑦ ᐃᐅᓪᒑᓐᑯᐃᓐ ᐊᓂᓯᓈᐱᐊᒡ ᐃᓄᖕᓄᑦ.

ᑲᑎᒪᓂᖅ ᐋᖅᑭᒃᓱᖅᑕᐅᓚᐅᖅᑐᖅ ᑲᓇᑕᒥᑦ ᐱᖅᖁᓯᕆᔭᐅᔪᓕᕆᔨᒃᑯᓐᓄᑦ (PCH), ᐱᓕᕆᖃᑎᖃᖅᖢᑎᒃ ᑲᑎᒪᔩᑦ ᐃᖅᕿᓖᑦ ᓄᓇᖅᖃᑎᒌᒃᑯᓐᓂᑦ (AFN), ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂᑦ (ITK) ᐊᒻᒪᓗ ᒦᑏ ᓄᓇᖅᖃᑎᒌᑦ ᑲᑎᒪᔨᖏᓐᓂᑦ (MNC). ᐸᕐᓇᐅᑕᐅᖅᖃᐅᑕᐅᓚᐅᖅᑐᖅ ᑕᒡᕙᐅᖃᑎᒌᒡᓗᑎᒃ ᑲᑎᒪᓂᐊᕐᓗᑎᒃ ᐱᒋᐊᓵᕐᓂᖓᓂᑦ 2020, ᓄᕙᒡᔪᐊᕐᓇᖅ-19-ᒧᑦ ᑭᑐᑐᐃᓐᓇᓄᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᒪᓕᒃᑕᐅᔭᕆᐊᓖᑦ ᐱᔾᔪᑎᒋᑉᓗᒋᑦ ᐋᖅᕿᒋᐊᖅᓯᓂᖃᓚᐅᖅᑐᑦ ᐊᓯᐊᒎᖔᓕᕐᓗᑎᒃ ᐊᒻᒪᓗ ᓯᕗᒻᒧᒡᓗᑎᒃ ᖃᕆᑕᐅᔭᒃᑯᖔᖅ ᑲᑎᒪᓂᕐᒧᑦ.

ᑭᖑᓂᐊᒍᑦ ᐅᑭᐊᒃᓵᖅ 2020-ᒥᑦ ᐅᖃᖃᑎᖃᑦᑕᐅᑎᓂᖃᖅᖄᖅᑎᓪᓗᒋᑦ ᐊᑐᓕᖅᑎᑕᐅᓂᖓᓄᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᖅ, ᑕᖅᖀᓐᓇᕐᔪᐊᖅ (ᔭᓄᐊᕆ) 2021-ᒥᑦ ᑲᑎᒪᓂᖅ ᑐᓂᓯᓚᐅᖅᑐᖅ ᑲᑎᒪᔾᔪᑕᐅᓂᐊᖅᑐᓂᒃ ᐃᖅᕿᓖᑦ ᓄᓇᖅᖃᑎᒌᒃᑐᓄᑦ, ᐃᓄᖕᓄᑦ, ᒦᑏ ᓄᓇᖅᖃᑎᒌᒃᑐᓄᑦ, ᒐᕙᒪᑐᖃᒃᑯᓐᓄᑦ, ᓄᓇᐃᑦ ᐊᕕᒃᑐᖅᓯᒪᔪᓄᑦ ᐊᒻᒪᓗ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᓄᑦ ᑭᒡᒐᖅᑐᐃᓂᐊᖅᑐᓂᒃ, ᐃᓚᐅᑉᓗᑎᒃ ᐅᖃᐅᓯᕐᒥᒃ ᖃᐅᔨᒪᓂᖃᖅᑐᑦ, ᐊᔪᙱᓐᓂᖃᖅᑐᑦ, ᐊᒻᒪᓗ ᐃᓕᓐᓂᐊᖅᑎᑦᑎᔩᑦ ᑐᓂᓯᓂᐊᕐᓗᑎᒃ ᐱᐅᓛᑦ ᐊᑐᖅᑕᐅᖃᑦᑕᖅᑐᓂᒃ ᐊᒻᒪᓗ ᐊᑐᖅᑕᐅᓯᒪᔪᓂᒃ. ᑐᓂᓯᓚᐅᕐᒥᔪᑦ ᐃᓚᐅᖃᑕᐅᔪᓂᒃ ᑕᑯᑎᑦᑎᓂᐊᕐᓗᑎᒃ ᖃᓄᐃᖓᓂᐅᔪᓂᒃ ᐅᖃᖃᑎᖃᕐᓂᐅᓚᐅᖅᑐᓂᑦ ᐊᑐᓕᖅᑎᑕᐅᓂᖓᓄᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᐅᑉ ᒥᒃᓵᓄᑦ ᐊᒻᒪᓗ ᐊᑕᐅᑦᑎᒃᑯᑦ ᐅᖃᓪᓗᕆᒃᓴᐅᑎᓂᖃᕐᓂᖅᓴᐅᓂᐊᕐᓗᑎᒃ ᐃᓚᖏᓐᓂᒃ ᐃᓚᒋᔭᐅᔪᓂᒃ.

ᐊᑐᓂ ᑕᓪᓕᒪᐃᑦ ᐅᑉᓗᕐᓂᑦ ᐃᓚᐅᖃᑦᑕᓚᐅᖅᑐᑦ ᐱᖅᖁᓯᕆᔭᐅᔪᒃᑯᑦ ᐅᒃᑯᐃᖅᓯᓃᑦ, ᐱᔾᔪᑕᐅᔪᓂᒃ ᐱᓕᕆᐊᖃᕐᓃᑦ, ᑲᑎᒪᖃᑕᐅᔪᓗᒃᑖᓄᑦ ᐊᒻᒪᓗ ᐊᕕᒃᑐᖅᖢᑎᒃ ᑲᑎᒪᓂᖏᓐᓂᑦ. ᓯᕗᓪᓕᖅᐹᖅ ᐅᑉᓗᖅ ᓇᐃᓐᓂᖅᓴᓚᐅᖅᑐᖅ ᐊᒻᒪᓗ ᑐᙵᓱᒃᑎᑦᑎᑉᓗᑎᒃ ᐊᒻᒪᓗ ᐃᓗᐊᓃᓐᓂᐊᖅᑐᓂᒃ. ᐊᒥᐊᒃᑯᐃᑦ ᓯᑕᒪᐃᑦ ᐅᑉᓗᐃᑦ ᐊᑐᓂ ᑕᐅᑐᒐᖃᓚᐅᖅᑐᑦ ᐱᔾᔪᑕᐅᓗᐊᖅᑐᒧᑦ: ᐱᐅᓛᑦ ᐊᑐᖅᑕᐅᖃᑦᑕᖅᑐᑦ, ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔪᖅ, ᑎᑎᕋᕐᕕᖓ ᑲᒥᓯᓇᐅᔫᑉ ᓄᓇᖃᖅᖄᖅᑐᓄᑦ ᐅᖃᐅᓯᓕᕆᔨᒃᑯᓐᓄᑦ (OCIL) ᐊᒻᒪᓗ ᑭᖑᓪᓕᖅᐹᖅ, 2022-2032 ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᑦ ᖁᓕᓄᑦ ᐅᑭᐅᓂᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ.

ᑲᑎᒪᓂᖅ ᑲᑎᑎᑦᑎᓚᐅᖅᑐᖅ ᐱᔾᔪᑕᐅᔪᓄᑦ ᐅᖃᓪᓚᒃᑎᐅᔪᓂᒃ ᐊᒻᒪᓗ ᑲᑎᒪᔨᓂᒃ ᐃᓚᐅᑉᓗᑎᒃ ᐊᔪᙱᓐᓂᖃᖅᑐᑦ ᐊᒻᒪᓗ ᐱᓕᕆᐊᓖᑦ ᓄᓇᖃᖅᖄᖅᑐᑦ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ, ᑕᒪᐃᓐᓂᑦ ᑲᓇᑕᒥᑦ ᐊᒻᒪᓗ ᐊᓯᖏᓐᓂᑦ ᓄᓇᓕᖕᓂᑦ. ᑲᑎᒪᓂᖅ ᐱᒻᒪᕆᐅᔪᒥᒃ ᐱᔾᔪᑎᖃᓚᐅᖅᑐᖅ ᑐᓂᓯᖃᑦᑕᐅᑐᓂᕐᒥᒃ ᖃᐅᔨᒪᓂᕆᔭᐅᔪᓂᒃ ᐃᑲᔪᕐᓂᐊᕐᓗᓂ ᓯᕗᒻᒧᒃᑎᓪᓗᒍ ᐊᑐᓕᖅᑎᑕᐅᓂᖓ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᖅ.

ᑕᒪᐃᓐᓅᖓᔪᒃᑯᑦ, ᑲᑎᒪᓂᖅ ᑕᑯᒃᓴᐅᑎᑦᑎᓚᐅᖅᑐᖅ ᑲᑎᑎᑦᑎᓂᕐᒥᒃ ᐃᓄᐃᑦ ᑐᓂᐅᑎᖃᑦᑕᐅᑎᓂᐊᕐᓗᑎᒃ ᐊᑐᖅᓯᒪᔭᖏᓐᓂᒃ ᐊᒻᒪᓗ ᑕᐅᑐᒐᕆᔭᖏᓐᓂᒃ, ᐊᑕᐅᑦᑎᒃᑯᑦ ᓴᙱᒃᑎᑎᕐᓗᒍ ᐅᕝᕙᓘᓐᓃᑦ ᓴᖅᕿᑦᑎᓂᐊᕐᓗᑎᒃ ᐱᓕᕆᖃᑎᒌᖕᓂᐅᔪᒥᒃ ᐊᔪᙱᓐᓂᖃᖅᑐᑦ ᐊᒻᒪᓗ ᐊᑐᐊᒐᓕᐅᖅᑎᓂᒃ ᐱᔾᔪᑎᖃᖅᑐᒥᒃ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ.

ᐅᓂᑉᑳᖅ ᓇᐃᓈᖅᑎᕆᔪᖅ ᑐᓵᔭᐅᓚᐅᖅᑐᓂᑦ ᑲᑎᒪᓂᕐᒥᑦ. ᑐᕌᒐᖃᖅᑐᖅ ᓇᓚᐅᑦᑎᔪᓂᒃ ᑕᑯᒃᓴᐅᑎᓐᓂᐊᕐᓗᒋ ᖃᓄᐃᖓᓂᖓᑕ ᐊᒻᒪᓗ ᐃᓚᖏᑦ ᐃᓚᒋᔭᐅᔪᑦ ᑕᑯᑎᑕᐅᓚᐅᖅᑐᑦ ᐊᒻᒪᓗ ᐅᖃᓪᓗᕆᒃᓴᐅᑕᐅᓚᐅᖅᑐᑦ ᐊᔾᔨᒌᙱᑦᑐᑦ ᑲᑎᒪᓂᖃᖅᑎᓪᓗᒋᑦ ᐊᒻᒪᓗ ᐊᕕᒃᑐᖅᑕᐅᖃᑦᑕᖅᑎᓪᓗᒋᑦ. ᐃᓱᒪᒋᔭᐅᔭᕆᐊᖃᙱᑦᑐᖅ ᐊᖏᔫᓂᖓᓄᑦ ᐅᕝᕙᓘᓐᓃᑦ ᐃᓚᐅᖃᑕᐅᓗᒃᑖᕐᓂᖏᓐᓄᑦ ᑲᑎᒪᓂᕐᒥᑦ ᐅᖃᐅᓯᐅᓚᐅᖅᑐᑦ ᑕᓪᓕᒪᓂᑦ ᐅᑉᓗᕐᓂᑦ ᑐᓂᐅᑎᖃᑦᑕᖅᑎᓂᖃᖅᑎᓪᓗᒋᑦ.

ᓱᓇᑐᐃᓐᓇᓄᑦ ᑐᑭᓯᐅᒪᔾᔪᑏᑦ

ᐃᓚᐅᖃᑕᐅᔪᑦ ᐊᔾᔨᐅᖏᑦᑐᒃᑰᖓᔪᒃᑯᑦ ᐊᕕᒃᖢᑎᒃ ᑲᑎᒪᓂᖃᓚᐅᖅᑐᑦ ᑕᖅᖀᓐᓇᕐᔪᐊᖅ (ᔭᓄᐊᕆ) 27, 2021-ᒥᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔫᑉ ᒥᒃᓵᓄᑦ ᑐᓂᓯᓚᐅᖅᑐᖅ ᑭᒡᒐᖅᑐᐃᔪᓂᒃ ᑲᑎᒪᖃᑕᐅᔪᑦ ᓇᑭᙶᖅᓯᒪᓂᖏᓐᓂᑦ:

• 72 ᑲᑎᒪᖃᑕᐅᓚᐅᖅᑐᑦ ᐱᖓᓱᓂᑦ (3) ᐃᖅᕿᓖᑦ ᐃᓅᖃᑎᒌᑦ ᐊᕕᒃᖢᑎᒃ;
• 29 ᑲᑎᒪᖃᑕᐅᓚᐅᖅᑐᑦ ᐃᓄᐃᑦ ᐊᕕᒃᖢᑎᒃ; ᐊᒻᒪᓗ,
• 33 ᑲᑎᒪᖃᑕᐅᓚᐅᖅᑐᑦ ᒦᑏ ᐃᓅᖃᑎᒌᓂᑦ ᐊᕕᒃᖢᑎᒃ.

ᐊᓯᖏᑦ ᐊᕕᒃᑐᖅᖢᑎᒃ ᑲᑎᒪᓂᐅᓚᐅᖅᑐᑦ ᐅᑉᓗᖅ 2-ᒥᑦ (ᐱᐅᓛᑦ ᐊᑐᖅᑕᐅᖃᑦᑕᖅᑐᑦ) ᐊᒻᒪᓗ ᐅᑉᓗᖅ 4-ᒥᑦ (ᑎᑎᕋᕐᕕᖓ ᑲᒥᓯᓇᐅᔫᑉ ᓄᓇᖃᖅᖄᖅᑐᓄᑦ ᐅᖃᐅᓯᓕᕆᔨᒃᑯᓐᓄᑦ). ᐃᓚᐅᖃᑕᐅᔪᑦ ᑲᑎᒪᖃᑕᐅᔪᓂᑦ ᐊᕕᒃᑐᖅᖢᑎᒃ ᐊᑖᓂᑦ ᑐᓂᓯᔪᖅ ᓇᓗᓇᐃᖅᓯᓂᕐᒥᒃ ᐱᔪᒪᓂᖃᕐᓂᖏᓐᓂᒃ ᐊᔾᔨᒌᙱᑦᑐᑦ ᐱᔾᔪᑕᐅᔪᓄᑦ ᐅᖃᐅᓯᐅᓚᐅᖅᑐᓂᑦ ᑲᑎᒪᓂᕐᓂᑦ:

ᑲᑎᒪᓂᖅ ᐱᒋᐊᓚᐅᖅᑐᖅ ᒪᓐᑎᒥᑦ ᑕᖅᖀᓐᓇᕐᔪᐊᖅ (ᔭᓄᐊᕆ) 25, 2021 ᑐᙵᓱᒃᑎᑦᑎᑉᓗᑎᒃ ᐊᒻᒪᓗ ᓄᓇᓕᖕᒥᑦ ᖃᐅᔨᑎᑦᑎᑉᓗᑎᒃ ᐃᓐᓇᕆᔭᐅᔪᒥᑦ ᕉᔅ ᐅᐊᐅᐊᑎ (Rose Wawatie), ᑭᑎᒐᓐ ᔨᐱ ᐊᓂᓯᓂᐊᐱᐊᒡ-ᒥᑦ (Kitigan Zibi Anishinabeg). ᐊᑐᓂ ᐅᑉᓗᕐᓂᑦ ᑲᑎᒪᓃᑦ ᐱᒋᐊᖃᑦᑕᓚᐅᖅᑐᑦ ᐱᑦᑕᐅᔪᒥᑦ, ᐅᒃᑯᐃᖅᑕᐅᖃᑦᑕᖅᖢᓂ ᑐᒃᓯᐊᕐᓂᒃᑯᑦ ᐃᖅᕿᓖᑦ ᓄᓇᖅᖃᑎᒌᒃᑐᓄᑦ, ᐃᓄᖕᓄᑦ ᐊᒻᒪᓗ ᒦᑎ ᓄᓇᖃᖅᖃᑎᒌᒃᑐᓄᑦ ᐃᓐᓇᕆᔭᐅᔪᓄᑦ ᐊᒻᒪᓗ ᖃᐅᔨᒪᓂᖃᖅᑐᓄᑦ, ᐅᑯᐊᖑᑉᓗᑎᒃ ᒪᐃᒃ ᒥᑦᓱᓪ (Mike Mitchell), AFN-ᒥᑦ ᐃᓐᓇᕆᔭᐅᔪᖅ-ᖃᐅᔨᒪᓂᖃᖅᑐᖅ ᐊᒻᒪᓗ ᕈᐊᐴᑕ ᐅᔅᑲᐱᐅᐊᓯᓐᔅ-ᒧᑦ (Roberta Oshkabewisens); ᑕᐃᕕᑎ ᓯᖁᐊᖅ, ᐃᓄᒃ ᐃᓐᓇᕆᔭᐅᔪᒧᑦ; ᕘᓇ ᑎᒫᓐᑎᒡᓂ (Verna DeMontigny), ᐊᓇᑦ ᒨᕆᔅ (Annette Maurice), ᕼᐃᕆᐊᑦ ᓴᐃᓐᑦ ᐱᐅᕐ (Harriet St.Pierre) ᐊᒻᒪᓗ ᔨᒥ ᑐᕌᑦᓱᕐ-ᒧᑦ (Jimmy Durocher), ᒦᑏ ᓄᓇᖅᖃᑎᒌᓄᑦ ᐃᓐᓇᕆᔭᐅᔪᑦ. ᑲᑎᒪᓂᖅ ᐅᒃᑯᐊᓚᐅᖅᑐᖅ ᑕᓪᓕᒫᓂᑦ ᑕᖅᖀᓐᓇᕐᔪᐊᖅ (ᔭᓄᐊᕆ) 29, 2021 ᑐᒃᓯᐊᕐᓂᒃᑯᑦ ᐃᓐᓇᕆᔭᐅᔪᓂᑦ ᐊᒻᒪᓗ ᖃᐅᔨᒪᓂᖃᖅᑐᓄᑦ, ᐃᓚᐅᑉᓗᓂ ᐃᓐᓇᕆᔭᐅᔪᖅ ᕉᔅ ᐅᐊᐅᐊᑎ (Rose Wawatie).

ᓂᐱᓕᐅᕆᔩᑦ ᒥᓯᐅᓪ ᐳᑦᔅᕼᐆᓪᔅ (Michelle Buchholz) ᐊᒻᒪᓗ ᓂᒋᑦᓯᓪ ᓄᐊᐱᐊᑦ (Nigit’stil Norbert) Drawing Change -ᓂᑦ ᓈᓚᑦᑎᐊᓚᐅᖅᑐᑦ, ᐱᐅᓯᒋᐊᖅᖢᒍ ᐊᒻᒪᓗ ᑎᑎᕋᐅᔭᖅᖢᑎᒃ ᑕᑯᒃᓴᐅᑎᓐᓂᐊᕐᓗᒍ ᑲᑎᒪᓂᖅ ᓄᓇᖃᖅᖄᖅᑐᑦ ᐅᖃᐅᓯᖏᑦᑕ ᒥᒃᓵᓄᑦ. ᐅᖃᖅᑐᖃᖅᓯᒪᔪᖅ “ᓂᐱᓕᐅᕆᓂᖅ ᐃᑲᔪᖃᑦᑕᖅᑐᖅ ᐃᓚᐅᖃᑕᐅᔪᑦ ᑕᑯᔪᖕᓇᕐᓂᕐᒥᒃ ᖃᓄᐃᓕᐅᖅᐸᓪᓕᐊᔪᓂᒃ, ᐃᓚᐅᓕᖃᑕᐅᓗᑎᒃ ᐃᓱᒪᒃᓴᖅᓯᐅᕆᓂᕐᒧᑦ, ᐊᒻᒪᓗ ᐃᓚᓕᐅᑎᓗᑎᒃ ᐊᑕᐅᑦᑎᒃᑯᑦ ᓯᓚᑐᓂᖓᓐᓄᑦ ᑲᑎᕐᒪᔪᑦ”. ᓂᐱᓕᐅᕆᓂᖓᑦ ᑕᑯᒃᓴᐅᑎᑕᐅᓂᐊᖅᑐᑦ ᐅᓂᑉᑳᕐᒥᑦ ᐊᑐᓂ ᐅᑉᓗᕐᓂᑦ ᑲᑎᒪᓂᐅᑉ, ᑕᑯᒃᓴᐅᑎᑕᐅᓂᐊᕐᓗᑎᒃ ᐱᔭᐅᓗᐊᓚᐅᖅᑐᑦ ᑎᑎᕋᖅᓯᒪᓗᑎᒃ.

ᐅᑉᓗᖅ 1, ᑕᖅᑮᓐᓇᕐᔪᐊᖅ (ᔭᓄᐊᕆ) 25, 2021: ᑐᙵᓱᒃᑎᑦᑎᓂᖅ ᐊᒻᒪᓗ ᐃᓗᐊᓃᑦᑐᑦ

ᐅᑉᓗᕐᒥᑦ ᐅᒃᑯᐃᖅᑕᐅᓚᐅᖅᑐᖅ ᑲᑎᒪᓂᖅ ᐱᖅᖁᓯᕆᔭᐅᔪᒃᑯᑦ, ᑭᖑᓂᐊᒍᑦ ᐅᒃᑯᐃᖅᓯᓂᕐᒧᑦ ᐅᖃᓪᓚᒃᑐᖃᖅᖢᑎᒃ ᐅᐱᓐᓇᖅᑐᖅ ᓯᑏᕕᓐᓂ ᒋᐅᓪᐴᓪᑦ (Steven Guilbeault), ᒥᓂᔅᑕ ᑲᓇᑕᒥᑦ ᐱᖅᖁᓯᕆᔭᐅᔪᓕᕆᔨᒃᑯᓐᓄᑦ; ᓄᓇᖅᖃᑎᒌᓄᑦ ᐊᖓᔪᖅᑳᖅ ᐱᐅᕆ ᐱᓕᒑᑦ (Perry Bellegarde), ᑲᑎᒪᔩᑦ ᐃᖅᕿᓖᑦ ᓄᓇᖅᖃᑎᒌᒃᑯᓐᓂᑦ; ᐊᖓᔪᖅᖄᖅ ᓇᑖᓐ ᐅᐱᐊᑦ (Natan Obed) ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂᑦ; ᐊᒻᒪᓗ ᐊᖓᔪᖅᖄᖅ ᑭᓚᒥᐊᓐᑦ ᑦᓵᑎᐅᕐ (Clément Chartier), ᒦᑏ ᓄᓇᖅᖃᑎᒌᑦ ᑲᑎᒪᔨᖏᓐᓂᑦ. ᒥᓂᔅᑕ ᐊᒻᒪᓗ ᐱᖓᓱᐃᑦ ᓄᓇᖅᖃᑎᒌᓄᑦ ᓯᕗᓕᐅᖅᑎᐅᔪᑦ ᐅᖃᐅᓯᖃᓚᐅᖅᑐᑦ ᑕᐅᑐᒐᕆᔭᖏᓐᓂᒃ ᐊᒻᒪᓗ ᐱᔪᒪᓂᕆᔭᖏᓐᓂᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ, ᐱᓗᐊᖅᑐᒥᑦ ᐱᓕᕆᐊᖑᓇᓱᒃᑐᓂᒃ, ᐱᓕᕆᖃᑎᒌᖕᓂᐅᔪᓂᒃ ᐊᒻᒪᓗ ᐱᔭᐅᔭᕆᐊᖃᖅᑐᓂᒃ ᑕᒪᓗᒃᑖᕐᒥᒃ ᐱᕙᓪᓕᐊᓂᖃᕐᓂᐊᕐᓗᑎᒃ ᓲᕐᓗ ᐱᒻᒪᕆᐅᔪᓂᒃ ᐃᓚᒋᔭᐅᔪᓂᒃ, ᐊᒃᑐᐊᓂᖃᖅᑐᓂᒃ ᐃᖕᒥᓂᒃ-ᐱᒋᐊᕈᒪᓂᕐᒧᑦ, ᐱᖅᖁᓯᕐᒧᑦ, ᐱᒻᒪᕆᐅᒋᔭᐅᔪᓄᑦ ᐊᒻᒪᓗ ᑭᓇᐅᓂᖏᓐᓄᑦ. ᐅᖃᐅᓯᕆᓚᐅᖅᑕᖏᑦ ᓄᓇᖃᖅᖄᖅᑐᑦ ᐃᓄᐃᑦ ᓯᕗᓕᐅᖅᑎᐅᓗᑎᒃ ᐊᒻᒪᓗ ᐃᓂᐅᔪᒦᓛᖑᖕᒪᑕ ᓯᕗᓕᐅᖅᑎᐅᓂᐊᕐᓗᑎᒃ ᐱᓕᕆᐊᒃᓴᓄᑦ ᐊᒻᒪᓗ ᐱᓕᕆᐊᖑᓇᓱᒃᑐᓄᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᐅᑎᖅᑎᑦᑎᓂᕐᒧᑦ, ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ, ᐱᓕᕆᐊᖑᓂᖓᓄᑦ ᐊᒻᒪᓗ ᓴᙱᒃᑎᑎᕆᓂᕐᒧᑦ.

ᐅᒃᑯᐊᕐᓂᐊᕐᓗᒍ ᐅᑉᓗᖅ, ᐹᓪ ᐱᓚᑎᐄ (Paul Pelletier), ᐊᖓᔪᖅᖄᖅ ᓄᓇᖃᖅᖄᖅᑐᑦ ᐅᖃᐅᓯᓕᕆᔨᒃᑯᖏᓐᓂᑦ ᑲᓇᑕᒥᑦ ᐱᖅᖁᓯᓕᕆᔨᒃᑯᓐᓂᑦ ᑐᓂᓯᓚᐅᖅᑐᖅ ᐃᓗᐊᓃᑦᑐᓂᒃ ᐊᒻᒪᓗ ᐱᔾᔪᑕᐅᔪᓂᒃ ᐃᓚᐅᖃᑕᐅᔪᓗᒃᑖᓄᑦ ᒫᓐᓇᐅᔪᖅ ᖃᓄᐃᖓᓂᕆᔭᖓᓂᒃ ᐊᑐᓕᖅᑎᑕᐅᓂᖓᑕ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᖅ.

ᐅᑉᓗᖅ 1 ᐱᔭᐅᓗᐊᓚᐅᖅᑐᑦ

• ᓄᓇᖃᖅᖄᖅᑐᑦ ᐅᖃᐅᓯᖏᑦ ᐱᖅᖁᓯᐅᔪᖅ, ᐱᒻᒪᕆᐅᒋᔭᐅᔪᑦ, ᐃᓕᑕᖅᓯᔾᔪᑕᐅᔪᖅ, ᖃᓄᐃᖏᑦᑎᐊᖅᑎᑦᑎᔪᖅ;
• ᐅᖃᐅᓯᖅ ᐊᒃᑐᐊᓂᖃᖅᑐᖅ ᑐᒃᓯᐊᕐᓂᕐᒧᑦ ᐊᑐᖃᑦᑕᖅᑕᖏᓐᓄᑦ ᓲᕐᓗ ᑐᒃᓯᐊᕐᓂᖅ, ᓄᓇᒧᑦ, ᐃᒪᕐᒧᑦ;
• “ᐊᑕᐅᓯᖅ ᑕᒪᓗᒃᑖᕐᒧᑦ ᓈᒻᒪᒃᑐᖅ”-ᒥᒃ ᐊᑐᙱᑦᑐᑦ ᐃᓕᑕᖅᓯᓂᐊᕐᓗᑎᒃ ᐊᔾᔨᒌᙱᑦᑑᑎᐅᓂᖏᑦ ᐃᓂᐅᔪᑦ, ᐆᒪᓂᖃᑦᑎᐊᕐᓂᖏᓐᓂᒃ, ᐃᓂᖃᕐᓂᕐᒥᒃ ᐊᒻᒪᓗ ᐃᓗᐊᓃᑦᑐᖏᓐᓂᑦ;
• ᐊᑕᐅᑦᑎᒃᑯᑦ ᐱᓕᕆᖃᑎᒌᖕᓂᕐᒥᒃ ᐱᔭᕆᐊᖃᖅᑐᑦ, ᐊᓯᐊᔨᑦᑕᐃᓕᓗᒋᑦ ᐅᖃᐅᓰᑦ ᐱᔭᒃᓴᐅᑎᒋᔭᐅᔪᖅ ᑕᒪᓗᒃᑖᕐᒧᑦ ᓯᕗᓂᒃᓴᒥᑦ ᑭᖑᕚᖑᓂᐊᖅᑐᓄᑦ;
• ᖃᐅᔨᒪᓂᖃᕐᓂᖅ ᐱᔭᐅᔭᕆᐊᓕᒃ ᐆᒻᒪᖅᑎᒃᑲᓐᓂᕐᓂᐊᕐᓗᒍ ᐊᒻᒪᓗ ᐱᓯᒪᓂᐊᕐᓗᒍ ᓄᓇᖃᖅᖄᖅᑐᑦ ᐅᖃᐅᓯᖏᑦ ᓄᓇᓕᖕᓃᑎᓪᓗᒋᑦ;
• ᐋᖅᕿᒃᓯᔭᕆᐊᖃᖅᑐᑦ ᐱᔭᕆᐊᖃᒻᒪᕆᒃᑐᒥᒃ ᖃᓄᐃᓕᐅᕈᑕᐅᓂᐊᖅᑐᓂᒃ, ᐅᕗᙵᕐᓂᐊᕐᓗᓂ “ᐱᖁᔭᕐᒥᑦ ᖃᓄᐃᓕᐅᕆᐊᕐᓂᕐᓄᑦ”.

ᐅᑉᓗᖅ 2, ᑕᖅᑮᓐᓇᕐᔪᐊᖅ (ᔭᓄᐊᕆ) 26, 2021: ᐱᐅᓛᑦ ᐊᑐᖅᑕᐅᖃᑦᑕᖅᑐᑦ

ᑐᒡᓕᐊ ᐅᑉᓗᕐᒥᑦ ᑲᑎᒪᓂᐅᑉ ᐱᕕᖃᓚᐅᖅᑐᑦ ᐊᑕᐅᑦᑎᒃᑯᑦ ᑐᓂᐅᑎᓗᑎᒃ ᐊᒻᒪᓗ ᐅᖃᓪᓗᕆᒃᓴᐅᑎᓗᑎᒃ ᐱᐅᓛᑦ ᐊᑐᖅᑕᐅᖃᑦᑕᖅᑐᓂᒃ ᐆᒻᒪᖅᑎᑦᑎᒃᑲᓐᓂᕐᓂᐊᕐᓗᑎᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᑦ.

ᐅᑉᓗᖅ ᐅᒃᑯᐃᓚᐅᖅᑐᖅ ᐱᔾᔪᑕᐅᔪᒥᒃ ᐅᖃᓪᓚᒃᖢᓂ ᐃᖢᐊᖅᓴᐃᔨ ᓗᐊᓇ ᐅᐊᓄᔅᑕ7 ᐅᐃᓕᐊᒻᔅ (Lorna Wanosts’a7 Williams) ᓯᕗᓂᐊᒍᑦ ᑲᑎᒪᔩᑦ ᐅᖃᓪᓗᕆᒃᓴᖃᑎᖃᖅᖢᑎᒃ ᐃᖢᐊᖅᓴᐃᔨ ᐋᓚᓐ ᑯᐊᕐᐱᐅᕐ-ᒥᑦ (Alan Corbiere) ᐊᒻᒪᓗ ᓯᐅᕆᓐ ᐸᕆᐊᓐᑑ-ᒥᑦ (Sharon Parenteau), ᑕᒪᕐᒥᒃ ᑲᒪᔨᐅᑉᓗᑎᒃ ᒋᐅᕆ ᐊᓇᓐᑕᓴᖓᕇ-ᒧᑦ (Gary Anandasangaree), ᒪᓕᒐᓕᐅᕐᕕᒡᔪᐊᕐᒧᑦ ᑎᑎᕋᖅᑎ ᒥᓂᔅᑕᒧᑦ ᑲᓇᑕ-ᓄᓇᖃᖅᖄᖅᑐᑦ ᐱᓕᕆᖃᑎᒌᒃᑯᓐᓄᑦ. ᑲᑎᒪᔪᓂᑦ ᐅᖃᓪᓗᕆᒃᓴᐅᑎᓂᕐᓂᑦ ᑭᖑᓂᐊᓂᑦ ᒪᓕᓚᐅᖅᑐᑦ ᑕᓪᓕᒪᐃᖅᖢᑎᒃ (5) ᐊᕕᒃᑐᖃᑦᑕᖅᖢᑎᒃ ᐃᓚᐅᖃᑕᐅᔪᓂᒃ ᑐᓂᓯᖃᑦᑕᕈᖕᓇᖅᑎᑦᑎᑉᓗᑎᒃ ᐊᑐᕐᓂᑯᖏᓐᓂᒃ ᐃᓚᖏᓐᓄᑦ ᐅᖃᐅᓯᐅᔪᓄᑦ. ᐅᑉᓗᖅ 2 ᐃᓱᓕᓚᐅᖅᑐᖅ ᖃᐅᔨᑎᑕᓗᒃᑖᖅᖢᑎᒃ ᖃᓄᐃᖓᓂᐅᔪᑦ ᐅᖃᓪᓗᕆᒃᓴᐅᑎᓂᕐᓂᒃ ᐱᔭᐅᔪᓂᒃ ᐊᑐᓂ ᐊᕕᒃᓯᒪᑉᓗᑎᒃ ᑲᑎᒪᓂᕐᓂᑦ ᓇᐃᓈᖅᑎᖅᑕᐅᓚᐅᖅᑐᑦ ᐊᖏᓂᖅᓴᐅᔪᓄᑦ ᑲᑎᕐᒪᔪᓄᐊᕐᓂᐊᕐᓗᓂ.

ᐃᖢᐊᖅᓴᐃᔨ ᓗᐊᓇ ᐅᐊᓄᔅᑕ7 ᐅᐃᓕᐊᒻᔅ (Lorna Wanosts’a7 Williams), ᓯᓚᑦᑐᖅᓴᕐᕕᒡᔪᐊᖅ ᕕᒃᑑᕆᔭᒥᑦ, ᐅᖃᓚᐅᖅᑐᖅ ᐱᒻᒪᕆᐅᓂᖓᓂᒃ ᐃᓕᓐᓂᐊᕈᑎᓕᐅᕐᓗᓂ ᐃᓚᐅᑎᓪᓗᒋᑦ ᓄᓇᓕᒃ, ᒪᓕᒡᓗᒋᑦ ᐊᖏᕈᑕᐅᓯᒪᔪᑦ ᑐᕌᒐᐅᒧᑦ ᐅᖃᐅᓯᖓᓄᑦ ᓄᓇᓕᐅᑉ, ᐊᒻᒪᓗ ᐃᓱᒪᒋᔭᐅᓗᑎᒃ ᖃᓄᐃᖓᓂᕆᔭᖓᑕ ᐅᖃᐅᓯᐅᑉ. ᐅᖃᐅᓯᕐᒥᒃ ᐃᓕᓐᓂᐊᕐᓂᖅ ᐊᒻᒪᓗ ᐊᑐᖅᑕᐅᓂᖓ ᐱᔭᕆᐊᖃᖅᑐᖅ ᐊᔾᔨᒌᙱᑦᑐᒃᑯᑦ, ᐅᖓᑖᓄᐊᕐᓗᑎᒃ ᖃᕆᐊᕐᒥᑦ ᐃᓕᓐᓂᐊᕐᓂᐅᑉ ᐊᒻᒪᓗ ᐃᓚᐅᑎᓪᓗᒋᑦ ᓄᓇᓕᐊᖅᓯᒪᓂᒃᑯᑦ-ᐃᓕᓐᓂᐊᕐᓂᖅ. ᑎᑎᕋᐃᓂᖅ ᐊᒻᒪᓗ ᑐᖅᖁᖅᑕᐅᓗᒋᑦ ᐱᒻᒪᕆᐅᖕᒥᔪᖅ. ᐃᓕᓐᓂᐊᕐᕖᑦ ᐱᒻᒪᕆᐅᔪᑦ ᐃᓚᒋᔭᐅᓗᑎᒃ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᑭᓯᐊᓂ ᐱᒻᒪᕆᐅᖕᒥᔪᖅ ᐅᖃᐅᓯᕐᒧᑦ ᓄᓇᓕᖕᒦᓪᓗᓂ ᐊᔾᔨᒌᙱᑦᑐᓂᒃ ᐋᖅᕿᒃᓯᒪᓗᒍ. ᐱᓕᕆᐊᖑᔪᑦ ᐱᓕᕆᐊᖃᕆᐊᖃᕐᒥᔪᑦ ᐅᖃᐅᓯᕐᒥᒃ ᐃᓕᓐᓂᐊᖅᑎᓗᒃᑖᓄᑦ, ᐃᓚᐅᓗᑎᒃ ᓄᓇᒋᔭᐅᔪᒦᙱᑦᑐᑦ ᐊᒻᒪᓗ ᐊᒃᑐᐊᓂᖃᙱᑦᑐᑦ ᐅᖃᐅᓯᖏᓐᓂᒃ ᐊᖏᕐᕋᕆᔭᖏᓐᓂᑦ. ᐃᓕᓐᓂᐊᖅᑎᑕᐅᓂᖏᑦ ᐃᓕᓐᓂᐊᖅᑎᑦᑎᔩᑦ, ᐃᖢᐊᖅᓴᐃᔨ ᐅᐃᓕᐊᒻᔅ (Williams) ᐅᖃᖅᑐᖅ ᐃᓂᑕᖃᙱᑦᑐᖅ ᐸᕐᓇᒃᑕᐅᓂᖏᑦ ᐃᓕᓐᓂᐊᖅᑎᑦᑎᔨᐅᔪᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᐅᖃᐅᓯᖃᖅᑐᑦ ᐊᒻᒪᓗ ᕿᒥᕐᕈᔭᐅᔭᕆᐊᖃᖅᑐᑦ ᐊᑐᐊᒐᐃᑦ ᐃᑲᔪᖅᑕᐅᓂᖅᓴᐅᓂᐊᕐᓗᑎᒃ ᓄᓇᖃᖅᖄᖅᑐᑦ ᐅᖃᐅᓯᖏᑦ. ᐱᒻᒪᕆᐅᔪᖅ ᐅᖃᐅᓯᕐᒧᑦ ᐱᕝᕕᐅᖃᑦᑕᖅᑐᓂᒃ ᐋᖅᕿᒃᓯᓗᓂ ᓄᓇᖃᖄᖅᑐᓂᑦ ᓄᓇᕐᔪᐊᕐᒥᑦ ᑕᐅᑐᒡᓗᓂ, ᐅᖃᐅᓯᖅ ᐊᒻᒪᓗ ᖃᐅᔨᒪᓂᖃᖅᑐᓄᑦ ᐋᖅᕿᐅᒪᔪᖅ.

ᓯᐅᕆᓐ ᐸᕆᐊᓐᑑ (Sharon Parenteau), ᓗᐃ ᕆᐅᓪ ᐱᓕᕆᕝᕕᖕᒥᑦ, ᐅᖃᓚᐅᖅᑐᖅ ᐊᒃᓱᕈᕐᓇᕈᑕᐅᔪᓂᒃ ᐆᒻᒪᖅᑎᑦᑎᒃᑲᓐᓂᕐᓂᐊᕐᓗᓂ ᒥᑦᓯᕝ (Michif) ᐅᖃᐅᓯᕐᒥᑦ ᐊᒥᓲᔪᖕᓃᖅᑎᓪᓗᒋᑦ ᐅᖃᐅᓯᕐᒥᒃ ᐅᖃᓪᓚᖃᑦᑕᖅᑐᑦ ᐊᒻᒪᓗ ᐅᖃᓪᓚᖃᑦᑕᖅᑐᖅ ᐃᓐᓇᒻᒪᕆᐅᓕᖅᑎᓪᓗᒋᑦ. ᐅᖃᖅᖢᓂ ᓯᕗᓪᓕᖅᐸᐅᑎᔭᐅᔭᕆᐊᖃᓪᓚᕆᒃᑐᖅ ᐊᒥᓱᙳᕆᐊᑦᑎᐊᕐᓂᐊᕐᓗᒋᑦ ᐅᖃᓪᓚᒃᑎᐅᔪᑦ ᓇᓃᓐᓂᓗᒃᑖᖓᓂᑦ ᐅᖃᓪᓚᒃᑕᐅᖃᑦᑕᕐᓂᕆᔭᖓᑕ. ᑕᐃᒪᓐᓇᐃᓐᓂᐊᕐᓗᓂ ᐃᑲᔪᖅᑕᐅᔭᕆᐊᖃᖅᑐᑦ ᑕᒪᐃᓐᓂᑦ ᐅᖃᓪᓚᒃᑎᓂᑦ ᐊᒻᒪᓗ ᐃᓕᓐᓂᐊᖅᑎᓂᑦ. ᐅᖃᖅᖢᓂ ᑮᓇᐅᔭᖃᖅᑎᑕᐅᖏᓐᓇᖃᑦᑕᙱᓐᓂᖅ ᐊᔾᔨᒌᙱᑦᑐᓂᒃ ᑐᕌᖓᔪᓕᕆᓐᓇᖃᑦᑕᖅᑐᖅ, ᐃᓕᓐᓂᐊᕈᑎᓕᐅᕆᓂᐊᕐᓗᓂ ᐊᒻᒪᓗ ᐊᓯᓗᒃᑖᖏᑦ ᐅᖃᐅᓯᕐᒥᒃ ᐆᒻᒪᖅᑎᑦᑎᓂᓕᕆᓂᓗᒃᑖᖑᔪᓄᑦ. ᓯᐅᕆᓐ ᐸᕆᐊᓐᑑ (Sharon Parenteau), ᐅᖃᖅᑐᖅ ᐅᖃᐅᓯᕐᒥᒃ ᐃᓕᓐᓂᐊᕐᓂᖅ ᐊᔪᕆᑎᑕᐅᔭᕆᐊᖃᖅᑐᖅ. ᐃᓂᓕᐅᕆᓂᖅ ᐊᒻᒪᓗ ᐱᖁᑏᑦ ᐱᔭᕆᐊᖃᖅᑐᓄᑦ ᑎᑭᐅᑎᓂᐊᕐᓗᒍ ᑐᕌᒐᐅᔪᖅ.

ᐃᖢᐊᖅᓴᐃᔨ ᐋᓚᓐ ᐅᔾᔨᒡ ᑯᐊᕐᐱᐅᕐ (Alan Odjig Corbiere), ᔪᐊᒃ ᓯᓚᑦᑐᖅᓴᕐᕕᒡᔪᐊᕐᒥᑦ, ᐅᖃᓪᓚᓚᐅᖅᑐᖅ ᐊᑐᖅᓯᒪᓂᕆᔭᖓᓂᑦ ᓴᖅᕿᑦᑎᓂᕐᒧᑦ ᐊᒻᒪᓗ ᐱᓕᕆᐊᕆᑉᓗᒋᑦ ᐊᓂᔅᓈᐱᒧᐃᓐ (Anishnaabemowin) ᐅᑎᖅᑎᑕᒃᑲᓐᓂᕐᓂᖓᓄᑦ ᑐᕌᖓᔪᖅ ᐊᒻᒪᓗ ᐅᖃᓪᓚᒃᖢᓂ ᑲᑎᑎᑕᐅᓂᖏᑦ ᐱᖓᓱᐃᑦ ᐅᖃᐅᓯᕐᒧᑦ ᑕᐅᑐᒐᐅᔪᑦ ᐊᒻᒪᓗ ᑐᑭᐅᔪᑦ ᐊᕕᒃᑐᖅᓯᒪᔪᓄᑦ ᐋᖅᕿᒃᓯᒪᔪᓂᑦ: ᓯᕗᓪᓕᖅᐹᒥᑦ ᐃᓚᐅᔪᑦ ᓂᐱᓕᐅᕐᓗᒋᑦ ᐅᖃᓪᓚᒃᑐᑦ ᐊᒻᒪᓗ ᑎᑎᕋᐅᓯᕆᓗᒋᑦ ᐅᖃᐅᓯᐅᔪᖅ; ᑐᒡᓕᐊ ᐱᓯᒪᓗᒍ ᐅᖃᐅᓯᐅᔪᖅ ᐅᖃᓪᓚᒋᐊᖃᕐᓗᑎᒃ ᐊᒻᒪᓗ ᑎᑎᕋᕐᓗᒋᑦ; ᐊᒻᒪᓗ ᐱᖓᓱᐊᑦ ᐆᒻᒪᖅᑎᒃᑲᓐᓂᕐᓗᒍ ᐅᖃᐅᓯᖅ ᐃᓚᐅᑎᑦᑎᓗᓂ ᓄᑖᓂᒃ ᐅᖃᐅᓯᕐᒥᑦ, ᓄᑖᑦ ᐃᓂᓕᐊᖑᔪᑦ ᐊᑐᕐᓂᐊᕐᓗᑎᒃ ᐅᖃᐅᓯᕐᒥᑦ ᐊᒻᒪᓗ ᓄᑖᑦ ᐅᓂᑉᑳᓂᒃ ᑐᓂᐅᑎᖃᕐᓂᐊᕐᓗᓂ.

ᐅᖃᓪᓗᕆᒃᓴᐅᑎᓂᖃᖅᑎᓪᓗᒋᑦ ᑲᑎᒪᓂᖃᖅᑐᑦ ᑕᑯᔭᒃᓴᖃᖅᖄᖅᑎᓪᓗᒋᑦ, ᐊᐱᕆᔭᐅᖕᒪᑕ ᐱᒻᒪᕆᐅᓂᖓ ᐃᓕᓐᓂᐊᖅᑎᑦᑎᔩᑦ ᐊᔪᕈᖕᓃᖅᓴᖅᑕᐅᓂᖏᑦ, ᑲᑎᒪᔪᑦ ᐅᖃᓚᐅᖅᑐᑦ ᑮᓇᐅᔭᖅᑕᖃᕆᐊᖃᖅᑐᖅ ᑐᕌᖓᔪᒥᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᑦ ᐃᓕᓐᓂᐊᖅᑎᑦᑎᔨᓄᑦ. ᓄᓇᖃᖅᖄᖅᑐᓂᒃ ᐃᓕᓐᓂᐊᖅᑎᑦᑎᓂᕐᒧᑦ ᐱᓕᕆᐊᖃᖅᑐᓂᒃ ᐱᑕᖃᕆᐊᖃᖅᑐᖅ ᐅᖃᓪᓚᖃᑦᑕᖅᑐᓂᒃ ᐅᖃᐅᓯᕐᒥᑦ ᐊᒻᒪᓗ ᐃᓕᓐᓂᐊᖅᑎᑦᑎᔪᖕᓇᖅᑐᓂᒃ. ᐊᑕᐅᓯᖅ ᑕᐅᑐᒐᕆᔭᐅᓂᖅᓴᐅᔭᕆᐊᖃᖅᑐᖅ ᐅᖃᐅᓯᕐᒥᒃ ᐱᔾᔪᑎᖃᖅᑐᒥᒃ ᐱᔭᒃᓴᐅᑎᐅᓂᐊᖅᑐᓂᒃ. ᐱᕕᖃᖅᑎᑦᑎᓂᖅᓴᐅᔭᕆᐊᖃᖅᑐᖅ ᐃᓕᓐᓂᐊᖅᑎᓂᒃ ᐃᓚᐅᑎᑦᑎᑦᑎᐊᕐᓂᐊᕐᓗᓂ ᐅᖃᐅᓯᕐᒥᑦ, ᓱᓕᔪᒥᒃ ᐃᓅᓯᕐᒥᑦ ᖃᓄᐃᖓᓂᐅᔪᒦᓪᓗᓂ ᐊᒻᒪᓗ ᐅᖃᓪᓚᖃᑦᑕᕐᓗᓂ ᐱᔭᐅᔭᕆᐊᖃᖅᑐᖅ. ᐊᑕᐅᓯᕐᒥᑦ ᐆᒃᑑᑎᒥᑦ ᑐᓂᓯᓚᐅᖅᑐᖅ ᓄᓇᓕᖕᒥᑦ ᐅᖃᐅᓯᕐᒧᑦ ᐃᓂᓕᐅᖅᓯᒪᔪᒥᒃ ᐃᓄᐃᑦ ᑕᐃᑲᓂᕐᒥᐅᑕᐅᓗᑎᒃ ᐊᒻᒪᓗ ᐃᓚᒋᔭᐅᓗᑎᒃ ᖃᑕᙳᑎᒌᓄᑦ ᐅᖃᐅᓯᕐᒥᑐᐃᓐᓇᖅ ᐅᖃᓪᓚᖃᑦᑕᖅᑐᓂᒃ. ᐱᕝᕕᐅᖃᑦᑕᖅᑐᓂᒃ ᐱᑕᖃᒃᑲᓐᓂᕆᐊᖃᖅᑐᖅ ᓲᕐᓗ ᓄᓇᓕᖕᒥᑦ ᐅᖃᐅᓯᕐᒧᑦ ᐸᕐᓇᐃᓂᕐᒧᑦ ᐊᑐᖅᑕᐅᔪᒃᓴᓂᒃ, ᓄᓇᓕᒃ ᑐᓂᔭᐅᓯᒪᓗᓂ ᐊᑐᖅᑕᐅᔪᒃᓴᒥᑦ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᐱᕙᓪᓕᐊᓂᖃᕐᓗᑎᒃ. ᐅᖃᓪᓗᕆᒃᓴᐅᑎᓂᖃᓚᐅᕐᒥᔪᑦ ᐃᑲᔪᖅᑕᐅᓂᖏᑦ ᓄᑕᖅᖃᐃᑦ ᐃᓕᓐᓂᐊᖅᑏᑦ ᑭᓯᐊᓂᑦᑕᐅᖅ ᐃᓕᓐᓂᐊᖅᑎᓪᓗᒋᑦ ᐊᖓᔪᖅᖄᖏᑦ ᐅᖃᐅᓯᖅ ᐅᖃᓪᓚᒃᑕᐅᖃᑦᑕᕐᓂᐊᕐᒪᑦ ᐃᓕᓐᓂᐊᕐᕕᖕᒥᑦ ᐊᖏᕐᕋᒥᓪᓗ. ᓄᕙᒡᔪᐊᕐᓇᖅᑕᖃᖅᑎᓪᓗᒍ, ᑭᑐᓗᒃᑖᑦ ᖃᕆᑕᐅᔭᓂᒃ ᐊᑐᕆᐊᖃᓚᐅᖅᑐᑦ ᐱᔭᕆᐊᖃᕐᓂᐅᑉᓗᓂ ᐊᒻᒪᓗ ᐅᖃᐅᓯᖃᓚᐅᖅᑐᑦ ᐊᑐᖅᑕᐅᔪᖕᓇᖅᑐᓂᒃ ᐃᓕᓐᓂᐊᖅᑎᑦᑎᓂᕐᒧᑦ ᐊᒻᒪᓗ ᐃᓕᑕᐅᓗᓂ ᐅᖃᐅᓯᖅ ᐊᑐᕐᓗᑎᒃ ᖃᕆᑕᐅᔭᕋᓗᖕᓂᑦ ᐃᓱᒪᒋᔭᐅᔪᖕᓇᕐᒥᔪᖅ.

ᐃᓚᐅᖃᑕᐅᔪᑦ ᖃᐅᔨᑎᑦᑎᓚᐅᖅᑐᑦ ᐅᖃᐅᓯᕐᒥᒃ ᒥᐊᓂᖅᓯᓂᖅ ᐊᒻᒪᓗ ᐆᒻᒪᖅᑎᑦᑎᒃᑲᓐᓂᕐᓂᖅ ᐃᓚᒋᔭᐅᔪᖅ ᐊᖏᓂᖅᓴᐅᔪᒥᒃ ᐃᓂᑖᖅᑎᑕᐅᓯᒪᔪᖕᓃᖅᑎᑦᑎᓂᕐᒧᑦ ᖃᓄᐃᓕᐅᕈᑕᐅᔪᒥᒃ ᐱᕈᐃᑎᑦᑎᒃᑲᓐᓂᕐᓗᑎᒃ ᐊᒻᒪᓗ ᐆᒻᒪᖅᑎᒃᑲᓐᓂᖅᑎᑦᑎᓂᕐᒥᒃ ᓄᓇᖃᖅᖄᖅᑐᑦ ᐃᓅᑉᓗᑎᒃ. ᐃᓚᐅᖃᑕᐅᔪᑦ ᓇᓗᓇᐃᖅᓯᓚᐅᕐᒥᔪᑦ ᑲᑎᓯᒪᓂᖏᓐᓂᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ ᓄᓇᒧᑦ.

ᑕᓪᓕᒪᐅᑉᓗᑎᒃ (5) ᐊᕕᓚᐅᖅᑐᑦ ᑲᒪᔭᖃᖅᖢᑎᒃ ᐱᔾᔪᑕᐅᔪᓂᒃ ᐱᐅᓛᑦ ᐊᑐᖅᑕᐅᖃᑦᑕᖅᑐᓂᒃ, ᑕᑯᑎᑕᐅᔪᑦ ᖃᐅᔨᒪᓂᕐᒥᒃ ᐊᔪᙱᓐᓂᖃᖅᑐᓂᒃ ᐊᒻᒪᓗ ᐱᓕᕆᐊᖃᖅᑐᓂᒃ ᐱᓕᕆᐊᖑᑉᓗᑎᒃ ᑭᖑᓂᐊᒍᓪᓗ ᐅᖃᓪᓗᕆᒃᓴᐅᑎᑉᓗᑎᒃ ᖃᐅᔨᓂᐊᕐᓗᒋᑦ ᒪᓕᒐᕆᔭᐅᓗᐊᖅᑐᑦ ᐊᒻᒪᓗ ᐃᒪᓐᓈᖅᑑᑕᐅᔪᑦ.

ᐱᐅᓛᑦ ᐊᑐᖅᑕᐅᖃᑦᑕᖅᑐᑦ ᖃᓂᑦᑐᒥᑦ ᐃᓂᐅᔪᒥᑦ ᐅᖃᐅᓯᕐᒧᑦ ᐊᑐᐊᒐᖅ/ᐱᓕᕆᖃᑎᒌᒃᑐᑦ ᑲᑎᒪᓂᕐᒥᑦ ᐅᖃᓪᓗᕆᒃᓴᐅᑎᓂᖃᓚᐅᖅᑐᑦ ᑕᐅᑐᒐᖃᖅᖢᑎᒃ ᐊᔾᔨᒌᙱᑦᑐᓂᒃ ᖃᓂᑦᑐᒥᑦ ᐃᓂᐅᔪᒥᑦ/ᓄᓇᓕᖕᒥᑦ ᑐᑭᒧᐊᒃᑎᕆᓂᕐᒥᒃ ᐊᒻᒪᓗ ᐱᓕᕆᖃᑎᖃᕐᓂᕐᒥᒃ ᓄᓇᖅᖄᑎᒌᒃᑐᓄᑦ, ᓄᓇᖃᖅᖄᖅᑐᓄᑦ ᑲᒪᒋᔭᐅᔪᑦ ᐱᓕᕆᖃᑎᒌᑦ ᐊᒻᒪᓗ ᐊᖏᖃᑎᒌᒍᑎᖃᓕᕐᓗᑎᒃ ᒐᕙᒪᒃᑯᓐᓄᑦ ᑖᑉᑯᐊᓕ ᐱᐊᓂᑦᑎᐊᖅᓯᒪᓂᖃᖅᖢᑎᒃ ᑐᓂᓯᓂᕐᒥᒃ ᖃᐅᔨᒪᓂᖃᕐᓂᕐᒥᒃ ᐊᒻᒪᓗ ᐱᕝᕕᐅᖃᑦᑕᖅᑐᓂᒃ ᐊᑕᐅᑦᑎᒃᑯᑦ ᐃᑲᔪᖅᖢᑎᒃ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᒧᑦ.

ᐱᐅᓛᑦ ᐊᑐᖅᑕᐅᖃᑦᑕᖅᑐᑦ ᐊᒥᓱᓂᒃ ᐊᔾᔨᒌᙱᑦᑐᓂᒃ ᐊᑐᖅᑕᐅᔪᑦ ᐅᖃᐅᓯᕐᒥᒃ ᐃᓕᓐᓂᐊᕐᓂᕐᒧᑦ ᑲᑎᒪᓂᕐᒥᑦ ᐃᓚᐅᓚᐅᖅᑐᑦ ᑭᒡᒐᖅᑐᐃᔪᑦ ᖃᑉᓯᐊᕐᔪᖕᓂᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᐆᒻᒪᖅᑎᑦᑎᒃᑲᓐᓂᕋᓱᒃᑐᓄᑦ. ᐃᓚᐅᖃᑕᐅᔪᑦ ᑐᓂᓯᓚᐅᖅᑐᑦ ᐊᒥᓱᓂᒃ ᐊᔾᔨᒌᙱᑦᑐᓂᒃ ᐊᑐᖃᑦᑕᖅᑕᖏᓐᓂᒃ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ. ᐅᖃᐅᓯᖃᓚᐅᕐᒥᔪᑦ ᐃᓚᒋᔭᐅᔪᓂᒃ ᐱᔭᕆᐊᖃᖅᑐᑦ ᐱᐊᓂᑦᑎᐊᕈᖕᓇᕐᓂᐊᕐᓗᓂ ᑐᕌᖓᔪᓕᐅᕆᓂᖅ ᐊᑐᕐᓗᑎᒃ ᐊᑕᐅᑦᑎᒃᑯᑦ ᐊᑐᓕᖅᑎᑦᑎᓂᕐᒥᒃ ᐊᔾᔨᒌᙱᑦᑐᓂᒃ ᐊᑐᖅᑕᐅᔪᓂᒃ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ, ᐃᓚᐅᓗᑎᒃ ᐅᖃᐅᓯᕐᒥᒃ ᐃᓕᓐᓂᐊᖅᑎᑦᑎᓂᖅ ᐃᓕᓐᓂᐊᓕᓵᖅᑐᓂᑦ ᖁᑦᑎᖕᓂᓖᑦ 12-ᒧᑦ. ᐅᖃᓪᓗᕆᒃᓴᐅᑎᓂᖅ ᑕᐅᑐᒐᖃᓚᐅᖅᑐᖅ ᐱᐊᓂᑦᑎᐊᖅᓯᒪᔪᓂᒃ ᐆᒃᑑᑕᐅᔪᓂᒃ ᐊᔾᔨᒋᑉᓗᒋᑦ ᐱᓕᕆᐊᖑᓯᒪᔪᑦ ᐅᖃᐅᓯᐅᑉ ᖃᓄᐃᖓᓂᕆᔭᖓᓄᑦ.

ᐱᖓᓱᐊᑦ ᐊᕕᒃᑐᖅᖢᑎᒃ ᐱᐅᓛᑦ ᐊᑐᖅᑕᐅᖃᑦᑕᖅᑐᑦ ᐊᑐᐊᒐᕐᒥᑦ ᐊᒻᒪᓗ ᐅᖃᐅᓯᕐᒥᑦ ᐸᕐᓇᐃᓂᕐᒥᑦ ᑕᐅᑐᒐᐅᔪᓂᒃ ᓄᓇᖃᖅᖄᖅᑐᑦ ᐃᓄᖏᓐᓂᒃ ᐃᑲᔪᖅᖢᒋᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ ᐊᒻᒪᓗ ᐃᓚᐅᖃᑕᐅᑉᓗᑎᒃ ᑕᑯᔭᒃᓴᐅᑎᓂᑦ, ᑭᖑᓂᐊᒍᑦ ᐅᖃᓪᓗᕆᒃᓴᐅᑎᓃᑦ, ᐅᑯᐊᖑᑉᓗᑎᒃ ᓄᓇᖃᖅᖄᖅᑐᓂᑦ ᐱᓕᕆᖃᑎᒌᑦ ᐅᖃᐅᓯᖃᖅᑐᑦ ᐱᔭᒃᓴᐅᑎᖏᓐᓂᒃ ᐊᑐᓕᖅᑎᑦᑎᓂᕐᒧᑦ ᐊᑐᐊᒐᓂᒃ, ᒪᓕᒐᕋᓛᓂᒃ ᐊᒻᒪᓗ ᓄᓇᓕᖕᒥᑦ ᐅᖃᐅᓯᕐᒧᑦ ᐸᕐᓇᐅᑎᓂᒃ ᐱᔾᔪᑎᒋᑉᓗᒋᑦ ᐊᓯᐊᔨᑦᑕᐃᓕᓂᖅ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ, ᐊᒻᒪᓗ ᐊᒃᑐᐊᓂᕆᔭᖏᑦ ᐱᖅᖁᓯᒃᑯᑦ ᒪᓕᒐᓄᑦ ᐊᒻᒪᓗ ᐅᖃᐅᓯᕐᓄᑦ.

ᐱᐅᓛᑦ ᐊᑐᖅᑕᐅᖃᑦᑕᖅᑐᑦ ᑐᑭᓯᐅᒪᔾᔪᑎᓄᑦ ᑲᑉᐳᔾᔭᓅᖅᑐᓄᑦ ᐃᓚᓕᐅᑦᑎᓂᕐᓄᑦ - ᐅᖃᐅᓯᕐᒥᒃ ᐅᑎᖅᑎᑎᕆᓂᖅ ᑕᐅᑐᒐᖃᖅᑐᖅ ᐱᕙᓪᓕᐊᔭᐅᓂᖓᓄᑦ ᐊᒻᒪᓗ ᐊᑐᖅᑕᐅᓂᖓᓄᑦ ᑲᑉᐳᔾᔭᓅᖅᑐᒃᑯᑦ (ᓲᕐᓗ, ᖃᕆᑕᐅᔭᒃᑰᖓᓕᕐᓗᒋᑦ ᐱᕝᕕᐅᖃᑦᑕᖅᑐᑦ ᐊᒻᒪᓗ ᑎᑎᕋᐅᓯᐅᔪᑦ) ᐋᖅᕿᒃᓯᓃᑦ ᐊᒻᒪᓗ ᐅᓗᕆᐊᓇᕐᓂᐅᔪᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᐅᑎᖅᑎᑎᕆᓂᕐᒧᑦ ᐊᒻᒪᓗ ᐋᒻᒪᖅᑎᑦᑎᒃᑲᓐᓂᕐᓂᕐᒧᑦ. ᐃᓚᐅᑎᑦᑎᓚᐅᖅᑐᖅ ᐃᓚᐅᖃᑕᐅᔪᓂᒃ ᐱᑕᖃᐅᑦᑎᐊᕐᓂᖓᑕ ᐅᖃᐅᓯᓄᑦ ᓈᓴᐅᑎᓂᑦ/ᑎᑎᖅᖃᓂᑦ ᐊᒻᒪᓗ ᐱᐅᓛᑦ ᐊᑐᖅᑕᐅᖃᑦᑕᖅᑐᓄᑦ ᒥᐊᓂᕆᔭᐅᑎᓐᓂᐊᕐᓗᒍ ᐃᓱᒪᒃᑯᑦ ᐱᒋᔭᐅᔪᖅ.

ᑕᓪᓕᒪᖓᓂᑦ ᐊᕕᒃᖢᑎᒃ ᐃᓚᐅᑎᑦᑎᓂᕐᒧᑦ ᑐᕌᖓᔪᑦ ᑕᒪᐃᓐᓂᑦ ᐃᓅᓯᕆᔭᐅᔪᓄᑦ ᐊᒻᒪᓗ ᑐᓂᓯᓚᐅᖅᑐᖅ ᑐᑭᓯᐅᒪᔾᔪᑎᓂᒃ ᖃᓄᐃᖓᓂᐅᔪᓄᑦ ᐊᒻᒪᓗ ᐃᑲᔪᖅᑕᐅᔭᕆᐊᖃᕐᓂᕐᒥᒃ ᐱᕙᓪᓕᐊᓂᐊᕐᓗᑎᒃ ᐃᓚᐅᑎᑦᑎᓂᕐᒧᑦ ᑐᕌᖓᔪᓂᒃ, ᐃᓚᐅᑉᓗᑎᒃ ᐃᓚᖏᑦ ᐃᓚᐅᖃᑕᐅᔪᓂᒃ ᐊᒻᒪᓗ ᓄᓇᓕᖕᒥᑦ ᐱᒋᐊᖅᑎᑦᑎᓃᑦ.

ᐅᑉᓗᖅ 2 ᐱᐅᓛᑦ ᐊᑐᖅᑕᐅᖃᑦᑕᖅᑐᓂᒃ ᐱᔭᐅᓗᐊᓚᐅᖅᑐᑦ

• ᒐᕙᒪᑐᖃᒃᑯᑦ/ᑲᓇᑕᒥᑦ ᐊᕕᒃᑐᖅᓯᒪᔪᑦ/ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᑦ ᐊᒻᒪᓗ ᐃᖅᕿᓖᑦ ᓄᓇᖅᖃᑎᒌᑦ ᐱᓕᕆᖃᑎᒌᖏᑦ ᐱᓕᕆᖃᑎᒌᖕᓂᖃᕆᐊᖃᖅᑐᑦ ᓄᓇᖃᖅᖄᖅᑐᑦ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᖅ ᑎᑭᐅᑎᔭᐅᓂᐊᕐᓗᓂ.
• ᓄᓇᖃᖅᖄᖅᑐᑦ ᐅᖃᐅᓯᕐᒧᑦ ᐃᓕᓐᓂᐊᕈᑎᓕᐅᕆᐊᖃᖅᑐᑦ ᐃᓚᐅᖃᑕᐅᑎᓪᓗᒍ ᓄᓇᓕᒃ, ᐊᑐᕐᓗᒋᑦ ᐊᖏᕈᑕᐅᓯᒪᔪᑦ ᑐᕌᒐᐅᓂᐊᖅᑐᑦ ᐅᖃᐅᓯᖓᑦ ᓄᓇᓕᐅᑉ ᐊᒻᒪᓗ ᐃᓱᒪᒋᔭᐅᓗᓂ ᖃᓄᐃᖓᓂᕆᔭᖓᑕ ᐅᖃᐅᓯᐅᑉ.
• ᐅᖃᐅᓯᕐᒥᒃ ᐃᓕᓐᓂᐊᕐᓗᓂ ᐊᒥᓱᓂᒃ ᐊᔾᔨᒌᙱᑦᑐᓂᒃ ᐱᑕᖃᖅᑐᖅ, ᑭᖑᕚᕇᓅᖓᑉᓗᓂ, ᐊᒻᒪᓗ ᖃᑕᙳᑎᒌᓅᖓᑉᓗᓂ; ᐱᑕᖃᓕᕆᐊᖃᖅᑐᖅ ᐊᔾᔨᒌᙱᑦᑐᓂᑦ ᐃᓗᓕᐅᔪᓂᑦ, ᐅᖓᑖᓅᕐᓗᓂ ᐃᓕᓐᓂᐊᖅᑏᑦ ᖃᕆᐊᖏᓐᓂᑦ ᐊᒻᒪᓗ ᐃᓚᐅᑎᓪᓗᒍ ᓄᓇᓕᐊᖅᓯᒪᓂᒃᑯᑦ ᐃᓕᓐᓂᐊᕐᓂᖅ. ᑕᒪᓐᓇ ᐱᕕᖃᖅᑎᑦᑎᒃᑲᓐᓂᕈᖕᓇᖅᑐᖅ ᐃᓕᓐᓂᐊᖅᑎᓄᑦ ᐃᓚᐅᖃᑕᐅᓗᑎᒃ ᐅᖃᐅᓯᕐᒥᑦ, ᐃᓅᓯᕐᒥᑦ ᖃᓄᐃᖓᓂᐅᔪᓃᓪᓗᓂ ᐊᒻᒪᓗ ᐅᖃᓪᓚᖕᓂᕐᒥᑦ ᐊᑐᖅᑕᐅᓗᓂ ᐱᔭᐅᔭᕆᐊᖃᖅᑐᓗᒃᑖᑦ ᓇᓃᓐᓂᓗᒃᑖᖏᓐᓂᑦ ᐃᓅᓯᖓᓐᓂᒃ ᓲᕐᓗ ᐃᓕᓐᓂᐊᕐᕕᖕᒥᑦ, ᐊᖏᕐᕋᖏᓐᓂᑦ, ᐱᖃᓐᓈᕇᖕᓂᑦ ᐊᒻᒪᓗ ᓄᓇᓕᖕᒥᑦ. ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᐆᒻᒪᖅᑎᑦᑎᒃᑲᓐᓂᕐᓂᖅ ᐃᓗᐃᑦᑑᖓᔭᕆᐊᖃᖅᑐᖅ, ᐊᒻᒪᓗ ᐃᓐᓇᕆᔭᐅᔪᑦ ᐃᑲᔪᖅᑕᐅᓗᑎᒃ.
• ᑲᑉᐳᔾᔭᓅᖅᑐᑦ ᐊᑐᑦᑎᐊᖅᑐᖅ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ, ᐃᓚᐅᑉᓗᑎᒃ ᒪᒃᑯᒃᑐᐃᑦ ᐊᒻᒪᓗ ᐃᓐᓇᕆᔭᐅᔪᑦ, ᐊᒻᒪᓗ ᐃᓚᐅᖃᑕᐅᔭᕆᐊᖃᖅᑐᖅ ᓄᓇᓕᐊᖅᓯᒪᓗᓂ ᐊᒻᒪᓗ ᑕᒡᕙᐅᓗᑎᒃ ᐃᓕᓐᓂᐊᕐᓂᖅ. ᑲᑉᐳᔾᔭᓅᖅᑐᓂᑦ ᐃᓚᐅᔪᑦ ᖃᕆᑕᐅᔭᒃᑰᕈᖕᓇᐅᑏᑦ, ᐱᖁᑏᑦ, ᐊᒻᒪᓗ ᐊᑐᖅᑕᐅᖃᑦᑕᖅᑐᑦ. ᑐᓂᓯᔪᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᖃᕆᑕᐅᔭᒃᑯᑦ ᐃᓕᓐᓂᐊᕐᓂᒃᑯᑦ - ᐱᕙᓪᓕᐊᑎᓪᓗᒍ ᐅᕝᕙᓘᓐᓃᑦ ᐃᖕᒥᖕᓂᑦ ᐱᕙᓪᓕᐊᓂᒃᑯᑦ, ᐅᖃᓘᑎᐊᓛᓄᑦ ᐃᓚᒋᔭᐅᔪᒃᑯᑦ, ᖃᕆᑕᐅᔭᒃᑯᑦ ᑐᑭᓕᐅᕈᑎᒃᑯᑦ, ᐊᒻᒪᓗ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᒃᑯᑦ.
• ᑲᑉᐳᔾᔭᓅᖅᑐᑦ ᐱᒻᒪᕆᐅᔪᑦ ᐱᖁᑎᐅᑉᓗᑎᒃ ᐊᒃᓱᕈᕐᓇᖅᑐᓂᒃ ᐱᑕᖃᖅᖢᓂ ᓲᕐᓗ ᐊᔪᕈᖕᓃᖅᓴᕆᐊᖃᕐᓂᖏᑦ ᐃᓕᓐᓂᐊᖅᑎᑦᑎᔩᑦ ᐊᑐᑦᑎᐊᕈᖕᓇᕐᓂᐊᕐᓗᑎᒃ ᑲᑉᐳᔾᔭᓅᖅᑐᓂᒃ; ᐱᓯᒪᓗᒋᑦ ᐊᒻᒪᓗ ᐊᓯᐊᓄᐊᖅᑎᕆᓂᖅ ᐃᓗᐊᓃᑦᑐᓂᒃ ᑐᙵᕕᐅᔪᑦ ᐊᑐᕈᖕᓃᕌᖓᑕ; ᑮᓇᐅᔭᖃᖅᑎᑕᐅᔭᕆᐊᖃᖅᖢᓂ, ᓈᒻᒪᒃᑐᒥᒃ ᐱᕕᖃᕐᓗᑎᒃ ᐊᒻᒪᓗ ᑲᑉᐳᔾᔭᓅᕈᑎᓂᒃ ᖃᐅᔨᒪᓂᖃᕐᓗᑎᒃ ᒪᓂᒪᑎᑕᐅᓗᑎᒃ ᐱᔭᐅᔭᕆᐊᖃᕌᖓᑕ. ᐱᒻᒪᕆᐅᔪᖅ ᑮᓇᐅᔭᖃᖅᑎᑕᐅᖃᑦᑕᕐᓂᖅ ᐋᖅᕿᒋᐊᖅᓯᒪᓗᓂ ᐊᔪᙱᓐᓂᐊᕐᓗᓂ ᐊᑑᑎᖃᖅᑐᓂᒃ ᐱᓕᕆᐊᕐᓄᑦ.
• ᐃᓱᒪᒋᔭᐅᔭᕆᐊᖃᖅᑐᑦ ᒐᕙᒪᑐᖃᒃᑯᓐᓂᑦ ᐊᑐᐊᒐᖅ ᐊᒻᒪᓗ ᖃᓄᐃᖓᓕᖅᑎᑦᑎᓂᖓᑦ ᐅᖃᐅᓯᕆᔭᐅᔪᓄᑦ; ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᖅ ᐱᑦᑕᐅᔪᖅ ᐱᒋᐊᕐᕕᐅᓗᓂ ᑭᓯᐊᓂ ᐱᑦᑕᐅᔪᑦ ᖃᓄᐃᖓᓕᖅᑎᑦᑎᓃᑦ ᐃᒃᐱᒋᔭᐅᖃᑦᑕᙱᑦᑐᑦ ᑕᒪᓗᒃᑖᕐᒥᑦ ᓄᓇᖃᖅᖄᖅᑐᑦ ᐃᓂᒋᔭᐅᔪᓂᑦ;
• ᐱᒻᒪᕆᐅᔪᖅ ᐃᓕᓐᓂᐊᖅᑎᑦᑎᔨᐅᔪᑦ ᐃᑲᔪᖅᑕᐅᖃᑦᑕᕐᓗᑎᒃ ᐊᒻᒪᓗ ᐱᕝᕕᐅᖃᑦᑕᖅᑐᑦ ᓴᖅᕿᑕᐅᓗᑎᒃ ᓄᓇᖃᖅᖄᖅᑐᑦ ᓄᓇᕐᔪᐊᕐᒥᑦ ᑕᐅᑐᒐᖏᑦᑎᒍᑦ, ᐅᖃᐅᓯᖏᑦᑎᒍᑦ ᐊᒻᒪᓗ ᖃᐅᔨᒪᓂᕆᔭᐅᔪᓂᑦ;
• ᐅᖃᐅᓯᖅ ᐱᖅᖁᓯᕆᔭᐅᔪᒦᑦᑐᖅ, ᐱᒻᒪᕆᐅᒋᔭᐅᔪᑦ ᐊᒻᒪᓗ ᐊᑐᖃᑦᑕᖅᑕᖏᑦ ᐃᓅᓯᖏᓐᓄᑦ; ᐊᑐᖅᑕᐅᔪᑦ ᐊᔾᔨᐅᖏᑦᑐᓕᐊᖑᓯᒪᔭᕆᐊᖃᖅᑐᑦ - ᐱᔪᖕᓇᐅᑎᖏᓐᓅᖓᓗᒋᑦ;
• ᐃᓚᓕᐅᑎᓗᒍ ᐅᖃᐅᓯᖅ ᐃᓕᓐᓂᐊᕈᑎᓗᒃᑖᓄᑦ ᐊᒻᒪᓗ ᓇᓂᓗᒋᑦ ᐊᔾᔨᒌᖕᓂᕆᔭᐅᔪᑦ ᐊᕕᒃᓯᒪᔪᓂᑦ, ᐱᔾᔪᑕᐅᔪᓂᒃ ᐊᑐᕐᓗᓂ ᐊᒻᒪᓗ ᐃᓚᓕᐅᑎᓗᒍ ᐅᖃᐅᓯᕐᒥᒃ ᐱᓯᒪᓂᕐᒧᑦ ᐊᒻᒪᓗ ᐱᔭᐅᓂᖓᓄᑦ;
• ᐃᓚᖏᑦ ᐃᓕᓐᓂᐊᕐᕖᑦ ᑕᐅᑐᒐᖃᕈᖕᓇᖅᑐᑦ ᐃᓕᓐᓂᐊᖅᑎᑦᑎᓂᕐᒥᒃ ᐅᖃᐅᓯᒃᑯᑦ ᐱᓕᕆᓂᕐᒧᑦ ᑭᑐᓗᒃᑖᑦ ᓇᒧᙵᐅᑎᙱᖔᕐᓗᒋᑦ ᐊᒻᒪᓗ ᐅᖃᐅᓯᖅ ᐃᓕᓐᓂᐊᖅᑎᑦᑎᔾᔪᑕᐅᓗᓂ. ᓄᓇᖃᖅᖄᖅᑐᓂᒃ ᐃᓕᓐᓂᐊᖅᑎᑦᑎᓂᕐᒧᑦ ᐱᓕᕆᐊᖃᖅᑐᓂᒃ ᐱᑕᖃᕆᐊᖃᖅᑐᖅ ᐅᖃᓪᓚᖃᑦᑕᖅᑐᓂᒃ ᐅᖃᐅᓯᕐᒥᑦ ᐊᒻᒪᓗ ᐃᓕᓐᓂᐊᖅᑎᑦᑎᔪᖕᓇᖅᑐᓂᒃ;
• ᐅᖃᐅᓯᕐᒥᒃ ᐸᕐᓇᐃᓂᖃᕐᓗᑎᒃ ᓄᓇᓕᖕᒥᑦ ᐱᒋᐊᕈᑕᐅᔪᖕᓇᖅᑐᖅ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᐊᒻᒪᓗ ᖃᐅᔨᑎᑦᑎᔪᖕᓇᖅᑐᖅ ᐱᕕᖃᖅᑎᑦᑎᓂᕐᓂᒃ ᐊᒻᒪᓗ ᐱᔭᕆᐊᖃᖅᖢᓂ ᐊᑭᐅᔪᓂᒃ ᖃᓄᐃᓕᐅᕈᑕᐅᓂᐊᖅᑐᓄᑦ ᐊᑐᓕᖅᑎᑕᐅᔭᕆᐊᖃᕐᓂᐊᖅᑐᓂᒃ. ᐅᖃᐅᓯᕐᒥᒃ ᖃᐅᔨᒪᓂᖃᑦᑎᐊᖅᑐᑦ ᐱᒻᒪᕆᐅᔪᑦ ᐱᒋᐊᖅᑎᑦᑎᓂᕐᒧᑦ ᓄᓇᓕᖕᓂᑦ;
• ᑮᓇᐅᔭᖃᖅᑎᑕᐅᓂᖅ ᐊᒻᒪᓗ ᐃᑲᔪᖅᑕᐅᓗᑎᒃ ᓄᓇᓖᑦ ᓯᕗᒻᒧᒃᑎᓐᓂᐊᕐᓗᒋᑦ ᐱᓕᕆᐊᕐᒥᑦ ᐱᓕᕆᐊᕐᒨᖓᔪᓄᑦ ᐋᖅᕿᐅᒪᔪᑦ ᐃᓚᓕᐅᑎᓯᒪᓂᖃᖅᑐᒃᑯᑦ ᐅᖃᐅᓯᕐᒧᑦ ᐸᕐᓇᐅᑎᒃᑰᖓᔪᒥᑦ ᑲᔪᓯᑏᓐᓇᕐᓂᐊᕐᓗᒍ ᐊᒻᒪᓗ ᐊᑭᓗᒃᑖᖏᓐᓄᑦ/ᑮᓇᐅᔭᖃᖅᑎᑕᐅᔪᒥᒃ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᐱᓕᕆᐊᒃᓴᖃᕐᓂᐊᕐᓗᓂ.

ᐅᑉᓗᖅ 3, ᑕᖅᑮᓐᓇᕐᔪᐊᖅ (ᔭᓄᐊᕆ) 27, 2021: ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔪᖅ

ᐱᖓᓱᐊᓂᑦ ᐅᑉᓗᕐᒥᑦ ᑲᑎᒪᓂᕐᒥᑦ ᐱᕕᖃᕈᖕᓇᓚᐅᖅᑐᑦ ᐃᓚᐅᖃᑕᐅᔪᑦ ᐃᓱᒪᒋᔭᖏᓐᓂᒃ ᑐᓂᓯᓗᑎᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔫᑉ ᒥᒃᓵᓄᑦ ᐊᒻᒪᓗ ᖃᐅᔨᓗᒋᑦ ᐊᔾᔨᒌᙱᓐᓂᐅᔪᓂᑦ ᓯᕗᓪᓕᖅᐸᐅᑎᔭᐅᔪᒪᔪᑦ ᐊᒻᒪᓗ ᐱᓕᕆᐊᖑᓂᐊᖅᑐᑦ ᐃᑲᔪᐃᓂᖃᕐᓗᑎᒃ ᐱᑕᖃᖅᑎᑦᑎᓗᓂ ᓈᒻᒪᒃᑐᒥᑦ, ᐊᔪᙱᓐᓂᐊᖅᑐᒥᒃ ᐊᒻᒪᓗ ᐊᑯᓂᐅᔪᒥᒃ ᑮᓇᐅᔭᖃᖅᑎᑕᐅᓂᕐᒥᒃ ᐅᑎᖅᑎᑎᕆᓂᕐᒧᑦ, ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ, ᐸᐸᓐᓂᐊᕐᓗᒍ ᐊᒻᒪᓗ ᓴᙱᒃᑎᑎᕐᓗᒍ ᓄᓇᖃᖅᖄᖅᑐᑦ ᐅᖃᐅᓯᖏᑦ.

ᑲᓇᑕᒥᑦ ᒐᕙᒪᒃᑯᑦ ᐊᑐᖅᑕᖏᓐᓂᒃ ᑐᓂᓯᖃᑦᑕᖅᑐᑦ ᐊᑐᓕᖅᑎᑕᐅᓂᖓᓄᑦ ᐱᖁᔭᖅ ᐱᓗᐊᖅᑐᒥᒃ ᐊᓯᐅᔨᑦᑕᐃᓕᓂᕐᒧᑦ, ᓴᖅᕿᔮᖅᑎᑦᑎᓂᕐᒧᑦ ᐊᒻᒪᓗ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᑦ. ᐱᕙᓪᓕᐊᔭᐅᓂᖓ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔪᖅ ᐊᑕᐅᑦᑎᒃᑯᑦ ᐱᓕᕆᐊᖑᕙᓪᓕᐊᔪᖅ ᐊᑐᖅᑕᐅᑉᓗᓂ ᐱᑖᖅᑐᕐᓂᕐᒧᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ. ᑐᓂᓯᓂᐊᖅᑐᖅ ᐊᑐᖅᑕᐅᓂᐊᖅᑐᒥᑦ ᓲᕐᓗ ᓄᓇᙳᐊᕐᒥᑦ ᑎᑭᐅᑎᓂᐊᕐᓗᒍ ᑐᕌᒐᐅᔪᖅ ᓴᖅᕿᑦᑎᓂᐊᕐᓗᓂ ᐱᓕᕆᐊᖑᔪᓂᒃ ᐱᑕᖃᖅᑎᑦᑎᓂᐊᖅᑐᒥᒃ ᓈᒻᒪᒃᑐᒥᑦ, ᐊᔪᙱᓐᓂᐊᖅᑐᒥᒃ ᐊᒻᒪᓗ ᐊᑯᓂᐅᔪᒥᒃ ᑮᓇᐅᔭᖃᖅᑎᑕᐅᓂᖓᓄᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ.

ᐅᑉᓗᖅ 3 ᐱᒋᐊᓚᐅᖅᑐᖅ ᑐᑭᓯᑎᑦᑎᑉᓗᓂ ᐅᖃᓪᓚᒃᖢᓂ ᑦᓵᕈᓪᔅ ᓯᓚᐅᐃ (Charles Slowey), ᒥᓂᔅᑕᐅᑉ ᑐᖏᓕᖓ, ᓄᓇᓕᖕᒧᑦ ᐊᒻᒪᓗ ᐃᓕᑕᖅᓯᓂᕐᒧᑦ ᐱᓕᕆᐊᓕᖕᓄᑦ ᑲᓇᑕᒥᑦ ᐱᖅᖁᓯᕆᔭᐅᔪᓕᕆᔨᒃᑯᓐᓂᑦ. ᐹᓪ ᐱᓚᑎᐄ (Paul Pelletier), ᐊᖓᔪᖅᖄᖅ ᓄᓇᖃᖅᖄᖅᑐᑦ ᐅᖃᐅᓯᓕᕆᔨᒃᑯᖏᓐᓂᑦ, ᑲᓇᑕᒥᑦ ᐱᖅᖁᓯᕆᔭᐅᔪᓕᕆᔨᒃᑯᓐᓄᑦ, ᐅᖃᐅᓯᖃᓚᐅᖅᑐᖅ ᑐᓴᖅᑕᐅᓚᐅᖅᑐᓂᒃ ᑮᓇᐅᔭᖃᖅᑎᑕᐅᓂᕐᒧᑦ ᐋᖅᕿᐅᒪᔪᒥᑦ ᐅᑭᐊᒃᓵᖓᓂᑦ 2020 ᐅᖃᖃᑎᖃᖅᖢᑎᒃ ᐊᑐᓕᖅᑎᑕᐅᓂᖓᑕ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᖅ.

ᐅᖃᓪᓚᖅᖄᖅᑎᓪᓗᒍ ᐊᒻᒪᓗ ᑕᑯᔭᒃᓴᐅᑎᓂᒃ ᑕᑯᑎᑦᑎᖅᖄᖅᑎᓪᓗᒍ ᐋᖅᕿᒃᓯᓚᐅᖅᑐᖅ ᐱᔾᔪᑕᐅᔪᒥᒃ ᐱᓕᕆᐊᖃᕐᓂᐊᕐᓂᖓᓂ ᐃᖢᐊᖅᓴᐃᔨ ᓕᐅᕆ ᑭᒧᕋ (Larry Kimura), ᓯᓚᑦᑐᖅᓴᕐᕕᒡᔪᐊᖅ ᕼᐊᐅᐊᐃ-ᒥᑦ, ᐊᒻᒪᓗ ᑐᑭᓯᑎᑦᑎᑉᓗᑎᒃ ᑕᒪᓗᒃᑖᕐᒧᑦ ᑲᑎᒪᔪᓂᒃ ᐱᖓᓱᐃᑦ ᐅᖃᓪᓚᒃᑎᐅᓂᐊᖅᑐᓂᒃ.

ᐱᔾᔪᑕᐅᔪᒥᒃ ᐅᖃᓪᓚᒃᑐᖅ ᐊᒻᒪᓗ ᑕᒪᓗᒃᑖᖅ ᑲᑎᒪᓂᖏᑦ ᑐᓂᓯᓚᐅᖅᑐᖅ ᐱᔪᒪᓕᖅᑎᑦᑎᓂᕐᒥᒃ ᐊᒻᒪᓗ ᐃᓗᐊᓃᑦᑐᓂᒃ ᐊᔾᔨᒌᙱᓐᓂᖏᑦᑎᒍᑦ ᐊᕕᒃᖢᑎᒃ ᑲᑎᒪᓂᕐᓂᒃ ᐅᖃᐅᓯᖃᕐᓂᐊᕐᓗᑎᒃ ᓇᓗᓇᐃᔭᖅᓯᒪᔪᒃᑯᑦ ᓯᕗᓪᓕᖅᐸᐅᑎᔭᐅᔭᕆᐊᓕᖕᓂᑦ ᐊᒻᒪᓗ ᐱᕙᓪᓕᐊᓂᕐᒥᒃ ᓄᑖᙳᖅᑎᖅᓯᒪᔪᒥᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔪᒥᒃ ᐊᑐᓕᕆᐊᖃᕐᒪᑕ. ᐱᖓᓱᐃᑦ ᐊᕕᒃᖢᑎᒃ ᑲᑎᒪᓃᑦ ᑐᕌᖓᓚᐅᖅᑐᑦ ᐃᖅᕿᓖᑦ ᓄᓇᖃᖅᖄᖅᑐᑦ ᐃᓅᖃᑎᒌᓄᑦ, ᐊᑕᐅᓯᖅ ᑲᑎᒪᓂᖅ ᐃᓄᖕᓄᑦ ᐊᒻᒪᓗ ᐊᑕᓯᐅᓯᖅ ᑲᑎᒪᓂᖅ ᒦᑏ ᐃᓅᖃᑎᒌᓄᑦ. ᐅᑉᓗᖅ 3 ᐃᓱᓕᓚᐅᖅᑐᖅ ᖃᐅᔨᑎᑕᓗᒃᑖᖅᖢᑎᒃ ᖃᓄᐃᖓᓂᐅᔪᑦ ᐅᖃᓪᓗᕆᒃᓴᐅᑎᓂᕐᓂᒃ ᐱᔭᐅᔪᓂᒃ ᐊᑐᓂ ᐊᕕᒃᓯᒪᑉᓗᑎᒃ ᑲᑎᒪᓂᕐᓂᑦ ᓇᐃᓈᖅᑎᖅᑕᐅᓚᐅᖅᑐᑦ ᐊᖏᓂᖅᓴᐅᔪᓄᑦ ᑲᑎᕐᒪᔪᓄᐊᕐᓂᐊᕐᓗᓂ.

ᐱᔾᔪᑕᐅᔪᒧᑦ ᐅᖃᓪᓚᒃᑎ, ᐃᖢᐊᖅᓴᐃᔨ ᓕᐅᕆ ᑭᒧᕋ (Larry Kimura), ᓇᐃᓈᖅᓯᒪᔪᒥᒃ ᑐᓂᓯᓚᐅᖅᑐᖅ ᐱᓕᕆᐊᖑᐊᓂᒃᑐᓂᒃ ᕼᐊᐅᐊᐃ-ᒥᑦ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᒧᑦ ᐊᒻᒪᓗ ᐊᒃᑐᖅᓯᓂᐅᔪᒥᒃ ᑮᓇᐅᔭᖃᖅᑎᑕᐅᓂᖓᓄᑦ ᐱᓕᕆᐊᖅ. ᐃᓕᓐᓂᐊᖅᑎᑦᑎᔨ ᑭᒧᕋ (Kimura) ᐅᖃᐅᑎᓚᐅᖅᑕᖏᑦ ᐃᓚᐅᖃᑕᐅᔪᑦ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᐊᕐᓗᓂ ᐱᓕᕆᐊᖑᔪᑦ ᐱᒋᐊᓚᐅᖅᑐᖅ ᑮᓇᐅᔭᖃᖅᑎᑕᐅᖏᖦᖢᓂ, ᑭᓯᐊᓂ ᐱᒻᒪᕆᐅᔪᒥᒃ ᐱᖅᖁᓯᕆᔭᐅᔪᒥᒃ ᐅᔾᔨᕈᓱᓕᕐᓂᖃᓕᖅᑎᓪᓗᒍᒥᑦ. ᐱᓕᕆᕙᓪᓕᐊᓕᓚᐅᖅᑐᑦ 1983-ᒥᑦ ᐃᓕᓐᓂᐊᓕᓵᕐᓂᐊᓵᖅᑐᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕈᑎᓂᒃ, ᑐᕌᒐᕆᔭᐅᑉᓗᓂ ᐅᑎᖅᑎᑦᑎᓗᓂ ᐅᖃᐅᓯᕐᒥᑦ ᓱᕈᓯᕐᓄᑦ. ᐊᓯᖏᑦ ᐃᓚᐅᑉᓗᑎᒃ, ᐃᓕᓐᓂᐊᖅᑎᑦᑎᔨ ᑭᒧᕋ (Kimura) ᓇᓂᓯᓚᐅᖅᑐᖅ ᐃᓂᐅᔪᒥᒃ ᐊᒻᒪᓗ ᐱᓕᕆᓂᐊᖅᑐᓂᒃ; ᐱᕝᕕᐅᖃᑦᑕᖅᑐᑦ ᓇᓂᔭᐅᓚᐅᖅᑐᑦ ᓄᓇᓕᖕᒥᑦ. 1987-ᒥᑦ, ᐆᒃᑑᑎᖃᕐᓂᕐᒧᑦ ᑐᕌᖓᔪᒥᒃ ᐋᖅᕿᒃᓯᓚᐅᖅᑐᑦ ᐃᓕᓐᓂᐊᖅᑎᑕᐅᓂᐊᕐᓗᑎᒃ ᐃᓕᓐᓂᐊᓕᓵᖅᑐᓂᑦ ᖁᑦᑎᖕᓂᓖᑦ 12-ᒧᑦ ᕼᐊᐅᐊᐃ-ᒥᑦ; ᑐᕌᒐᐅᔪᖅ ᓴᖅᕿᑦᑎᓂᐊᕐᓗᑎᒃ ᓄᑖᓂᒃ ᐅᖃᓪᓚᖃᑦᑕᖅᑐᓂᒃ ᐅᖃᐅᓯᕐᒥᑦ. 40 ᐅᑭᐅᑦ ᐊᓂᒍᖅᑎᓪᓗᒋᓪᓘᓐᓃᑦ ᐱᕙᓪᓕᐊᓂᕐᒥᑦ ᐊᒻᒪᓗ ᐊᒃᓱᕈᖅᖢᑎᒃ ᐱᓕᕆᐊᖑᔪᒧᑦ, ᑐᓗᖅᑕᕈᑏᑦ ᑕᐃᒪᐅᔪᑦ ᓱᓕ, ᐆᒃᑑᑎᒋᓗᒍ, ᑮᓇᐅᔭᖃᖅᑎᑕᐅᖏᓐᓇᕐᓂᖅᑕᖃᙱᑦᑐᖅ ᓱᓕ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᐱᔭᒃᓴᐅᑎᓄᑦ.

ᐱᐊᓂᑦᑎᐊᖅᓯᒪᓂᖃᕈᑕᐅᔪᖕᓇᖅᑐᖅ, ᐅᖃᕐᓂᖓᑐᑦ ᐃᓕᓐᓂᐊᖅᑎᑦᑎᔨ ᑭᒧᕋ (Kimura), ᐱᔭᐅᓚᐅᖅᑐᖅ ᓄᑕᖅᖃᐃᑦ ᐃᓕᓐᓂᐊᖅᑐᑦ ᐅᖃᐅᓯᕐᒥᒃ ᐃᓕᓐᓂᐊᓕᓵᕐᓂᐊᓵᖅᑐᓂᑦ ᐃᓐᓇᕐᓂᒃ ᐃᓕᓐᓂᐊᕈᒪᓕᖅᑎᑦᑎᓂᖃᓚᐅᖅᑐᖅ ᐅᖃᐅᓯᕐᒥᑦ. ᐱᔪᒪᓂᖃᕐᓂᖅ ᐃᓚᐅᓂᐊᕐᓗᓂ ᐊᒻᒪᓗ ᐱᓇᓱᒡᓗᓂ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᐃᓅᑉ ᓇᖕᒥᓂᖅ ᐅᖃᐅᓯᖓᓂᑦ ᐊᒻᒪᓗ ᐱᖅᖁᓯᖓᓂᑦ ᐱᒻᒪᕆᐅᑦᑎᐊᖅᑐᖅ ᐊᒻᒪᓗ ᐊᑐᖅᑕᐅᓯᒪᔪᑐᑦ ᕼᐊᐅᐊᐃ-ᒥᑦ, ᑖᑉᑯᓇᙵᑦ ᓄᑕᖅᖃᓂᙶᓚᐅᖅᑐᖅ.

ᐃᓕᓐᓂᐊᖅᑎᑦᑎᔨ ᑭᒧᕋ (Kimura) ᖃᐅᔨᓚᐅᖅᑐᖅ ᒪᕐᕉᒃ ᐊᑐᖅᑕᐅᔪᖕᓇᖅᑐᓂᒃ ᐱᔭᐅᔪᒪᔪᓂᒃ ᐊᑕᐅᑦᑎᒃᑯᑦ ᐃᑲᔪᕐᓂᐊᕐᓗᓂ ᑎᑭᐅᑎᔭᐅᓂᖓ ᑐᕌᒐᐅᔫᑉ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᕼᐊᐅᐊᐃ-ᑉ ᐅᖃᐅᓯᖓᓂᒃ. ᓯᕗᓪᓕᖅ, “ᖁᒻᒧᖓᔪᒥᒃ”, ᐃᒪᓐᓇ, ᑲᑎᖅᓱᐃᓗᑎᒃ ᐅᖃᓪᓚᒃᑎᐅᔪᓂᒃ ᐃᓕᓐᓂᐊᖅᑎᓄᑦ ᓱᕈᓯᕐᓂᑦ ᒪᒃᑯᖕᓂᖅᓴᓄᑦ ᐃᓐᓇᕐᓄᑦ, ᑭᖑᓂᐊᒍᑦ “ᓴᓂᒨᖓᓗᓂ”, ᑐᑭᖃᖅᑐᖅ ᐃᓚᓯᒃᑲᓐᓂᕐᓗᓂ ᓄᑖᓂᒃ ᐃᓄᖕᓂᒃ (ᐊᖓᔪᖅᖄᕆᔭᐅᔪᓂᒃ, ᓄᓇᓕᖕᒥᙶᖅᑐᓂᒃ) ᐅᖃᓪᓚᒃᑎᐅᓗᑎᒃ.

ᐊᐱᕆᔭᐅᖕᒪᑦ ᐅᖃᐅᔾᔨᓂᕆᔭᖓᓂᒃ ᖃᓄᐃᑦᑐᒥᒃ ᑮᓇᐅᔭᖃᖅᑎᑕᐅᓂᕐᒧᑦ ᐋᖅᕿᐅᒪᔪᖅ ᐊᔪᙱᓐᓇᔭᕐᒪᖔᑦ, ᐃᓕᓐᓂᐊᖅᑎᑦᑎᔨ ᑭᒧᕋ (Kimura) ᐅᖃᓚᐅᖅᑐᖅ ᑐᕌᒐᐅᔪᑦ ᖃᐅᔨᔭᐅᖅᖃᐅᑕᐅᔭᕆᐊᖃᖅᑐᖅ. ᑮᓇᐅᔭᖃᖅᑎᑕᐅᓂᕐᒥᒃ ᐱᓕᕐᓗᑎᒃ ᑎᑭᐅᑎᓂᐊᕐᓗᒍ ᑐᕌᒐᐅᔪᖅ.

ᔫᓕ ᑕᑉᕈᓯᓐ (Julie Dabrusin), ᒪᓕᒐᓕᐅᕐᕕᒡᔪᐊᕐᒥᑦ ᑎᑎᕋᖅᑎ ᒥᓂᔅᑕᒧᑦ ᑲᓇᑕᒥᑦ ᐱᖅᖁᓯᕆᔭᐅᔪᓕᕆᔨᒃᑯᓐᓄᑦ, ᑲᒪᒋᓚᐅᖅᑕᖏᑦ ᑲᑎᒪᔪᓗᒃᑖᑦ, ᑐᕌᒐᖃᖅᖢᓂ ᑐᓂᓯᓂᐊᕐᓗᓂ ᐊᔾᔨᐅᖏᑦᑐᒥᙶᖅᑐᒥᑦ ᑕᐅᑐᒐᐅᔪᓂᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔪᒧᑦ. ᐱᖓᓱᐃᑦ ᑲᑎᒪᖃᑕᐅᔪᑦ ᑐᓂᓯᓚᐅᖅᑐᑦ ᐊᔾᔨᒌᙱᑦᑑᑎᓂᒃ ᑕᐅᑐᒐᕆᔭᖏᓐᓂᒃ ᓴᖅᕿᑦᑎᔪᒪᑉᓗᑎᒃ ᐊᑕᐅᓯᐅᖓᔪᒥᒃ ᑭᒡᓕᐅᔪᒥᒃ ᐃᑲᔪᕐᓂᐊᕐᓗᒋᑦ ᐃᓚᐅᖃᑕᐅᔪᑦ ᐊᕕᒡᓗᑎᒃ ᑲᑎᒪᑎᓪᓗᒋᑦ ᐅᖃᓪᓗᕆᒃᓴᐅᑕᐅᓂᐊᖅᑐᓂᒃ ᑭᖑᓂᐊᒍᑦ ᐱᓕᕆᐊᖑᓚᐅᖅᖢᑎᒃ.

ᓯᕗᓪᓕᖅ ᑲᑎᒪᔨ, ᒥᐊᓕ ᔭᐃᓐ ᓅᕆᔅ (Mary Jane Norris), Norris Research Inc.,-ᑯᓐᓂᑦ, ᐅᖃᖅᑐᖅ, ᐱᔾᔪᑎᒋᑉᓗᒋᑦ ᐅᖃᐅᓯᕆᔭᐅᔪᓂᒃ ᓇᓗᓇᐃᖅᓯᔾᔪᑏᑦ, ᑭᖑᕚᕇᒃᑐᑦ ᑐᓂᐅᑎᔭᐅᓂᖏᑦ ᓄᓇᖃᖅᖄᖅᑐᒥᑦ ᐊᓈᓇᐅᔫᑉ ᐅᖃᐅᓯᖓᓂᑦ ᐊᑯᓂᐅᔪᒥᑦ ᐊᓯᐅᔨᕙᓪᓕᐊᓯᒪᔪᖅ. ᐊᓯᐅᔨᕙᓪᓕᐊᓂᖅ ᐊᑐᖅᑕᐅᓂᖓ ᓄᓇᖃᖅᖄᖅᑐᑦ ᐅᖃᐅᓯᖏᑦ ᑲᓇᑕᒥᑦ ᐅᖃᐅᓯᕆᔭᐅᓗᐊᖅᑐᑦ ᐊᖏᕐᕋᕆᔭᐅᔪᒥᑦ ᐃᑲᔪᐃᓯᒪᔪᖅ ᑐᓂᐅᑎᒋᔭᐅᖃᑦᑕᙱᓐᓂᖓᓄᑦ ᐊᒻᒪᓗ ᐃᓐᓇᕈᖅᐸᓪᓕᐊᓂᖏᓐᓄᑦ ᐅᖃᐅᓯᖃᖅᑐᑐᖃᐃᑦ. ᐱᖃᑖᒍᖔᖅ ᐊᓯᐅᕙᓪᓕᐊᔪᖅ ᐅᖃᐅᓯᑐᖃᕆᔭᐅᔪᒥᒃ ᑐᓂᓯᓂᕐᒧᑦ, ᖃᓄᐃᓕᐅᕐᓂᕆᔭᖓ ᐊᖏᒡᓕᕙᓪᓕᐊᔪᒥᒃ ᑕᑯᒃᓴᐅᔪᖅ ᐃᓕᑉᐸᓪᓕᐊᓂᖏᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᑐᒡᓕᕆᔭᖓᑐᑦ ᐅᖃᐅᓯᐅᑉᓗᓂ. ᐊᖏᕐᕋᒥᑦ ᐅᖃᐅᓯᖅ ᐊᑐᖅᑕᐅᕙᓪᓕᐊᓂᖓ ᐊᖏᒡᓕᒋᐊᓚᐅᖅᑐᖅ 73%-ᒥᑦ 2016-ᒥᑦ, ᐱᔾᔪᑕᐅᑉᓗᓂ ᐅᖃᐅᓯᑐᖃᖏᓐᓂᒃ ᑐᒡᓕᐊ ᐅᖃᐅᓯᕆᔭᖅᑐᑦ ᐊᑐᖅᑕᐅᖃᑦᑕᕐᓂᖓᓄᑦ ᐊᖏᕐᕋᖏᓐᓂᑦ. ᓇᓗᓇᐃᒃᑯᑦᑎᖅᓯᒪᔪᓂᒃ ᐊᔾᔨᒌᙱᓐᓂᖅᑕᖃᖅᑐᖅ ᐅᖃᐅᓯᐅᑉ ᖃᓄᐃᖓᓂᕆᔭᖓᓄᑦ ᐊᔾᔨᒌᙱᑦᑐᑦ ᐃᖅᕿᓖᑦ ᓄᓇᖅᖃᑎᒌᓂᑦ, ᐃᓄᖕᓂᑦ ᐊᒻᒪᓗ ᒦᑏᓂᑦ ᒪᓕᒃᖢᒋᑦ ᓄᓇᐅᑉ ᐃᓂᒋᔭᖓ. ᐅᖃᐅᓯᐅᑉ ᖃᓄᐃᖓᓂᕆᔭᖓ ᐱᔾᔪᑕᐅᖃᑕᐅᔪᖅ ᐊᖏᕐᕋᕆᔭᐅᔪᒥᑦ ᐊᒻᒪᓗ ᐱᑦᑕᐅᓂᖅᓴᐅᓚᐅᖅᑐᑦ ᓄᓇᓕᐊᓛᖑᓂᖅᓴᐅᔪᓂᑦ ᐊᒻᒪᓗ ᐃᖅᕿᓖᑦ ᓄᓇᒋᔭᖓᓐᓂᑦ ᐃᓄᒃᑕᖃᐅᕐᓂᖅᓴᐅᔪᓂᑦ ᓲᕐᓗ ᓄᓇᓕᐸᐅᔭᓂᑦ. ᖃᐅᔨᔭᐅᔪᓂᑦ, ᐊᑐᐊᒐᕐᒧᑦ ᐊᒃᓱᕈᕐᓇᕈᑕᐅᔪᑦ ᑐᓂᔭᐅᓚᐅᖅᑐᖅ: ᐱᓕᕆᐊᖑᓂᖓ ᐊᒻᒪᓗ ᐆᒻᒪᖅᑎᑕᐅᒃᑲᓐᓂᕐᓂᖓ ᓄᓇᖃᖅᖄᖅᑐᑦ ᐅᖃᐅᓯᖏᑦ ᐃᓄᖃᐅᕐᓂᖅᓴᐅᔪᓂᑦ ᓲᕐᓗ ᓄᓇᓕᐸᐅᔭᕐᓂᑦ.

ᑐᒡᓕᐊᓂᑦ, ᐊᓗᑭ ᑰᑦᑎᖅ, ᐊᖓᔪᖅᖄᖅ ᓄᓇᕗᑦ ᑐᙵᕕᒃᑯᓐᓄᑦ, ᐅᖃᓚᐅᖅᑐᖅ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔪᑦ ᐊᑐᒐᒃᓴᐅᑕᐅᓚᐅᖅᑐᑦ ᐊᒻᒪᓗ ᐃᓱᓕᔾᔪᑕᐅᑉᓗᑎᒃ. ᒐᕙᒪᑐᖃᒃᑯᑦ ᖃᐅᔨᒪᔪᖅ ᖃᓄᖅ ᐊᑑᑎᖃᖅᑎᑦᑎᐊᕈᖕᓇᕐᒪᖔᔾᔪᑦ ᐅᖃᐅᓯᓕᕆᓂᕐᒧᑦ ᑮᓇᐅᔭᖃᖅᑎᑦᑎᓂᖅ ᐱᓕᕆᐊᕆᖃᑦᑕᕐᒪᔾᔪᒃ ᐊᑐᖅᑕᐅᔪᑦ ᐅᖃᐅᓰᑦ (ᖃᑉᓗᓈᑎᑐᑦ ᐊᒻᒪᓗ ᐅᐃ-ᐅᐃ-ᑎᑐᑦ) ᐊᒥᓲᙱᓐᓂᖅᓴᐅᔪᓕᕆᓂᕐᓂᑦ. ᒪᓕᒐᓕᐅᕆᓂᖅ ᐊᑐᖅᑕᐅᔪᒃᓴᐅᑕᐅᔪᖅ. ᐊᓗᑭ ᑰᑦᑎᖅ ᐅᖃᓚᐅᖅᑐᖅ ᑲᓇᑕᐅᑉ ᐱᒻᒪᕆᐅᒋᔭᖏᑦ ᒪᕐᕉᒃ (2) ᐃᓂᓕᐅᕆᓂᕐᒧᑦ ᐅᖃᐅᓰᒃ ᐃᓄᒃᑎᑐᒻᒥᐅᖓᓂᑦ. ᐆᒃᑑᑕᐅᑉᓗᓂ ᑮᓇᐅᔭᖃᖅᑎᑦᑎᓂᕐᒧᑦ, ᐅᖃᖅᑐᖅ ᑲᑕᒑᕆᕝᕕᒃ (ᓄᕕᐱᕆ) 9, 2020-ᒥᑦ, ᑮᓇᐅᔭᖅᑖᖅᑎᑕᐅᓚᐅᖅᑐᑦ ᐊᖏᒡᓕᒋᐊᕐᓂᐊᕐᓗᒋᑦ ᐅᐃ-ᐅᐃ ᐃᓕᓐᓂᐊᕐᕕᖏᑦ ᓄᓇᕗᒻᒥᑦ ᐃᓄᒃᑎᑐᑦ ᐅᖃᓪᓚᒃᑏᑦ ᐊᒥᓲᓂᖅᓴᐅᒐᓗᐊᖅᑎᓪᓗᒋᑦ ᓄᓇᕗᒻᒥ ᐊᒻᒪᓗ ᖃᑉᓗᓈᑎᑐᑦ ᐊᒻᒪᓗ ᐅᐃ-ᐅᐃ-ᑎᑐᑦ ᐅᖃᓪᓚᒃᑏᑦ ᐊᒥᓲᙱᓐᓂᖅᓴᐅᔪᑦ.

ᒫᒃ ᓕᒃᓕᐅ (Marc Leclair) ᒦᑏ ᓄᓇᖅᖃᑎᒌᑦ ᑲᑎᒪᔨᖏᓐᓂᑦ, ᐅᖃᖅᑐᖅ ᒦᑏ ᓄᓇᖅᖃᑎᒌᑦ ᑲᓇᑕᐅᑉ ᐊᖓᔪᖅᖄᕐᔪᐊᖓᓂᑦ ᐱᓂᐊᕐᓂᓕᐅᖁᔨᓚᐅᖅᑐᑦ ᐊᓯᐅᔨᑦᑕᐃᓕᑎᑦᑎᓂᕐᒧᑦ ᐊᒻᒪᓗ ᓴᖅᕿᔮᖅᑎᑕᐅᓂᖓᑕ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᑦ. ᒦᑏ ᓄᓇᖅᖃᑎᒌᑦ ᖃᐅᔨᑎᑦᑎᓚᐅᖅᑐᑦ ᐃᑲᔪᖅᑐᕐᓂᐊᖏᒻᒪᔾᔪᒃ ᐱᖁᔭᒃᓴᖅ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᕐᒧᑦ ᑮᓇᐅᔭᖃᖅᑎᑕᐅᓂᖅ ᐃᓚᐅᑎᑕᐅᓂᐊᖏᑉᐸᑦ. ᐊᓯᐊᒍᖔᕐᓗᒍ ᒫᓐᓇᐅᔪᖅ ᑮᓇᐅᔭᖃᖅᑎᑕᐅᓂᕐᒧᑦ ᐋᖅᕿᐅᒪᔪᖅ, MNC-ᑯᑦ ᑐᒃᓯᕋᖅᑐᑦ ᓄᓇᖅᖃᑎᒌᒥᑦ-ᓄᓇᖅᖃᑎᒌᒧᑦ, ᐊᔾᔨᒌᙱᓐᓂᖏᑦᑎᒎᖓᔪᒃᑯᑦ ᐊᑐᖅᑕᐅᒃᐸᑦ ᐊᓯᐊᙳᖅᓯᓇᔭᖅᑐᖅ ᐋᖅᕿᐅᒪᔪᒥᑦ. ᑐᒃᓯᕋᐅᑎᓕᐅᕆᓂᒃᑯᑦ ᐱᓕᕆᐊᖑᖅᖃᐅᑕᐅᓚᐅᖅᑐᖅ ᐊᔪᓚᐅᖅᑐᖅ. ᒦᑏ ᓄᓇᖅᖃᑎᒌᑦ 5%-ᑐᐃᓐᓇᖓᓂᒃ ᑮᓇᐅᔭᖃᖅᑎᑕᐅᓂᕐᒥᑦ ᐱᓚᐅᖅᑐᑦ, ᑭᒡᒐᖅᑐᐃᒐᓗᐊᖅᑎᓪᓗᒋᑦ 25%-ᖑᔪᓂᒃ ᓄᓇᖃᖅᖄᖅᑐᓂᒃ ᐃᓄᖕᓂᑦ. ᐱᒡᒎᖕᓂᖃᖅᑕᐃᓕᔪᒪᖕᒥᔪᑦ ᐊᓯᖏᓐᓂᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ. ᑮᓇᐅᔭᖃᖅᑎᑕᐅᓂᕐᒧᑦ ᐋᖅᕿᐅᒪᔪᖅ ᐱᓕᕆᐊᕐᒨᖓᔭᕆᐊᖃᙱᑦᑐᖅ. ᒫᒃ ᓕᒃᓕᐅ (Marc Leclair) ᐅᖃᖅᑐᖅ ᐊᑐᖅᑕᐅᕙᓚᐅᖅᑐᑦ ᐊᔪᓚᐅᖅᑐᑦ ᐱᓕᕆᐊᕆᓂᐊᕐᓗᒋᑦ ᐱᒻᒪᕆᐅᓂᖓᑕ ᐊᓯᐅᔨᔭᐅᕙᓪᓕᐊᓂᖓ ᒥᑦᓯᕝ (Michif) ᐅᖃᐅᓯᖅ. ᐊᑯᓂᐅᔪᒥᑦ, ᓇᓚᐅᑦᑖᖅᑕᐅᔪᖕᓇᖅᑐᒥᒃ ᑮᓇᐅᔭᖃᖅᑎᑕᐅᓂᖅ ᐱᔭᕆᐊᖃᖅᑐᖅ ᐃᓂᓕᐅᕆᓂᐊᕐᓗᓂ; ᐅᖃᖅᖢᓂ ᑐᕌᒐᐅᔪᖅ ᐱᕙᓪᓕᐊᓂᕐᒧᑦ ᖁᓕᓂᑦ ᐅᑭᐅᓄᑦ ᐊᑐᕐᓂᐊᖅᑐᒥᒃ ᐅᖃᐅᓯᕐᓄᑦ ᒪᓕᒃᖢᒋᑦ ᑲᓇᑕ-ᒦᑏ ᓄᓇᖅᖃᑎᒌᑦ ᐊᖏᖃᑎᒌᒍᑎᖓᑦ.

ᐅᖃᓪᓗᕆᒃᓴᐅᑎᓂᕐᓂᑦ ᐱᖓᓱᐃᑦ (3) ᐊᔾᔨᒌᙱᑦᑐᒃᑰᖓᔪᒥᑦ ᐊᕕᒃᑐᖅᓯᒪᑉᓗᑎᒃ, ᐃᓚᐅᖃᑕᐅᔪᑦ ᖃᐅᔨᑎᑦᑎᓚᐅᖅᑐᑦ ᑕᐅᑐᒐᖏᓐᓂᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔪᒧᑦ.

ᐃᖅᕿᓖᑦ ᓄᓇᖅᖃᑎᒌᑦ ᑕᐅᑐᒐᖏᑦᑎᒍᑦ, ᓇᓗᓇᓚᐅᖏᑦᑐᑦ ᖃᖓᒃᑯᑐᐃᓐᓇᖅ, ᐊᔪᙱᓐᓂᐊᖅᑐᒥᒃ ᐊᒻᒪᓗ ᐊᑯᓂᐅᔪᒥᒃ ᑮᓇᐅᔭᖃᖅᑎᑕᐅᓂᖅ ᐱᒻᒪᕆᐅᔪᖅ ᐱᕈᐃᓂᖅ ᐊᒻᒪᓗ ᑲᒪᒋᔭᐅᓂᖓ ᑲᔪᓯᓂᐊᕐᓗᓂ. ᐃᖅᕿᓖᑦ ᓄᓇᖅᖃᑎᒌᑦ ᐃᒃᐱᒍᓱᓚᐅᕐᒥᔪᑦ ᑮᓇᐅᔭᖃᖅᑎᑕᐅᓂᖅ ᓈᒻᒪᒃᑑᔭᕆᐊᖃᖅᑐᖅ ᑎᑭᐅᑎᓂᐊᕐᓗᑎᒃ ᐱᔭᐅᔭᕆᐊᓕᖕᓄᑦ ᓄᓇᓕᖕᓂᑦ ᓄᓇᓖᑦ ᐊᓯᖏᓐᓄᑦ ᓄᓇᓕᖕᓄᑦ ᐱᒡᒎᖕᓂᖃᕐᓂᐊᖏᒻᒪᑕ. ᐃᓚᐅᖃᑕᐅᔪᑦ ᐅᖃᒃᑲᓐᓂᓚᐅᖅᑐᑦ ᐱᒻᒪᕆᐅᓂᖓᑕ ᐱᓕᕆᖃᑎᒌᒡᓗᑎᒃ ᐊᔾᔨᒌᙱᑦᑐᑦ ᓄᓇᓖᑦ ᐊᒻᒪᓗ ᐅᖃᐅᓯᓕᕆᓂᕐᒧᑦ ᑲᑎᕐᒪᔪᑦ ᐊᖏᓂᖅᓴᐅᔪᒃᑯᑦ ᖃᓄᖅᑑᕆᓂᒃᑯᑦ. ᐱᒻᒪᕆᐅᔪᖅ ᓱᓇᑐᐃᓐᓇᐃᑦ ᓄᑖᖑᔪᑦ ᐋᖅᕿᐅᒪᔪᑦ ᐱᕙᓪᓕᐊᔭᐅᓗᑎᒃ ᐱᓕᕆᖃᑎᒋᔭᑐᐊᕆᓗᒋᑦ ᓄᓇᓖᑦ. ᑮᓇᐅᔭᖃᖅᑎᑕᐅᓂᖅ ᐃᑲᔪᖅᑐᐃᔭᕆᐊᖃᖅᑐᖅ ᓴᖅᕿᑦᑎᓂᕐᒧᑦ ᐊᒻᒪᓗ ᐱᓕᕆᐊᖑᓗᓂ ᑭᖑᕚᕆᔭᐅᔪᓄᑦ ᑐᓂᔭᐅᓂᖓᓄᑦ ᐅᖃᐅᓯᖅ.

ᐃᓄᐃᑦ ᑕᐅᑐᒐᖏᑦᑎᒍᑦ, ᐃᓚᖏᑦ ᐃᓄᐃᑦ ᓴᖅᕿᑦᑎᓯᒪᔪᑦ ᓇᖕᒥᓂᖅ ᑐᕌᖓᔪᓕᐊᖏᓐᓂᒃ ᐊᒻᒪᓗ ᐅᖃᐅᓯᓕᕆᓂᕐᒧᑦ ᐊᑐᖅᑕᐅᔪᓂᒃ, ᑭᓯᐊᓂ, ᐊᑯᓂᐅᔪᒥᒃ ᑮᓇᐅᔭᖃᖅᑎᑕᐅᔭᕆᐊᖃᖅᑐᑦ ᐊᔪᙱᓐᓂᐊᖅᑐᒥᒃ ᓄᓇᓖᑦ ᑮᓇᐅᔭᖃᖅᑎᑕᐅᓂᕐᒧᑦ ᕿᓂᖅᓴᐃᓇᓱᑐᐃᓐᓇᕐᓂᐊᖏᒻᒪᑕ. ᐃᓄᐃᑦ ᐃᓚᐅᖃᑕᐅᔪᑦ ᐅᖃᓪᓗᕆᒃᓴᐅᑎᖃᖁᔨᔪᑦ ᑮᓇᐅᔭᖃᖅᑎᑕᐅᓂᕐᒧᑦ ᐋᖅᕿᐅᒪᔪᒥᒃ ᓯᑕᒪᐅᔪᓄᑦ ᐃᓄᐃᑦ ᓇᖕᒥᓂᖅ ᓄᓇᑖᕐᕕᐅᓯᒪᔪᓄᑦ.

ᒦᑏ ᓄᓇᖅᖃᑎᒌᑦ ᐱᔭᕆᐊᖃᖅᑐᑦ ᓄᓇᖅᖃᑎᒌᒥᑦ-ᓄᓇᖅᖃᑎᒌᒧᑦ, ᐊᔾᔨᒌᙱᓐᓂᖃᖅᑐᒃᑰᖓᔪᒥᒃ ᐱᒋᐊᖅᑎᓐᓂᐊᕐᓗᒋᑦ ᒦᑏ ᓄᓇᖅᖃᑎᒌᑦ ᓄᓇᓕᖏᑦ ᐋᖅᕿᒃᓯᓗᑎᒃ ᑐᕌᖓᔪᓂᒃ ᐊᑐᕐᓗᒋᑦ ᓇᖕᒥᓂᖅ ᐱᔭᕆᐊᖃᖅᑕᖏᑦ. ᑐᒃᓯᕋᖅᑐᑦ ᐅᑯᓂᙵᑦ ᐊᒻᒪᓗ ᐊᑯᓂᐅᔪᒦᑦᑕᕆᐊᖃᖅᑐᒥᒃ, ᐊᔪᙱᓐᓂᐊᖅᑐᒥᒃ ᐊᒻᒪᓗ ᐊᔾᔨᒌᙱᓐᓂᑰᖓᔪᒥᑦ ᐱᕝᕕᐅᖃᑦᑕᕈᖕᓇᖅᑐᒥᑦ.

ᐅᑉᓗᖅ 3 ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᕿᐅᒪᔪᒧᑦ ᐱᔭᐅᓗᐊᓚᐅᖅᑐᑦ

• ᐊᒥᓱᑦ ᐃᓚᐅᖃᑕᐅᔪᑦ (ᐃᖅᕿᓖᑦ ᓄᓇᖅᖃᑎᒌᑦ, ᐃᓄᐃᑦ ᐊᒻᒪᓗ ᒦᑏ) ᐅᖃᖅᑐᑦ ᒫᓐᓇᐅᔪᖅ ᑮᓇᐅᔭᖃᖅᑎᑕᐅᓂᖅ ᓈᒻᒪᙱᑦᑐᖅ ᐊᒻᒪᓗ ᐊᔾᔨᒋᔭᕆᐊᖃᖅᑕᖓ ᑮᓇᐅᔭᖃᖅᑎᑦᑎᓂᕐᒧᑦ ᖃᑉᓗᓈᑎᑑᖅᑐᓄᑦ ᐊᒻᒪᓗ ᐅᐃ-ᐅᐃ-ᑎᑑᖅᑐᓄᑦ. ᑐᒃᓯᕋᐅᓯᐅᕆᓂᕐᒥᑦ ᐊᑐᙱᑦᑕᕆᐊᖃᖅᑐᑦ ᐊᔾᔨᐅᖏᑦᑐᒃᑰᖓᔪᒃᑰᕐᓂᐊᕐᓗᓂ, ᖃᖓᒃᑯᑐᐃᓐᓇᖅ, ᓇᓚᐅᑦᑖᖅᑕᐅᔪᖕᓇᖅᑐᒃᑯᑦ ᐊᒻᒪᓗ ᐊᑯᓂᐅᔪᒥᑦ ᑮᓇᐅᔭᖃᖅᑎᑕᐅᓂᕐᒧᑦ ᐋᖅᕿᐅᒪᔪᒥᑦ ᐃᑲᔪᖅᑐᒥᒃ ᐊᔾᔨᐅᖏᑦᑐᓂᒃ ᐱᔭᐅᔭᕆᐊᓕᖕᓄᑦ. ᑮᓇᐅᔭᖃᖅᑎᑦᑎᓂᕐᒧᑦ ᐊᑐᖅᑕᐅᔪᖅ ᐃᑲᔪᖅᑕᐅᓂᖃᕆᐊᖃᖅᑐᖅ ᓄᓇᓕᖕᒥᑦ ᐱᐅᓛᑦ ᐊᑐᖅᑕᐅᖃᑦᑕᖅᑐᓄᑦ ᐊᒻᒪᓗ ᓄᓇᓖᑦ ᑐᑭᓕᐅᕆᔪᖕᓇᕆᐊᖃᖅᑐᑦ ᓱᓇᐃᑦ ᐱᐊᓂᑦᑎᐊᖅᓯᒪᔪᑦ ᖃᓄᖅ ᑕᐅᑦᑐᖃᕐᓂᖏᓐᓄᑦ.
• ᐃᖢᐊᖅᓴᐃᔨ ᓕᐅᕆ ᑭᒧᕋ (Larry Kimura) ᐅᖃᓚᐅᖅᑐᖅ ᕼᐊᐅᐊᐃᒥᑦ, ᑐᕌᒐᕆᓚᐅᖅᑕᖓᑦ ᐅᖃᐅᓯᖓᑦ ᐅᑎᖅᑎᓪᓗᒍ, ᑮᓇᐅᔭᖃᖅᑎᑕᐅᓂᕐᒥᐅᖏᑦᑐᖅ. ᐱᒻᒪᕆᐅᓚᐅᖅᑐᖅ ᑮᓇᐅᔭᖃᖅᑎᑕᐅᓂᖅ ᖃᓄᐃᓕᐅᖅᑎᑦᑎᔪᖕᓇᓚᐅᖏᒻᒪᑦ ᐱᓕᕆᐊᕆᔪᒪᔭᖓᑦ ᐱᓕᕆᐊᕆᓂᐊᕐᓗᒍ. ᐅᖃᐅᓯᖓᑦ ᓱᕈᓰᑦ ᖃᓂᖏᓐᓄᐊᕆᐊᖃᓚᐅᖅᑕᖓᑦ, ᓴᖅᕿᑦᑎᓂᐊᕐᓗᑎᒃ ᓄᑖᓂᒃ ᑭᖑᕚᕆᔭᐅᔪᓂᒃ ᐅᖃᓪᓚᒃᑎᓂᒃ;
• ᐃᓄᓗᒃᑖᓂᒃ ᖃᐅᔨᓴᐃᓂᕐᒧᑦ ᓈᓴᐅᑏᑦ/ᑎᑎᖅᖃᐃᑦ ᑕᑯᒃᓴᐅᑎᑦᑎᔪᑦ ᐊᑐᐊᒐᒧᑦ ᐊᒃᓱᕈᕐᓇᐅᑎᐅᓗᐊᖅᑐᓂᒃ: ᐱᓕᕆᐊᖑᓂᖓ ᐊᒻᒪᓗ ᐆᒻᒪᖅᑎᑦᑎᒃᑲᓐᓂᕐᓂᖅ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᐊᒥᓱᓂᒃ ᐃᓄᖃᐅᖅᑐᓂᑦ ᓲᕐᓗ ᓄᓇᓕᐸᐅᔭᕐᓂᑦ.
• ᐃᓄᐃᑦ ᐃᓚᐅᖃᑕᐅᔪᑦ ᐅᖃᒃᑲᓐᓂᓚᐅᖅᑐᑦ ᐱᔭᐅᔭᕆᐊᓖᑦ ᐱᒻᒪᕆᐅᔪᓂᑦ ᐱᔨᑦᑎᕋᐅᑏᑦ ᐃᓄᒃᑎᑑᖓᓗᒋᑦ, ᑭᑐᑐᐃᓐᓇᐃᑦ ᖃᓄᐃᖏᑦᑎᐊᕐᓂᖏᓐᓄᑦ ᐃᓱᒫᓘᑕᐅᑉᓗᓂ; ᑐᕌᒐᐅᔪᖅ ᐃᓄᖕᓄᑦ ᐃᑲᔫᑎᑕᖃᕐᓗᓂ ᐊᔾᔨᖓᒍᑦ ᑲᒪᒋᔭᐅᓂᕐᒥᒃ ᑕᐃᒪᐅᔪᓂᒃ ᐅᐃ-ᐅᐃ-ᑎᑑᖅᑐᑦ ᐊᒻᒪᓗ ᖃᑉᓗᓈᑎᑑᖅᑐᑦ ᐊᑐᖅᑕᐅᔪᑦ ᐅᖃᐅᓯᕐᓄᑦ ᓄᓇᓕᖕᓂᑦ. ᑮᓇᐅᔭᖃᖅᑎᑕᐅᖅᖃᐅᑕᐅᔭᕆᐊᖃᖅᑐᑦ ᐱᒻᒪᕆᐅᔪᓄᑦ ᐱᔨᑦᑎᕋᐅᑎᐅᔪᑦ ᐃᓄᒃᑎᑑᖓᓕᕐᓂᐊᕐᓗᒋᑦ;
• ᒦᑏ ᐃᓅᖃᑎᒌᓂᑦ ᐃᓚᐅᖃᑕᐅᔪᑦ ᐅᖃᓚᐅᖅᑐᑦ ᐱᒻᒪᕆᐅᓂᖓᑕ ᓇᓗᓇᐃᖅᓯᒪᔪᒃᑯᑦ ᐋᖅᕿᒃᑕᐅᓗᓂ ᐊᒻᒪᓗ ᐋᖅᕿᒃᓯᔪᒪᓂᖏᑦ ᖁᓕᓄᑦ ᐅᑭᐅᓄᑦ ᐊᑐᕐᓂᐊᖅᑐᒥᒃ ᒪᓕᒐᐅᔪᖅ ᐅᖃᐅᓯᕐᒧᑦ, ᒪᓕᒡᓗᒍ ᐱᓕᕆᐊᕐᒧᑦ ᐋᖅᕿᐅᒪᓂᖓᑕ 2017 ᑲᓇᑕ-ᒦᑏ ᐃᓅᖃᑎᒌᓄᑦ ᒪᓕᒐᖅ. ᓄᑖᖅ ᐋᖅᕿᐅᒪᔪᑦ ᓄᓇᖅᖃᑎᒌᒥᑦ-ᓄᓇᖅᖃᑎᒌᒧᑦ-ᖑᔭᕆᐊᖃᖅᑐᖅ ᐋᖅᕿᒃᓯᓯᒪᓗᑎᒃ ᐱᖓᓱᓂᒃ ᐊᔾᔨᐅᖏᑦᑑᑎᐅᔪᓂᒃ;
• ᐃᖅᕿᓖᑦ ᓄᓇᖅᖃᑎᒌᑦ ᑕᐅᑐᒐᖏᑦᑎᒍᑦ, ᓇᓗᓇᓚᐅᖏᑦᑐᑦ ᖃᖓᒃᑯᑐᐃᓐᓇᖅ, ᐊᔪᙱᓐᓂᐊᖅᑐᒥᒃ ᐊᒻᒪᓗ ᐊᑯᓂᐅᔪᒥᒃ ᑮᓇᐅᔭᖃᖅᑎᑕᐅᓂᖅ ᐱᒻᒪᕆᐅᔪᖅ ᐱᕈᐃᓂᖅ ᐊᒻᒪᓗ ᑲᒪᒋᔭᐅᓂᖓ ᑲᔪᓯᓂᐊᕐᓗᓂ. ᑮᓇᐅᔭᖃᖅᑎᑦᑎᓂᖅ ᓈᒻᒪᒋᐊᖃᖅᑐᖅ ᑎᑭᐅᑎᔭᐅᓂᐊᕐᓗᑎᒃ ᐱᔭᐅᔭᕆᐊᓖᑦ ᓄᓇᓕᖕᓄᑦ ᐃᖕᒥᖕᓄᑦ ᓄᓇᓖᑦ ᐱᒡᒎᖕᓂᖃᕐᓂᐊᖏᓪᓗᑎᒃ. ᐱᒻᒪᕆᐅᔪᖅ ᓱᓇᑐᐃᓐᓇᐃᑦ ᓄᑖᖑᔪᑦ ᐋᖅᕿᐅᒪᔪᑦ ᐱᓕᕆᐊᖑᓗᑎᒃ ᐱᓕᕆᖃᑎᒋᓗᒋᑦ ᓄᓇᓖᑦ ᑭᓯᒥ. ᑮᓇᐅᔭᖃᖅᑎᑕᐅᓂᖅ ᐃᑲᔪᖅᑐᐃᔭᕆᐊᖃᖅᑐᖅ ᓴᖅᕿᑦᑎᓂᕐᒧᑦ ᐊᒻᒪᓗ ᐱᓕᕆᐊᖑᓗᓂ ᑭᖑᕚᕆᔭᐅᔪᓄᑦ ᑐᓂᔭᐅᓂᖓᓄᑦ ᐅᖃᐅᓯᖅ.

ᐅᑉᓗᖅ 4, ᑕᖅᑮᓐᓇᕐᔪᐊᖅ (ᔭᓄᐊᕆ) 28, 2021: ᑎᑎᕋᕐᕕᖓ ᑲᒥᓯᓇᐅᔫᑉ ᓄᓇᖃᖅᖄᖅᑐᓄᑦ ᐅᖃᐅᓯᓕᕆᔨᒃᑯᓐᓄᑦ

ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᖅ ᓴᖅᕿᑦᑎᔪᖅ ᑎᑎᕋᕐᕕᖓᓂᑦ ᑲᒥᓯᓇᐅᔫᑉ ᓄᓇᖃᖅᖄᖅᑐᓄᑦ ᐅᖃᐅᓯᓕᕆᔨᒃᑯᓐᓄᑦ (OCIL), ᑲᒥᓯᓂᖃᖅᖢᓂ ᐊᒻᒪᓗ ᐱᖓᓱᐃᑦ (3) ᑲᑎᒪᔨᓂᒃ ᑎᒃᑯᐊᖅᑕᐅᔪᑦ ᒐᕙᓇᐅᔪᒧᑦ ᑲᑎᒪᔨᓄᑦ. ᑲᑎᒪᑎᓪᓗᒋᑦ, ᑎᒃᑯᐊᖅᓯᓂᕐᒧᑦ ᐱᕙᓪᓕᐊᓂᖅ ᐱᓕᕆᐊᖑᓚᐅᖅᑐᖅ ᓱᓕ, ᑎᒃᑯᐊᖅᓯᑉᓗᑎᒃ ᑲᒥᓯᓇᒥᑦ ᐊᒻᒪᓗ ᐱᖓᓱᓂᑦ ᑲᑎᒪᔨᓂᑦ ᒪᓐᓃᑦ (ᔫᓂ) 14, 2021-ᒥᑦ. OCIL-ᑯᑦ ᑎᑭᖅᖃᐅᒪᓇᖅᑐᖅ, ᐃᖕᒥᒃᑰᖓᑉᓗᓂ ᐱᓕᕆᕝᕕᒃ ᐊᒻᒪᓗ ᐃᓚᒋᔭᐅᖏᑦᑐᖅ ᒐᕙᒪᑐᖃᒃᑯᑦ ᐊᐅᓚᑦᑎᓂᖓᓐᓄᑦ, ᐅᕝᕙᓘᓐᓃᑦ ᑲᒥᓯᓇᒧᑦ, ᑲᑎᒪᔨᓄᑦ, ᐅᕝᕙᓘᓐᓃᑦ ᐱᓕᕆᔨᓄᑦ.

ᐱᔾᔪᑎᒋᑉᓗᒍ ᐱᔭᒃᓴᐅᑎᖏᑦ ᑲᒥᓯᓇᐅᑉ ᐊᒻᒪᓗ ᐱᖓᓱᑦ ᑲᑎᒪᔩᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐃᓚᒋᔭᐅᓚᐅᖅᑐᖅ ᒪᕐᕉᒃ ᐱᓕᕆᐊᖑᓗᐊᖅᑐᓄᑦ ᐅᑭᐊᒃᓵᖅ 2020-ᒥᑦ ᐅᖃᖃᑎᖃᖅᑎᓪᓗᒋᑦ ᐊᑐᓕᖅᑎᑕᐅᓂᖓᓄᑦ ᐱᖁᔭᖅ.

ᑲᑎᒪᓂᕐᒥᑦ ᐱᕕᖃᖅᑎᑦᑎᓚᐅᖅᑐᑦ ᐃᓚᐅᖃᑕᐅᔪᓂᑦ ᐃᓚᓯᓗᑎᒃ ᑐᓂᔭᐅᓚᐅᖅᑐᑦ 2020-ᒥᑦ ᐅᖃᖃᑎᖃᕐᓂᐅᔪᓂᒃ ᐊᒻᒪᓗ ᐊᑕᐅᑦᑎᒃᑯᑦ ᑐᓂᐅᑎᖃᑦᑕᕐᓗᑎᒃ ᐃᓚᖏᓐᓂᒃ ᐊᐅᓛᖅᑎᑦᑎᓂᕐᒧᑦ ᐃᓚᒋᔭᐅᔪᓂᒃ ᐱᔭᒃᓴᐅᑎᒋᔭᖏᓐᓄᑦ OCIL, ᐱᓗᐊᖅᑐᒥᑦ:

• ᐃᑲᔪᕐᓗᒋᑦ ᓄᓇᖃᖅᖄᖅᑐᑦ ᓄᓇᓖᑦ ᐱᔾᔪᑎᖃᖅᑐᓂᒃ, ᐊᓯᖏᓪᓗ, ᐅᖃᐅᓯᕐᒥᒃ ᖃᐅᔨᓴᐃᓂᕐᓂᒃ ᐊᒻᒪᓗ ᐱᔭᐅᖃᑦᑕᖅᑐᑦ ᐊᒻᒪᓗ ᐋᖅᕿᒃᑕᐅᓂᖏᑦ ᐅᓐᓂᕐᓘᑕᐅᔪᑦ;
• ᓴᖅᕿᑦᑎᓯᒪᓗᓂ ᑭᑐᑐᐃᓐᓇᕐᓂᒃ ᖃᐅᔨᒪᓕᖅᑎᑦᑎᓂᕐᒥᒃ ᐊᒻᒪᓗ ᑐᑭᓯᐊᑎᑦᑎᓂᕐᒥᒃ ᐱᔾᔪᑎᖃᖅᑐᓂᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᑲᓇᑕᒥᑦ, ᐱᓗᐊᖅᑐᒥᑦ ᓄᓇᖃᖅᖄᙱᑦᑐᑦ ᑲᓇᑕᒥᐅᓄᑦ;
• ᖃᐅᔨᓴᐃᓂᖃᕐᓗᓂ, ᐃᓚᐅᓗᑎᒃ ᐃᑲᔪᖅᑕᐅᓂᕐᒧᑦ ᖃᓄᐃᓕᐅᕐᓂᐅᔪᓂᒃ ᐱᓕᕆᐊᖑᔪᑦ ᐊᒻᒪᓗ ᒪᓕᒐᓕᐅᕐᕕᒡᔪᐊᕐᒥᑦ ᐅᓂᑉᑳᓕᐅᕆᓂᕐᓂᒃ, ᐱᔾᔪᑎᖃᖅᑐᓂᒃ ᑮᓇᐅᔭᖃᖅᑎᑕᐅᓃᑦ ᐱᔾᔪᑎᒋᑉᓗᒋᑦ ᐃᑲᔪᖅᑐᖅᑕᐅᓂᖏᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ ᐅᕝᕙᓘᓐᓃᑦ ᐊᑐᖅᑕᐅᓂᖓ ᓄᓇᖃᖅᖄᖅᑐᑦ ᐅᖃᐅᓯᖏᑦ ᑲᓇᑕᒥᑦ.

ᖃᓄᐃᖓᓂᐅᔪᖅ ᐅᖃᓪᓗᕆᒃᓴᐅᑎᓂᕐᓂᑦ ᑐᓂᔭᐅᓗᑎᒃ OCIL-ᑯᓐᓄᑦ ᐃᑲᔪᕐᓂᐊᕐᓗᓂ ᐱᓕᕆᐊᖓᓐᓄᑦ ᑲᒥᓯᓇᒥᒃ ᐊᒻᒪᓗ ᑲᑎᒪᔨᓂᒃ ᑐᒃᑯᐊᖅᓯᐊᓂᒃᐸᑕ.

ᐅᑉᓗᖅ 4 ᐱᒋᐊᓚᐅᖅᑐᖅ ᑐᑭᓯᑎᑦᑎᑉᓗᑎᒃ ᐅᖃᓪᓚᒃᖢᓂ ᐅᐱᓐᓇᖅᑐᖅ ᒫᒃ ᒥᓗ (Marc Miller), ᒥᓂᔅᑕ ᑲᓇᑕᒥᑦ ᓄᓇᖃᖅᖄᖅᑐᓂᒃ ᐱᔨᑦᑎᕋᐃᔨᒃᑯᓐᓄᑦ. ᐹᓪ ᐱᓚᑎᐄ (Paul Pelletier), ᐊᖓᔪᖅᖄᖅ ᓄᓇᖃᖅᖄᖅᑐᑦ ᐅᖃᐅᓯᓕᕆᔨᒃᑯᖏᓐᓂᑦ, ᑲᓇᑕᒥᑦ ᐱᖅᖁᓯᕆᔭᐅᔪᓕᕆᔨᒃᑯᓐᓂᑦ, ᐅᖃᐅᓯᖃᓚᐅᖅᑐᖅ ᑐᓴᖅᑕᐅᓚᐅᖅᑐᓂᒃ ᐱᔾᔪᑎᖃᖅᑐᓂᒃ ᑎᑎᕋᕐᕕᖓ ᑲᒥᓯᓇᐅᔫᑉ ᓄᓇᖃᖅᖄᖅᑐᓄᑦ ᐅᖃᐅᓯᓕᕆᔨᒃᑯᓐᓂᑦ ᐅᑭᐊᒃᓵᖓᓂᑦ 2020 ᐅᖃᖃᑎᖃᖅᑎᓪᓗᒋᑦ ᐊᑐᓕᖅᑎᑕᐅᓂᖓᑕ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᖅ.

ᐅᖃᓪᓚᖕᓂᖅ ᐊᒻᒪᓗ ᑕᑯᔭᒃᓴᐅᑏᑦ ᐋᖅᕿᒃᓯᓚᐅᖅᑐᑦ ᐃᓗᐊᓃᑦᑐᖏᓐᓂᒃ ᐱᔾᔪᑕᐅᔪᓂᒃ ᐱᓕᕆᐊᖃᕐᓂᕐᒧᑦ ᕋᕖᓂᐊ ᕼᐃᖏᓐᔅ (Rawinia Higgins), ᒪᐅᕆ ᐅᖃᐅᓯᕐᒧᑦ ᑲᑎᒪᔩᑦ ᓂᐅ ᔩᓚᓐᒥᑦ, ᐊᒻᒪᓗ ᑐᑭᓯᑎᑦᑎᓂᖅ ᑲᑎᒪᔪᓗᒃᑖᑦ ᑲᑎᒪᓂᖏᓐᓂᒃ ᐃᓚᐅᔪᒥᒃ ᐋᓐ ᑯᕐᔅᑎ ᐊᐃᑭᐅ (Anne Kirste Aikio), ᓵᒥ ᒪᓕᒐᓕᐅᕐᕕᒡᔪᐊᕐᒥᑦ (Sámi Parliament).

ᐱᔾᔪᑕᐅᔪᒧᑦ ᐊᒻᒪᓗ ᑕᒪᓗᒃᑖᖅ ᑲᑎᒪᔪᓄᑦ ᑐᓂᓯᓚᐅᖅᑐᑦ ᐱᔪᒪᓕᖅᑎᑦᑎᓂᕐᒥᒃ ᐊᒻᒪᓗ ᐱᖓᓱᓄᑦ ᐊᕕᒃᖢᑎᒃ ᑲᑎᒪᔪᑦ ᐃᓚᐅᖃᑕᐅᔪᓂᑦ ᐅᖃᓪᓗᕆᒃᓴᐅᑎᖃᖅᑎᑦᑎᑉᓗᓂ ᓇᓗᓇᐃᔭᖅᓯᒪᔪᒃᑯᑦ ᓯᕗᓪᓕᖅᐸᐅᑎᑕᐅᔭᕆᐊᓕᖕᓂᑦ ᐊᒻᒪᓗ ᐱᕙᓪᓕᐊᓂᕐᒥᒃ ᑎᑎᕋᕐᕕᖓ ᑲᒥᓯᓇᐅᔫᑉ ᓄᓇᖃᖅᖄᖅᑐᓄᑦ ᐅᖃᐅᓯᓕᕆᔨᒃᑯᑦ ᐊᑐᕆᐊᖃᖅᑕᖏᓐᓂᒃ ᓴᖅᕿᑕᐅᒃᐸᑦ. ᐅᑉᓗᖅ 4 ᐃᓱᓕᓚᐅᖅᑐᖅ ᑲᑎᒪᖃᑕᐅᔪᓗᒃᑖᑦ ᓇᐃᓈᖅᑎᕆᓂᐊᕐᓗᑎᒃ ᖃᓄᐃᖓᓂᐅᔪᓂᒃ ᐅᖃᓪᓗᕆᒃᓴᐅᑎᓂᕐᒥᑦ ᐱᔭᐅᔪᓂᒃ ᐊᑐᓂ ᐊᕕᒃᑐᖅᖢᑎᒃ ᑲᑎᒪᓂᕐᓂᑦ ᐊᖏᓂᖅᓴᐅᔪᒧᑦ ᑲᑎᕐᒪᔪᓄᐊᕐᓂᐊᕐᓗᒋᑦ.

ᐃᓕᓐᓂᐊᖅᑎᑦᑎᔨ ᕖᓂᐊ ᕼᐃᖏᓐᔅ (Rawinia Higgins) ᑐᓂᓯᓚᐅᖅᑐᖅ ᐱᔾᔪᑎᖃᖅᑐᒥᒃ ᒪᐅᕆ ᐅᖃᐅᓯᕐᒧᑦ ᑲᑎᒪᔨᓂᒃ ᓴᖅᕿᑕᐅᓚᐅᖅᑐᖅ 1987-ᒥᑦ. ᑕᑯᑎᑕᖏᑦ ᐃᓚᐅᖃᑕᐅᔪᓂᑦ ᐃᓕᑦᑎᑎᑦᑎᓚᐅᖅᑐᖅ ᐊᑐᖅᓯᒪᓂᑯᒋᔭᐅᔪᓂᒃ ᑕᐃᒪᐅᔪᓂᒃ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑲᑎᒪᔨᓂᑦ ᐃᓕᓐᓂᐊᖅᑎᑦᑎᔨ ᕼᐃᒋᓐᔅ ᓴᖅᕿᑦᑎᖕᒪᑦ ᑕᒪᐃᓐᓂᑦ ᐱᐊᓂᑦᑎᐊᖅᓯᒪᔪᓂᒃ ᐊᒻᒪᓗ ᐊᒃᓱᕈᖕᓇᐅᑎᓂᒃ ᓴᖅᕿᑕᐅᓯᒫᓂᒃᑐᓂᒃ, ᐊᑐᓕᖅᑎᑕᐅᓯᒫᓂᒃᑐᓂᒃ ᐊᒻᒪᓗ ᑲᒪᒌᓐᓇᖅᑕᖏᓐᓂᑦ ᒪᐅᕆ ᐅᖃᐅᓯᕐᒧᑦ ᑲᑎᒪᔨᓂᑦ.

ᐃᓕᓐᓂᐊᖅᑎᑦᑎᔨ ᕼᐃᒋᓐᔅ ᐅᖃᖅᑐᖅ ᐊᒃᓱᕈᕐᓇᕐᓂᖅ ᐱᓚᐅᖅᑐᖅ ᐊᔾᔨᒌᙱᓐᓂᖏᓐᓄᑦ ᓂᕈᐊᖅᑕᐅᓯᒪᔪᑦ ᐊᕙᑎᖓᓐᓂᑦ, ᐃᒪᓐᓇᐃᒻᒪᑦ, ᐊᓯᐊᙳᖃᑦᑕᕐᓂᖏᑦ ᒐᕙᒪᐅᔪᖅ ᐊᒻᒪᓗ ᐋᖅᕿᒋᐊᖅᑕᐅᓯᒪᔪᑦ ᒐᕙᒪᐅᔪᓄᑦ ᓯᕗᓪᓕᖅᐸᐅᑎᔭᐅᔭᕆᐊᓖᑦ. ᐊᓯᐊᙳᕐᓂᐅᔪᑦ ᐃᖢᐃᓐᓂᖃᓚᐅᖅᑐᑦ ᓄᓇᓕᖕᒥᑦ ᓂᕆᐅᒋᔭᐅᔪᓄᑦ ᑎᑭᐅᑎᔭᐅᖏᓐᓇᕈᖕᓇᓚᐅᖏᖦᖢᑎᒃ. ᐋᖅᕿᒃᓯᓂᐊᕐᓗᓂ ᐊᒃᓱᕈᕐᓇᕈᑕᐅᔪᓂᒃ ᐊᑯᓐᓂᖏᓐᓂᑦ ᐊᔾᔨᒌᙱᑦᑐᑦ ᓂᕆᐅᒋᔭᐅᔪᓂᒃ ᐊᒃᓱᕈᕐᓇᖅᑑᔪᖅ. ᐅᑭᐅᒐᓴᖕᓂᑦ, ᑲᑎᒪᔩᑦ ᑕᐅᑐᒐᖃᓗᐊᖏᓐᓂᖅᓴᐅᓕᖅᖢᑎᒃ ᐅᖃᐅᓯᓕᕆᓂᕐᒧᑦ ᐱᕙᓪᓕᐊᓂᕐᒥᒃ ᐊᒻᒪᓗ ᐊᐅᓛᖅᑎᑦᑎᓂᖅᓴᐅᓕᖅᖢᑎᒃ ᑮᓇᐅᔭᖃᖅᑎᑦᑎᔨᐅᓂᕐᒧᑦ. ᑲᑎᒪᔩᑦ ᐅᖃᐅᓯᕐᒧᑦ ᐸᕐᓇᐃᓂᖅ ᐊᒻᒪᓗ ᐊᑐᐊᒐᕐᒧᑦ ᐊᑐᖅᑕᐅᔪᑦ ᑖᒻᓇ ᐊᕕᒃᑎᑦᑎᓚᐅᖅᑐᖅ ‘ᒥᑭᔪᒥᑦ’ ᐊᒻᒪᓗ ‘ᐊᖏᔪᒥᑦ’ ᐱᔭᒃᓴᐅᑎᒋᔭᐅᔪᓂᒃ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ. ᑕᐅᑐᒐᐅᔪᖅ ᒫᓐᓇᐅᔪᖅ ᖃᓄᖅᑑᕈᓂᕐᒧᑦ ᐅᑎᖅᑎᓪᓗᒍ ᒪᐅᕆ ᐅᖃᐅᓯᖓ ᐊᑐᖅᑕᐅᔪᖕᓇᕐᓗᓂ ᓯᕗᓪᓕᖅᐹᖅ ᐅᖃᐅᓯᕆᔭᐅᔪᑎᑐᑦ. ᕖᓂᐊ ᕼᐃᖏᓐᔅ (Rawinia Higgins) ᐊᑐᓚᐅᖅᑐᖅ ᐊᔾᔨᒌᖕᓂᖃᕐᓚᖕᓂᖏᓐᓂᑦ ᐃᒡᓗᕐᔪᐊᑦ ᐋᖅᕿᐅᒪᓂᖓᓂᒃ ᑕᑯᒃᓴᐅᑎᓐᓂᐊᕐᓗᒍ ᒪᐅᕆ ᐅᖃᐅᓯᖓᓄᑦ ᐊᑐᐊᒐᕐᒧᑦ ᐋᖅᕿᐅᒪᔪᖅ, ᐃᓚᐅᔪᖃᖅᖢᓂ ᒪᕐᕉᖕᓂᒃ ᖃᓄᖅᑑᕈᑕᐅᓗᐊᖅᑑᖕᓂᒃ: a) ᒪᐃᕼᐃ ᒪᐅᕆ, ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᖃᓄᖅᑑᕈᑎ ᑕᐅᑐᒐᖃᖅᖢᓂ ᖃᑕᙳᑎᒌᓂᒃ ᐊᒻᒪᓗ ᓄᓇᓕᖕᓂᑦ, ᐊᒻᒪᓗ b) ᒪᐃᕼᐃ ᒪᕋᐅᓇ, ᖃᓄᖅᑑᕈᑎ ᐋᖅᕿᐅᒪᔪᖅ ᑎᑭᐅᑎᔪᖕᓇᕐᓂᓕᒫᖓᓄᑦ ᓯᐊᒻᒪᒃᑎᓐᓂᐊᕐᓗᒍ ᐊᑐᖅᑕᐅᓂᖓ ᐅᖃᐅᓯᖅ; ᑭᑐᓗᒃᑖᑦ ᐊᒃᑐᖅᑕᐅᑉᓗᑎᒃ ᐅᖃᐅᓯᕐᒧᑦ ᐅᕝᕙᓘᓐᓃᑦ ᐃᑲᔪᖅᑐᖅᑕᐅᑉᓗᑎᒃ ᐊᑐᖅᑕᐅᓂᖓᓄᑦ.

ᐋᓐ ᑯᕐᔅᑎ ᐊᐃᑭᐅ (Anne Kirste Aikio), ᐅᖃᐅᓯᕐᒥᒃ ᒥᐊᓂᖅᓯᓂᕐᒧᑦ ᑎᑎᕋᖅ, ᓵᒥ ᒪᓕᒐᓕᐅᕐᕕᒡᔪᐊᖅ (Sámi Parliament), ᐅᖃᓚᐅᖅᑐᖅ ᐅᖃᐅᓯᕐᒧᑦ ᐱᔪᖕᓇᐅᑎᒋᔭᐅᔪᑦ ᐊᐅᓚᑕᐅᔪᑎᒍᑦ ᐱᔪᖕᓇᐅᑎᐅᔪᑦ ᓵᒥ ᐃᓄᖏᓐᓄᑦ ᓄᓇᖃᖅᖄᖅᑐᑦ ᐃᓅᑉᓗᑎᒃ ᕕᓐᓚᓐᒥᑦ. ᓵᒥ ᐅᖃᐅᓯᕐᒧᑦ ᐱᖁᔭᖅ (2003) ᐊᐅᓚᑕᐅᔪᑦ ᐱᔪᖕᓇᐅᑏᑦ ᓵᒥ ᐅᖃᐅᓯᕐᒧᑦ, ᒫᓐᓇᐅᔪᖅ ᖃᓄᐃᖓᓂᖓᑕ ᓵᒥ ᐅᖃᐅᓯᖓᑦ ᑐᑭᓕᐅᖅᑕᐅᔪᖅ ᐅᓗᕆᐊᓇᕐᓂᕐᒦᑦᑎᐊᕐᓂᖓᓄᑦ ᐊᒻᒪᓗ ᐅᖃᐅᓯᕐᒧᑦ ᐱᔪᖕᓇᐅᑎᖏᑦ ᓵᒥ-ᑯᑦ ᐃᓕᑕᕆᔭᐅᓯᒪᓗᐊᖏᑦᑐᑦ ᐅᕝᕙᓘᓐᓃᑦ ᐊᑐᓕᖅᑎᑕᐅᓯᒪᙱᑦᑐᑦ. ᑖᒻᓇ ᐃᖢᐃᓗᑕᐅᓗᐊᖅᑐᖅ ᐱᑕᖃᙱᓐᓂᖓᓄᑦ ᐃᓄᖕᓄᑦ ᐊᒻᒪᓗ ᐋᓐᓂᐊᖃᖅᑕᐃᓕᒪᓂᕐᒧᑦ ᐱᔨᑦᑎᕋᐅᑏᑦ ᐅᖃᐅᓯᕐᒥᒃ ᐊᑐᕐᓗᑎᒃ. ᖃᑉᓯᐊᕐᔪᖕᓂᑦ ᐱᑦᑕᐅᔪᓂᒃ ᑐᕌᖓᔪᖅᑕᖃᖅᑐᖅ ᐃᓚᐅᑉᓗᑎᒃ ᐅᖃᐅᓯᕐᒧᑦ ᑐᙵᕕᐅᔪᑦ ᑭᓯᐊᓂ ᐅᖃᐅᓯᓕᕆᓂᖅᑕᖃᙱᖦᖢᓂ ᓱᓕ ᐃᓱᒪᒋᔭᐅᓚᐅᕐᓂᖓᑐᑦ. ᐊᒃᓱᕈᖅᖢᑎᒃ ᐱᓕᕆᓇᓱᒃᑐᑦ ᓱᓕ ᐱᐅᓯᒋᐊᕈᒪᑉᓗᒍ ᑕᒪᓐᓇ.

ᐱᔾᔪᑕᐅᔪᖅ ᐱᓕᕆᐊᖑᖅᖄᖅᑎᓪᓗᒍ ᐊᒻᒪᓗ ᑐᑭᓯᑎᑕᐅᓂᖏᑦ ᑲᑎᒪᔪᑦ, ᐃᓚᐅᖃᑕᐅᔪᑦ ᐱᖓᓲᓕᖅᖢᑎᒃ (3) ᐊᕕᓚᐅᖅᑐᑦ, ᒪᓕᒃᖢᒋᑦ ᐱᔪᒪᓂᕆᔭᖏᑦ ᐊᒻᒪᓗ ᖃᐅᔨᒪᓂᖃᕐᕕᒋᔭᖏᑦ, ᐅᖃᐅᓯᖃᕐᓂᐊᕐᓗᑎᒃ ᐃᓚᖏᓐᓂᒃ ᐱᓕᕆᐊᖏᓐᓂᒃ OCIL-ᑯᑦ, ᐱᓗᐊᖅᑐᒥᑦ ᐅᔾᔨᖅᑐᕐᓂᕐᒥᒃ ᐊᒻᒪᓗ ᓴᖅᕿᔮᖅᑎᑦᑎᓂᕐᒥᒃ, ᓄᓇᓕᖕᒥᑦ ᐃᓱᒪᒋᔭᖃᕐᓗᑎᒃ ᐊᑐᖅᑕᐅᔪᓂᒃ ᐊᒻᒪᓗ ᖃᐅᔨᓴᐃᓂᕐᓂᒃ, ᐸᕐᓇᐃᓂᕐᒥᑦ ᐊᒻᒪᓗ ᖃᓄᐃᖓᓂᐅᔪᓄᑦ.

ᐅᔾᔨᖅᑐᕐᓂᕐᒧᑦ ᐊᒻᒪᓗ ᓴᖅᕿᔮᖅᑎᑦᑎᓂᕐᒧᑦ OCIL-ᑯᑦ ᐱᓕᕆᐊᖏᓐᓂᑦ, ᐃᓚᐅᖃᑕᐅᔪᑦ ᐃᓱᒪᔪᑦ ᐱᓕᕆᐊᖑᓇᓱᒃᑐᑦ ᑕᐅᑐᒐᖃᕆᐊᖃᕐᓂᖏᓐᓄᑦ ᐲᕐᓗᒋᑦ ᑐᓗᖅᑕᕈᑕᐅᔪᑦ ᐊᒻᒪᓗ ᐃᑲᔪᖅᑐᕐᓗᑎᒃ ᐅᖃᐅᓯᕐᒥᒃ ᐊᑐᖁᔨᓂᕐᒧᑦ ᑕᒪᓗᒪᒃᑖᕐᒥᑦ ᐃᓅᓯᕆᔭᐅᔪᓂᑦ. OCIL-ᑯᑦ ᐱᓕᕆᐊᒃᓴᖃᖅᑐᑦ ᐃᓄᖕᒥᒃ ᐊᔾᔨᐅᖏᑦᑑᑎᑦᑎᔭᕆᐊᖃᙱᓐᓂᕐᒥᒃ ᐊᒻᒪᓗ ᐃᓂᓕᐅᖅᑕᐅᓯᒪᔪᖕᓃᖅᑎᑦᑎᓂᕐᒧᑦ. ᐱᔾᔪᑎᒋᑉᓗᒋᑦ ᓄᓇᓕᖕᒦᖓᔪᓂᒃ ᐱᓕᕆᐊᑦ, ᐊᑐᖅᑕᐅᔪᑦ ᐊᔪᙱᑎᓐᓂᐊᕐᓗᒍ ᑮᓇᐅᔭᖃᖅᑎᑦᑎᓂᕐᒧᑦ ᐊᒻᒪᓗ ᑕᒪᒃᑯᐊ ᐃᓂᖃᕈᖕᓇᕋᔪᙱᑦᑐᑦ ᐊᔪᕈᑎᖃᖃᑦᑕᖅᖢᑎᒃ. ᐅᖃᓚᐅᖅᑐᑦ ᐊᑐᖅᑕᐅᔪᖕᓇᖅᑐᖅ ᐲᖅᓯᓂᐊᕐᓗᓂ ᑖᑉᓱᒥᙵᑦ ᑭᒡᓕᖃᖅᑐᓄᑦ ᐱᕝᕕᐅᖃᑦᑕᖅᑐᓂᒃ ᐱᔪᖕᓇᕐᓂᕐᒧᑦ ᑐᓂᓗᒋᑦ ᓈᒻᒪᒃᑐᒥᒃ ᐱᕝᕕᐅᖃᑦᑕᖅᑐᓂᒃ ᑎᑭᐅᑎᓂᐊᕐᓗᓂ ᐱᔭᐅᔭᕆᐊᓕᖕᒧᑦ. ᐃᓚᐅᖃᑕᐅᔪᑦ ᐅᖃᖅᑐᑦ ᐃᓱᒪᒋᔭᖃᕆᐊᖃᓚᐅᕐᒥᔪᑦ ᐱᒡᒎᖕᓂᕐᒥᑐᐃᓐᓇᐅᖏᑦᑐᖅ ᑮᓇᐅᔭᖃᖅᑎᑕᐅᓂᕐᒧᑦ ᑭᓯᐊᓂᑦᑕᐅᖅ ᐱᒡᒎᖃᑕᐅᓗᑎᒃ ᐅᖃᓪᓚᒃᑎᐅᔪᖕᓇᖅᑐᓄᑦ ᐊᒻᒪᓗ ᐃᓕᓐᓂᐊᖅᑎᑦᑎᔨᓄᑦ. ᐊᒥᓲᙱᑦᑐᓂᒃ ᐅᖃᓪᓚᒃᑎᑕᖃᖅᑐᖅ ᐊᒻᒪᓗ ᐃᓕᓐᓂᐊᖅᑎᑦᑎᔨᑕᖃᙱᖦᖢᑎᒃ ᐃᓚᖏᓐᓂᑦ ᐊᒻᒪᓗ ᑕᒪᓐᓇ ᐱᓕᕆᐊᖑᔭᕆᐊᖃᖅᑐᖅ. ᖃᐅᔨᓴᐃᓂᕐᒧᑦ, ᐸᕐᓇᐃᓂᕐᒧᑦ ᐊᒻᒪᓗ ᖃᓄᐃᖓᓂᐅᔪᓄᑦ, ᑕᐅᑐᒐᐅᔪᖅ ᐊᑐᕐᓂᐊᕐᓗᑎᒃ ᐅᖃᓪᓚᒃᑎᓂᑐᐃᓐᓇᐅᖏᑦᑐᖅ ᐊᒻᒪᓗ ᓄᑖᓂᒃ ᐃᓕᓐᓂᐊᖅᑎᓂᑦ. ᖃᓄᐃᓕᐅᖅᑎᑦᑎᓃᑦ ᐊᒥᓱᓂᒃ ᖃᓄᐃᖓᓕᖅᑎᑦᑎᓂᖃᓚᐅᖅᑐᑦ ᐃᓱᒪᒋᔭᐅᔭᕆᐊᖃᖅᖢᑎᒃ ᐃᓚᐅᑉᓗᑎᒃ ᐋᓐᓂᐊᖃᖅᑕᐃᓕᒪᓂᖅ, ᐆᒃᑐᖃᑦᑕᕐᓂᖅ/ᓇᓗᓇᐃᖅᓯᓂᖅ ᐅᖃᐅᓯᕐᒧᑦ ᐱᔪᖕᓇᐅᑎᓂᒃ, ᑕᒪᒃᑯᐊᕋᓗᐃᑦ. ᐃᓚᒋᔭᐅᑉᓗᓂ, ᐱᒻᒪᕆᐅᔪᖅ ᖃᐅᔨᓴᐃᓂᖅ ᑲᒪᒋᔭᐅᓗᓂ ᐃᓕᓐᓂᐊᕐᕕᖕᓄᑦ ᐊᒻᒪᓗ ᐃᓕᓐᓂᐊᖅᑎᑦᑎᔨᓄᑦ ᓄᓇᓕᖕᒥᑦ ᑕᑯᒃᓴᐅᑎᑦᑎᔪᓂᒃ. ᐃᑲᔪᖅᑐᕐᓗᓂ ᐊᑐᓕᖅᑎᑕᐅᓂᖓ ᖃᐅᔨᓴᐃᓂᕐᒧᑦ ᒪᓕᒐᐅᔪᑦ ᐊᒻᒪᓗ ᑕᐅᑐᒐᖃᕆᐊᖃᕐᓂᐅᔪᖅ ᐃᓂᓕᐅᕆᒃᑲᓐᓂᕐᓂᖅᓴᐅᓂᕐᒧᑦ ᓄᓇᓕᖕᓂᑦ ᐅᖃᐅᓯᐅᓚᐅᕐᒥᔪᖅ.

ᐅᑉᓗᖅ 4 ᑎᑎᕋᕐᕕᖓ ᑲᒥᓯᓇᐅᔫᑉ ᓄᓇᖃᖅᖄᖅᑐᓄᑦ ᐅᖃᐅᓯᓕᕆᔨᒃᑯᓐᓄᑦ ᐱᔭᐅᓗᐊᓚᐅᖅᑐᑦ

• ᐱᔭᒃᓴᐅᑎᖓᑦ ᑲᑎᒪᔩᑦ ᐃᓚᐅᑎᑦᑎᓗᑎᒃ ᐃᑲᔪᐃᔪᓂᒃ ᐅᖃᐅᓯᕐᒥᒃ ᖃᐅᔨᓴᐃᓂᕐᓂᒃ, ᓴᖅᕿᔮᖅᑎᑦᑎᓗᑎᒃ ᑭᑐᑐᐃᓐᓇᐃᑦ ᐅᔾᔨᖅᑐᖅᑎᓐᓂᐊᕐᓗᒋᑦ ᐊᒻᒪᓗ ᑐᑭᓯᐊᑎᓐᓂᐊᕐᓗᒋᑦ ᐅᖃᐅᓯᕆᔭᐅᔪᓂᒃ ᑲᓇᑕᒥᑦ, ᐱᓗᐊᖅᑐᒥᑦ ᓄᓇᖃᖅᖄᖏᑦᑐᑦ ᑲᓇᑕᒥᐅᑕᓄᑦ;
• ᐃᓱᒪᓚᐅᖅᑐᑦ OCIL-ᑯᑦ ᐱᓕᕆᐊᖃᕈᖕᓇᖅᑐᑦ ᖃᐅᔨᓂᐊᕐᓗᑎᒃ ᐊᒻᒪᓗ ᖃᓄᑎᒋᐅᓂᖓᑕ ᐱᐊᓂᑦᑎᐊᖅᓯᒪᓂᐅᑉ ᖃᐅᔨᓴᕐᓗᒍ. ᐱᓕᕆᖃᑎᖃᕈᖕᓇᖅᑐᑦ ᓄᓇᓕᖕᓂᑦ ᓴᖅᕿᑦᑎᓂᐊᕐᓗᑎᒃ ᑭᒡᓕᐅᔪᓂᒃ ᐆᒃᑐᕋᕐᓂᐊᕐᓗᒋ ᖃᓄᐃᖓᓂᖓᑕ ᐅᖃᐅᓯᐅᑉ ᐊᑐᖅᑕᐅᓂᖓ ᐊᒻᒪᓗ ᖃᓄᖅ ᐱᐅᓛᖑᓇᔭᕐᒪᖔᑦ ᐆᒃᑐᕋᕐᓂᐊᕐᓗᒋᑦ ᖃᓄᐃᖓᓂᐅᔪᑦ ᐅᖃᐅᓯᕐᒥᒃ ᐆᒻᒪᖅᑎᑦᑎᓇᓱᖕᓂᕐᒥᑦ;
• ᓴᖅᕿᔮᖅᑎᑦᑎᓂᕐᒧᑦ ᐊᒻᒪᓗ ᐅᔾᔨᖅᑐᖅᑎᑦᑎᓂᕐᒧᑦ, ᐱᓕᕆᐊᖅ ᖃᓄᐃᓕᐅᖅᑎᑕᐅᔭᕆᐊᖃᖅᑐᖅ ᐃᓐᓇᕆᔭᐅᔪᓄᑦ ᐊᒻᒪᓗ ᐃᓚᐅᑎᓪᓗᒋᑦ ᓄᓇᓕᖕᒥᑦ, ᖃᓂᑦᑐᒥᑦ ᐃᓂᐅᔪᓂᑦ ᐊᒻᒪᓗ ᑲᓇᑕᒦᖓᔪᒃᑯᑦ ᐊᒻᒪᓗ ᐅᑭᐅᖏᓐᓄᑦ ᐊᑐᖅᑐᑦ ᐊᒻᒪᓗ ᓄᓇᐅᑉ ᓇᓃᓐᓂᕆᖓᓄᑦ. ᐊᔾᔨᒌᙱᓐᓂᒃᑰᖓᖕᒥᔪᖅ ᐊᒻᒪᓗ ᐃᓚᐅᑉᓗᑎᒃ ᓄᓇᓕᖕᒥᑦ ᖃᐅᔨᔭᐅᔪᓂᒃ ᐊᑐᖅᑕᐅᔪᑦ ᓲᕐᓗ ᐅᓂᑉᑳᖅᑐᐊᓂᒃ ᐊᒻᒪᓗ ᑎᑎᕋᐅᔭᖅᓯᒪᔪᓂᒃ;
• ᓄᓇᓕᖕᒦᖓᔪᒃᑯᑦ, OCIL-ᑯᑦ ᐃᑲᔪᖅᑐᐃᔭᕆᐊᖃᖅᑐᑦ ᐃᖕᒥᖕᓂᒃ ᐱᔪᒪᓂᖃᖅᑎᑦᑎᓂᕐᒥᒃ ᐅᖃᓪᓚᒃᑎᓄᑦ ᐊᒻᒪᓗ ᐃᓕᓐᓂᐊᖅᑎᓄᑦ. ᑐᕌᖓᔭᕆᐊᖃᕐᒥᔪᖅ ᐱᔪᖕᓇᖅᑎᓪᓗᒋᑦ ᐅᖃᓪᓚᒃᑏᑦ ᐊᒻᒪᓗ ᓄᓇᓖᑦ ᓴᖅᕿᑦᑎᓂᒃᑯᑦ ᐊᔪᙱᓐᓂᐊᖅᑐᒥᒃ ᐃᓕᓐᓂᐊᖅᑎᑦᑎᓂᕐᒧᑦ ᐱᕕᖃᕐᓂᐅᔪᓂᒃ;
• ᖃᐅᔨᓴᐃᓂᕐᒧᑦ, ᐸᕐᓇᐃᓂᕐᒧᑦ ᐊᒻᒪᓗ ᖃᓄᐃᖓᓂᐅᔪᓄᑦ, ᐅᖃᓚᐅᖅᑐᑦ ᐱᐊᓂᑦᑎᐊᕈᖕᓇᖅᑐᑦ ᑲᑎᒪᔩᑦ ᐃᓚᐅᑎᓪᓗᒋᑦ ᐱᔪᖕᓇᐅᑎᖃᕐᓂᐅᔪᒃᑯᑦ ᐊᑐᕐᓗᑎᒃ ᐊᑐᖅᑐᓂᒃ ᒐᕙᒪᐅᔪᒥᑦ ᒐᕙᒪᐅᔪᒧᑦ ᐱᓕᕆᖃᑎᒌᖕᓂᐅᔪᓂᒃ ᓈᒻᒪᒃᑐᓂᒃ ᑕᒪᒃᑯᓄᙵ, ᑐᑭᖃᖅᑐᓂᒃ ᐊᒻᒪᓗ ᐱᕕᖃᕐᓂᒃᑯᑦ ᓈᒻᒪᐅᑎᓯᒪᔪᓂᒃ. ᑕᐅᑐᒐᐅᔪᖅ ᐅᖃᓪᓚᒃᑎᓂᒃ ᐊᑐᕆᐊᖃᕐᓂᕐᒧᑐᐃᓐᓇᐅᔭᕆᐊᖃᙱᑦᑐᖅ ᐊᒻᒪᓗ ᓄᑖᓂᒃ ᐃᓕᓐᓂᐊᖅᑎᓂᒃ; ᖃᓄᐃᓕᐅᕈᑏᑦ ᐊᒥᓱᓂᒃ ᖃᓄᐃᖓᓕᖅᑎᑦᑎᓂᖃᖃᑦᑕᖅᑐᑦ ᐃᓱᒪᒋᔭᐅᔭᕆᐊᖃᖅᖢᑎᒃ ᐃᓚᐅᑉᓗᑎᒃ ᐆᒃᑐᖃᑦᑕᕐᓂᖅ/ᓇᓗᓇᐃᖅᓯᓂᖅ ᐅᖃᐅᓯᕐᒧᑦ ᐱᔪᖕᓇᐅᑎᓂᒃ, ᑕᒪᒃᑯᐊᕋᓗᐃᑦ.

ᓴᐃᓪᓘᓐᓃᑦ ᓄᓇᖅᖃᑎᒌᒃᑐᑦ ᖁᓕᓄᑦ ᐅᑭᐅᓂᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ, 2022-2032

ᐊᕗᓐᓂᕕᒃ (ᑎᓯᐱᕆ) 18, 2019-ᒥᑦ, ᑲᑎᓯᒪᔪᑦ ᓄᓇᖅᖃᑎᒌᑦ ᑲᑎᒪᓂᖏᑦ ᑐᓴᖅᑎᑦᑎᓚᐅᖅᑐᑦ ᓄᓇᕐᔪᐊᕐᒥᑦ ᖁᓕᓄᑦ ᐅᑭᐅᓂᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᑦ 2022-ᒥᑦ 2032-ᒧᑦ (ᖁᓕᑦ ᐅᑭᐅᑦ). ᑐᕌᒐᐅᔪᖅ ᖁᓕᑦ ᐅᑭᐅᓄᑦ, ᑐᑭᓕᐅᖅᑕᐅᓂᖓᑐᑦ ᑲᑎᓯᒪᔪᑦ ᓄᓇᖅᖃᑎᒌᑦ ᐋᖅᕿᒃᓯᓂᕐᒧᑦ (A/74/396 #24) ᖃᐅᔨᑎᑦᑎᓂᐊᕐᓗᑎᒃ ᐱᒻᒪᕆᐅᓂᖓᑕ ᐊᓯᐊᔨᔭᐅᓂᖓ ᓄᓇᖃᖅᖄᖅᑐᑦ ᐅᖃᐅᓯᖏᑦ ᐊᒻᒪᓗ ᐱᒻᒪᕆᐅᓂᖓᑕ ᐊᓯᐅᔨᑦᑕᐃᓕᓂᕐᒧᑦ, ᐆᒻᒪᖅᑎᒃᑲᓐᓂᕐᓗᒍ ᐊᒻᒪᓗ ᓴᖅᕿᔮᖅᑎᓪᓗᒋᑦ ᐊᒻᒪᓗ ᐱᔭᕆᐊᖃᓪᓚᕆᒃᑐᓂᒃ ᐱᕙᓪᓕᐊᓗᑎᒃ ᓄᓇᖅᖃᑎᒌᒃᑐᒃᑯᑦ ᐊᒻᒪᓗ ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓄᑦ.

ᑕᓪᓕᒪᖓ ᐊᒻᒪᓗ ᑭᖑᓪᓕᖅᐹᖅ ᐅᑉᓗᖅ ᑲᑎᒪᓂᕐᒥᑦ ᐅᖃᓪᓗᕆᒃᓴᕈᖕᓇᖅᑎᑦᑎᓚᐅᖅᑐᖅ ᐊᒻᒪᓗ ᖃᐅᔨᓗᒋᑦ ᒪᓕᒐᐃᑦ ᐊᒻᒪᓗ ᓯᕗᓪᓕᖅᐸᐅᑎᔭᐅᔭᕆᐊᓖᑦ ᒪᓕᒃᑎᑦᑎᓂᐊᖅᑐᑦ ᐊᑕᐅᑦᑎᒃᑯᑦ ᐱᕙᓪᓕᐊᓂᕐᒥᒃ ᑲᓇᑕᒥᑦ ᖃᓄᖅᑑᕆᓂᕐᒧᑦ ᐊᒻᒪᓗ ᖃᓄᐃᓕᐅᕈᑎᖃᕐᓂᕐᒧᑦ ᐸᕐᓇᐅᑎᒥᑦ ᖁᓕᑦ ᐅᑭᐅᓄᑦ-ᒧᑦ, ᐃᓚᓯᓂᐊᖅᑐᑦ ᑕᐅᑐᒐᐅᔪᓂᒃ ᐊᒻᒪᓗ ᐱᔭᕆᐊᖃᖅᑐᓂᒃ ᓄᓇᖃᖅᖄᖅᑐᑦ ᐃᓄᖕᓂᑦ ᐊᓯᖏᓐᓂᓪᓗ ᐃᓚᒋᔭᐅᔪᓂᒃ ᐃᓚᐅᖃᑕᐅᔪᑦ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᑲᓇᑕᒥᑦ.

ᐅᑉᓗᖅ 5 ᐱᒋᐊᓚᐅᖅᑐᖅ ᐅᖃᓪᓚᒃᖢᓂ ᐅᐱᓐᓇᖅᑐᖅ ᑭᐅᕈᓕᓐ ᐱᐊᓂᐊᑦ (Carolyn Bennet), ᒥᓂᔅᑕ ᑲᓇᑕ-ᓄᓇᖃᖅᖄᖅᑐᑦ ᐱᓕᕆᖃᑎᒌᒃᑯᓐᓄᑦ. ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓄᑦ ᐊᖓᔪᖅᖄᖑᔪᖅ, ᐊᖏᖃᑎᒌᒍᑎ (ᑐᕇᑎ - Treaty) 6, 7 ᐊᒻᒪᓗ 8-ᒧᑦ ᐅᐃᓪᑕᓐ ᓕᑐᓪᑦᓴᐃᓪᑦ (Wilton Littlechild) ᐅᖃᓪᓚᓚᐅᖅᑐᖅ ᐱᔾᔪᑎᖃᖅᑐᒥᒃ ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓄᑦ ᐅᑭᐅᖑᔪᒥᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐊᒻᒪᓗ ᐅᖃᐅᑎᑉᓗᒋᑦ ᖃᓄᖅ ᓯᕗᒻᒧᒋᐊᕈᖕᓇᕐᓂᖏᓐᓂᒃ ᖁᓕᑦ ᐅᑭᐅᑦ-ᒧᑦ. ᑐᒡᓕᐊ ᐅᖃᓪᓚᓚᐅᖅᑐᖅ ᐃᖢᐊᖅᓴᐃᔨ ᓗᐊᓇ ᐅᐊᓄᔅᑕ7 ᐅᐃᓕᐊᒻᔅ (Lorna Wanosts’a7 Williams) ᖃᐅᔨᑎᑦᑎᑉᓗᓂ ᐊᒻᒪᓗ ᐃᒪᓐᓈᖅᑐᐃᑉᓗᓂ ᖃᓄᐃᓕᐅᕈᑎᖃᕐᓂᕐᒧᑦ ᐸᕐᓇᐅᑎᒥᑦ ᖁᓕᑦ ᐅᑭᐅᑦ-ᒧᑦ.

ᒪᕐᕈᒃ ᑕᒪᓗᒃᑖᕐᒧᑦ ᑲᑎᒪᓂᖃᓚᐅᖅᑐᑦ ᐅᖃᓪᓚᒃᑐᖃᖅᖄᖅᑎᓪᓗᒍ. ᓯᕗᓕᖅ ᑕᒪᓗᒃᑖᖑᑉᓗᑎᒃ ᑲᑎᒪᓂᕐᒥᑦ ᑕᐅᑐᒐᖃᓚᐅᖅᑐᑦ ᐱᔭᐅᔪᒪᓇᔭᖅᑐᑦ ᖃᓄᐃᖓᓂᐅᔪᓄᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑲᓇᑕᒥᑦ ᐊᒻᒪᓗ ᐃᓱᐊᓂᑦ ᖁᓕᑦ ᐅᑭᐅᑦ. ᑐᒡᓕᐊ ᑕᒪᓗᒃᑖᖑᑉᓗᑎᒃ ᑲᑎᒪᓂᕐᒥᑦ ᐅᖃᐅᓯᖃᓚᐅᖅᑐᑦ ᑲᓇᑕᐅᑉ ᐊᑐᖅᑕᖓᓂᒃ ᖁᓕᑦ ᐅᑭᐅᑦ-ᒧᑦ.

ᐃᖢᐊᖅᓴᐃᔨ ᐅᐃᓪᑕᓐ ᓕᑐᓪᑦᓴᐃᓪᑦ (Wilton Littlechild) ᐅᖃᓚᐅᖅᑐᖅ ᓄᓇᖃᖅᖄᖅᑐᐃᑦ ᐃᓄᐃᑦ ᐃᓱᒪᒋᔭᖃᕆᐊᖃᖅᑐᑦ ᑲᓇᑕ ᖃᓄᐃᖓᔭᕆᐊᖃᕐᓂᖓᓄᑦ 2032-ᒥᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ. ᐅᖃᐅᓯᕆᓚᐅᖅᑕᖓ ᓄᓇᖃᖅᖄᖅᑐᑦ ᐃᓄᐃᑦ ᐊᐅᓚᑕᐅᓂᖃᖅᑐᓄᑦ ᐱᔪᖕᓇᐅᑎᖃᖅᑐᑦ ᐃᓚᐅᑉᓗᑎᒃ ᐱᔪᖕᓇᐅᑎ ᐃᖕᒥᖕᓂᒃ-ᖃᐅᔨᓂᕐᒧᑦ. ᐊᒃᑐᐊᓂᖃᖅᑎᓚᐅᖅᑕᖏᑦ ᖁᓕᑦ ᐅᑭᐅᑦ-ᒧᑦ ᐱᔭᒃᓴᐅᑕᐅᔪᑦ ᐊᒻᒪᓗ ᐋᖅᕿᖃᑎᒌᖕᓂᕐᒧᑦ ᐱᕙᓪᓕᐊᓂᖅ ᑲᓇᑕᒥᑦ ᑐᕌᖓᔪᖅ ᐋᖅᕿᖕᓂᐊᕐᓗᒋᑦ ᓯᖁᑉᑎᖅᓯᒪᔪᑦ ᐱᓕᕆᖃᑎᒌᖕᓂᖏᑦ, ᑲᑎᑎᑕᐅᓚᐅᖅᓯᒪᓂᖏᓐᓄᑦ ᐊᒻᒪᓗ ᖃᓄᐃᖓᓕᖅᑎᑦᑎᓂᖓ ᓄᓇᖃᖅᖄᖅᑐᑦ ᐃᓄᖕᓄᑦ (ᐋᓐᓂᐊᖃᖅᑕᐃᓕᒪᓂᖅ, ᐱᕈᖅᐸᓪᓕᐊᓂᖃᕐᓂᖅ, ᐅᖃᐅᓯᖅ, ᐊᒻᒪᓗ ᐃᓕᓐᓂᐊᕐᓂᖅ). ᐋᖅᕿᖃᑎᒌᖕᓂᖅ ᐊᔪᙱᑦᑐᒥᒃ ᑭᑐᑐᐃᓐᓇᕐᓅᖓᔪᒥᒃ ᐱᑕᖃᕆᐊᖃᖅᑐᖅ ᖃᐅᔨᒪᔭᐅᓂᕆᔭᖏᓐᓄᑦ ᓄᓇᖃᖅᖄᖅᑐᑦ ᐃᓄᐃᑦ ᐱᔪᖕᓇᐅᑎᖏᓐᓄᑦ ᐊᒻᒪᓗ ᓇᑭᙶᖅᓯᒪᓂᖏᓐᓄᑦ. ᐊᖓᔪᖅᖄᖅ ᓕᑐᓪᑦᓴᐃᓪᑦ (Littlechild) ᐅᖃᓚᐅᖅᑐᖅ ᐸᕐᓇᒃᐸᓪᓕᐊᔭᕆᐊᖃᖅᑐᑦ ᐃᓚᒋᔭᐅᔪᓄᑦ ᓄᓇᕐᔪᐊᕐᒥᑦ ᖃᓄᐃᓕᐅᕈᑎᖃᕐᓂᕐᒧᑦ ᐸᕐᓇᐅᑎᒥᑦ ᖁᓕᑦ ᐅᑭᐅᑦ-ᒧᑦ ᐊᒻᒪᓗ ᐊᑐᖅᑕᐅᓂᐊᕐᓗᓂ ᓯᕗᒻᒧᒋᐊᕐᓂᐊᕐᓗᑎᒃ, ᐊᑐᕐᓗᑎᒃ ᓇᓚᐅᑦᑎᔪᓂᒃ ᓈᓴᐅᑎᓂᒃ/ᑎᑎᖅᖃᓂᒃ, ᐆᒃᑐᕋᖅᑕᐅᔪᖕᓇᖅᑐᓂᒃ ᖃᓄᐃᖓᓂᐅᔪᓂᒃ, ᐱᒻᒪᕆᐅᓂᖏᑦ ᐃᒃᐱᖕᓇᖅᑐᓖᑦ ᐃᓂᐅᔪᑦ, ᐊᓂᕐᓂᒃᑯᑦ ᑲᑎᓐᓃᑦ ᐊᒻᒪᓗ ᑐᒃᓯᐊᕐᓂᕐᒧᑦ ᐊᑐᖅᑕᐅᖃᑦᑕᖅᑐᑦ. ᐊᖓᔪᖅᖄᖅ ᓕᑐᓪᑦᓴᐃᓪᑦ (Littlechild) ᖁᔭᓐᓇᒦᖅᑕᖏᑦ ᑲᑎᒪᔪᓂᑦ ᐃᓚᐅᖃᑕᐅᔪᑦ ᐊᑕᐅᑦᑎᒃᑰᖓᔪᒃᑯᑦ ᓯᓚᑐᓂᕆᔭᖏᓐᓂᑦ ᐊᒻᒪᓗ ᖃᐅᔨᒪᓂᕆᔭᖏᓐᓄᑦ ᐊᒻᒪᓗ ᐊᐱᕆᑉᓗᓂ ᖃᓄᖅ ᑕᒪᒃᑯᐊ ᓴᙱᓂᕆᔭᐅᔪᑦ ᐊᑐᖅᑕᐅᔪᖕᓇᕐᒪᖔᑕ ᐱᕙᓪᓕᐊᓂᐊᕐᓗᑎᒃ ᓄᓇᕐᔪᐊᕐᒧᑦ ᖃᓄᐃᓕᐅᕈᑎᖃᕐᓂᕐᒧᑦ ᐸᕐᓇᐅᑎᒥᑦ. ᐅᖃᓪᓚᖕᓂᓂ ᐱᐊᓂᓚᐅᖅᑕᖓ ᐅᖃᖅᖢᓂ ᖁᓕᑦ (10) ᐱᔾᔪᑕᐅᔪᓂᒃ ᓴᒡᒐᕉᑦ (ᔪᓚᐃ) 2020 ᑲᑎᓯᒪᔪᑦ ᓄᓇᖅᖃᑎᒌᑦ ᓛᔅ ᐱᓅᔅ (Los Pinos) ᐅᖃᕐᓂᕋᐅᑎᒧᑦ ᐊᑐᖅᑕᐅᔪᖕᓇᖅᑐᖅ ᓯᕗᓪᓕᖅᐸᐅᑎᔭᐅᔭᕆᐊᓕᖕᓄᑦ ᖁᓕᑦ ᐅᑭᐅᕐᒧᑦ.

ᐃᖢᐊᖅᓴᐃᔨ ᓗᐊᓇ ᐅᐊᓄᔅᑕ7 ᐅᐃᓕᐊᒻᔅ (Lorna Wanosts’a7 Williams) ᐅᖃᖅᑐᖅ ᓴᖅᕿᑕᐅᓂᕆᓚᐅᖅᑕᖓ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᖅ ᑲᒪᔭᖃᕐᓂᐊᕐᓗᓂ ᓄᓇᒋᔭᐅᔪᓗᒃᑖᒧᑦ ᐊᑐᕐᓂᐊᖅᑐᒥᒃ ᓱᓇᐃᑦ ᐃᓚᔭᐅᔭᕆᐊᖃᕐᒪᖔᑕ ᐱᖁᔭᕐᒧᑦ ᐊᒻᒪᓗ ᐊᑐᓕᖅᑎᑦᑎᓂᕐᒧᑦ ᐃᓱᒪᒃᓴᖅᓯᐅᕈᑕᐅᓗᑎᒃ. ᐅᖃᖅᖢᓂ ᐃᓕᓐᓂᐊᕐᓂᖅᑕᖃᐃᓐᓇᖅᑐᖅ ᐱᑕᖃᕈᖕᓃᖅᑎᓐᓂᐊᕐᓗᒋᑦ ᑲᑎᑎᑕᐅᓂᕐᒧᑦ ᐊᑐᖅᑕᐅᕙᒃᑐᑦ ᒐᕙᒪᒃᑯᓐᓄᑦ ᐊᒻᒪᓗ ᑭᑐᑐᐃᓐᓇᕐᓄᑦ ᐊᒻᒪᓗ ᐱᓕᕆᐊᒃᓴᖅᑕᖃᑦᑎᐊᖅᑐᖅ ᐆᒻᒪᖅᑎᑦᑎᒃᑲᓐᓂᕐᓂᐊᕐᓗᓂ ᐊᒻᒪᓗ ᐅᑎᖅᑎᓪᓗᒋᑦ ᐅᖃᐅᓯᑐᖃᕆᔭᐅᔪᑦ. ᐃᓚᒋᔭᐅᖃᑕᐅᔪᑦ ᐱᕈᐃᑎᑦᑎᔭᕆᐊᖃᖅᑐᑦ ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓄᑦ ᐅᑭᐅᖑᔪᒥᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ, ᐱᓕᕆᐊᖃᖅᐸᓪᓕᐊᑎᓪᓗᒋᑦ ᖁᓕᑦ ᐅᑭᐅᑦ-ᒧᑦ. ᓇᓗᓇᐃᖅᓯᑉᓗᓂ ᐸᕐᓇᐅᑎᑕᖃᕆᐊᖃᕐᓂᖓᓄᑦ ᐊᑐᓗᒃᑖᕐᓂᐊᕐᓗᒋᑦ ᐱᕕᖃᕐᓂᐅᔪᑦ ᑐᓂᔭᐅᓯᒪᔪᑦ ᖁᓕᑦ ᐅᑭᐅᑦ-ᒧᑦ.

ᒪᕐᕉᒃ ᐊᔾᔨᒌᙱᑦᑐᑦ ᑲᑎᒪᔪᓂᑦ ᐅᖃᓪᓗᕆᒃᓴᐅᑎᓂᕐᓂᑦ ᑲᒪᒋᔭᐅᑉᓗᓂ ᔩᓇ ᐅᐃᓪᓴᓐ (Gina Wilson), ᒥᓂᔅᑕᐅᑉ ᑐᖏᓕᖓ, ᐊᔾᔨᒌᙱᑦᑑᑕᐅᔪᓄᑦ ᐊᒻᒪᓗ ᐃᓚᐅᑎᑕᐅᓂᖏᑦ ᐊᒻᒪᓗ ᒪᒃᑯᒃᑐᐃᑦ ᐊᒻᒪᓗ ᐊᖓᔪᒃᖡᑦ ᐃᓚᒋᔭᐅᔪᑦ ᒥᓂᔅᑕᒧᑦ ᑐᖏᓕᖓᓄᑦ ᑲᓇᑕᒥᑦ ᐱᖅᖁᓯᓕᕆᔨᒃᑯᓐᓄᑦ, ᑲᑎᒪᔪᑦ ᐊᖏᔪᒥᒃ ᑐᓂᐅᑎᒐᒃᓴᖃᓚᐅᖅᑐᑦ ᖁᓕᑦ ᐅᑭᐅᑦ ᒥᒃᓵᓄᑦ.

ᒥᓂᔅᑕ ᑭᓕᐅᕋ ᒨᕆᓐ ᑖᓪ ᑰᓪ (Clara Morin Dal Col), ᑕᐃᑉᓱᒪᓂᑕᓕᕆᔨᒃᑯᓐᓄᑦ, ᖃᑕᙳᑎᒌᓕᕆᔨᒃᑯᓐᓄᑦ ᐊᒻᒪᓗ ᐱᖅᖁᓯᓕᕆᔨᒃᑯᓐᓄᑦ, MNC, ᐅᖃᖅᑐᖅ 2032-ᖑᓕᖅᐸᑦ, ᒦᑏ ᓄᓇᖅᖃᑎᒌᑦ ᑕᑯᔪᒪᔪᑦ ᐱᕙᓪᓕᐊᓂᖃᑦᑎᐊᖅᑐᒥᑦ ᒥᑦᓯᕝ (Michif) ᐅᖃᐅᓯᖅ ᐅᑎᕐᓂᖓᓄᑦ; ᐊᒥᓱᙳᕆᐊᕐᓗᑎᒃ ᓄᑖᑦ ᐅᖃᓪᓚᒃᑏᑦ ᓇᓃᓐᓂᓗᒃᑖᖓᓂᑦ ᐅᖃᖅᑕᐅᔪᖕᓇᕐᓂᖓᑕ; ᐊᒻᒪᓗ ᓴᙱᔪᒥᒃ ᑐᙵᕕᓕᐅᕐᓗᑎᒃ ᐆᒻᒪᖅᑎᓐᓂᐊᕐᓗᒍ ᒥᑦᓯᕝ (Michif) ᐅᖃᐅᓯᖅ.

ᕈᑦ ᖃᕕᐅᖅ, ᐊᖓᔪᖅᖄᖑᓚᐅᖅᑐᖅ ᐃᓅᖃᑎᒌᓄᑦ ᐃᓄᐃᑦ ᒪᒃᑯᒃᑐᓄᑦ ᑲᑎᒪᔨᒃᑯᓐᓄᑦ (NIYC), ᐊᐱᕆᔭᖏᑦ ᑲᑎᒪᔪᓂᑦ ᐃᓚᐅᖃᑕᐅᔪᑦ ᑕᐅᑐᕐᕉᖁᑉᓗᒋᑦ ᓄᓇᓕᖓ ᖃᓄᐃᑦᑑᓚᐅᕐᒪᖔᑦ ᑕᐃᑉᓱᒪᓂ ᐊᒻᒪᓗ ᐅᖃᖅᖢᓂ, ᐅᖃᐅᓯᖅ ᐊᑐᖅᑕᐅᓂᖓ ᐱᔾᔪᑎᒋᑉᓗᒍ, ᑕᒪᓐᓇ ᓂᕆᐅᒋᔭᖓ ᓯᕗᓂᒃᓴᒧᑦ. ᒥᔅ ᖃᕕᐅᖅ ᑕᑯᔪᒪᔪᖅ ᐃᓄᒃᑎᑐᑦ ᐃᓕᑕᕆᔭᐅᓗᓂ ᐊᑐᖅᑕᐅᔪᑦ ᐅᖃᐅᓯᑎᑐᑦ ᑲᓇᑕᒥᑦ ᐊᓯᖏᓐᓂᓗ ᓄᓇᒋᔭᐅᔪᓂᑦ.

ᐊᖓᔪᖅᖄᖅ ᑯᕆᔅᑐᓪ ᒫᑎᓐ-ᓚᐱᐊᓐᔅᑭ (Crystal Martin-Lapenskie), ᐃᓅᖃᑎᒌᓄᑦ ᐃᓄᐃᑦ ᒪᒃᑯᒃᑐᓄᑦ ᑲᑎᒪᔨᓂᑦ, ᐅᖃᖅᑐᖅ ᐃᓄᒃᑎᑐᑦ ᓴᙱᔫᖏᓐᓇᖅᑎᓪᓗᒍ ᐊᒥᓱᓂᑦ ᓄᓇᓕᖕᓂᑦ, ᐊᒃᓱᕈᕐᓇᐅᑏᑦ ᐊᓯᐅᔨᑦᑕᐃᓕᓂᕐᒧᑦ ᐅᖃᐅᓯᕐᒥᑦ ᐊᒻᒪᓗ ᐅᓗᕆᐊᓇᕐᓂᖃᖅᑐᑦ ᑕᐃᒪᐅᔪᑦ ᖃᓂᑦᑐᓂᑦ ᓄᓇᓂᑦ ᐅᖃᐅᓯᕆᔭᐅᔪᑦ ᐅᔾᔨᕆᔭᐅᖃᑦᑕᙱᑦᑐᑦ ᐊᓯᐅᔨᔭᐅᕙᓪᓕᐊᓂᖏᓐᓄᑦ. ᐅᖃᓪᓚᒃᖢᓂᓗ ᓇᖕᒥᓂᖅ ᐊᑐᖅᓯᒪᔭᖓᓂᑦ ᐃᓄᒃᑎᑐᑦ ᐅᖃᓪᓚᒃᑎᐅᑉᓗᓂ; ᐃᓄᒃᑎᑐᐃᓐᓇᖅ ᐅᖃᓪᓚᒍᖕᓇᓚᐅᖅᖢᓂ, ᐅᖃᐅᓯᕐᒥᒃ ᐊᔪᙱᓐᓂᖏᑦ ᑯᑕᒃᑐᑎᑑᖅᑐᖅ. ᐅᖃᖅᑐᖅ ᐊᔪᙱᑐᐃᓐᓇᓚᐅᕐᓂᕋᖅᖢᓂ ᐅᖃᓪᓚᒡᓗᓂ ᐃᓄᒃᑎᑐᑦ ᐊᓂᖓ ᐊᓯᐊᔨᑦᑎᐊᖅᑕᖓ ᐃᓄᒃᑎᑐᑦ ᐅᖃᐅᓯᖓ. ᐊᓯᐅᔨᓂᖅ ᐅᖃᐅᓯᕐᒥᒃ ᐃᓱᒫᓘᑕᐅᔪᖅ ᐱᓗᐊᖅᑐᒥᑦ ᐃᓄᖕᓄᑦ ᖃᑉᓗᓈᓄᑦ ᓄᖃᑦᑕᖅᑐᓄᑦ ᐱᔭᕆᐊᖃᖅᑐᓂᒃ ᐱᔭᐅᔭᕆᐊᓕᖕᓄᑦ ᑐᕌᖓᔪᓄᑦ, ᐱᔨᑦᑎᕋᐅᑎᓄᑦ ᐊᒻᒪᓗ ᐋᓐᓂᐊᖃᖅᑕᐃᓕᒪᓂᕐᒧᑦ ᑲᒪᔭᐅᓂᕐᒧᑦ.

ᐊᖓᔪᖅᖄᖅ ᑭᓚᒥᐊᓐᑦ ᑦᓵᑎᐅᕐ (Clément Chartier), MNC-ᑯᓐᓂᑦ ᓄᓇᖃᖅᖄᖅᑐᑦ ᐃᓄᐃᑦ ᐊᒥᓱᓂᒃ ᐊᑕᐅᓯᐅᖓᔪᒥᑦ ᐃᓱᒫᓘᑎᖃᖅᑐᑦ ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᐅᖃᐅᓯᑐᖃᖏᓐᓂᑦ. ᐊᑐᖅᑕᐅᖃᑦᑕᖅᑐᑦ ᐊᒻᒪᓗ ᐋᖅᕿᐅᒪᔪᑦ ᐱᕙᓪᓕᐊᔭᐅᔪᑦ ᓄᓇᕐᔪᐊᕐᒥᑦ ᐆᒻᒪᖅᑎᑦᑎᒃᑲᓐᓂᕐᓂᐊᕐᓗᑎᒃ ᐊᒻᒪᓗ ᐊᓯᐅᔨᔭᐅᑦᑕᐃᓕᓗᒍ ᓄᓇᖃᖅᖄᖅᑐᑦ ᐅᖃᐅᓯᖏᑦ ᐊᑐᓕᖅᑎᑕᐅᔪᖕᓇᖅᑐᑦ ᓄᓇᖃᖅᖄᖅᑐᑦ ᐃᓄᖕᓄᑦ ᑲᓇᑕᒥᑦ.

ᓯᐹᔅᑎᐊᓐ ᒎᐳᓪ (Sébastien Goupil), ᑎᑎᕋᖅᑎ, ᑲᓇᑕᒥᑦ ᑲᑎᒪᔩᑦ UNESCO-ᑯᓐᓄᑦ, ᐅᖃᖅᑐᖅ, ᐱᓕᕆᐊᖏᑦᑎᒍᑦ 2019 ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓄᑦ ᐅᑭᐅᖑᔪᒧᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ, ᐃᓕᑦᑎᓚᐅᖅᑐᑦ, ᐱᖅᖁᓯᕆᔭᐅᔪᖅ ᐊᒻᒪᓗ ᐅᖃᐅᓯᕆᔭᐅᔪᖅ ᐆᒪᑎᓐᓂᐊᕐᓗᒍ, ᐱᔭᕆᐊᖃᖅᑐᖅ ᓇᓚᐅᑦᑖᖅᑕᐅᔪᖕᓇᖅᑐᒥᒃ, ᐊᔪᙱᓐᓂᐊᖅᑐᒥᒃ ᐊᒻᒪᓗ ᖃᓄᑐᐃᓐᓈᕈᖕᓇᖅᑐᒥᒃ ᑮᓇᐅᔭᖃᖅᑎᑕᐅᓗᑎᒃ. ᓄᓇᖃᖅᖄᖅᑐᑦ ᐱᖅᖁᓯᖏᑦ ᐊᒻᒪᓗ ᐅᖃᐅᓯᖏᑦ ᐱᔭᕆᐊᖃᖅᑐᑦ ᐊᔪᙱᓐᓂᐊᖅᑐᒃᑯᑦ ᐃᑲᔪᖅᑕᐅᓗᑎᒃ ᓇᓃᓐᓂᐅᔪᓗᒃᑖᒃᑯᑦ ᒐᕙᒪᐅᔪᓂᑦ. ᐊᒻᒪᓗ ᒐᕙᒪᐅᔪᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ ᓯᕗᓪᓕᖅᐸᐅᑎᑦᑎᔭᕆᐊᖃᖅᑐᑦ, ᐅᖃᖅᖢᓂᓗ ᒐᕙᒪᐅᔪᑦ ᐱᔭᒃᓴᐅᑎᖃᓚᐅᕐᒥᔪᑦ ᐋᖅᕿᒋᐊᕐᓂᐊᕐᓗᒋᑦ ᐋᓐᓂᖅᓯᓂᐅᔪᑦ ᓄᓇᖃᖅᖄᖅᑐᑦ ᐱᖅᖁᓯᖏᓐᓄᑦ. ᖁᓕᑦ ᐅᑭᐅᑦ ᐱᕕᖃᖅᑎᑦᑎᓂᐅᔪᖅ ᑲᓇᑕᒧᑦ ᐋᖅᕿᒃᓯᓂᐊᕐᓗᑎᒃ ᐆᒃᑑᑎᒥᒃ ᐊᒻᒪᓗ ᖃᓄᐃᖓᓂᐅᔪᓂᒃ ᒥᐊᓂᕆᓂᐊᕐᓗᒋᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ.

ᑲᑎᒪᓂᖅ ᐃᓱᓕᓚᐅᖅᑐᖅ ᐅᒃᑯᐊᖅᐸᓪᓕᐊᑉᓗᑎᒃ ᐅᖃᓪᓚᒃᑐᓂᒃ ᒥᓂᔅᑕ ᑲᓇᑕᒥᑦ ᐱᖅᖁᓯᕆᔭᐅᔪᓕᕆᔨᒃᑯᓂᑦ, ᐅᐱᓐᓇᖅᑐᖅ ᓯᑏᕕᓐ ᒋᐅᓪᐹᓪᑦ (Steven Guilbeault), ᐊᖓᔪᖅᖄᑉ ᑐᖏᓕᖓ ᐊᒻᒪᓗ ᓄᓇᖅᖃᑎᒌᒃᑐᓄᑦ ᐅᖃᓪᓚᒃᑎᐅᑎᑕᐅᔪᖅ ᑕᐃᕕᑎ ᓵᑐᕌᓐ (David Chartrand), ᒦᑏ ᓄᓇᖅᖃᑎᒌᑦ ᑲᑎᒪᔨᖏᓐᓂᑦ ᐊᒻᒪᓗ ᐊᖓᔪᖅᖄᖅ ᓇᑖᓐ ᐅᐱᐊᑦ (Natan Obed) ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂᑦ. ᒥᓂᔅᑕ ᐊᒻᒪᓗ ᓄᓇᖅᖃᑎᒌᒃᑐᓄᑦ ᓯᕗᓕᐅᖅᑎᐅᔪᑦ ᐃᓱᒪᒋᔭᕐᒥᖕᓂᒃ ᑐᓂᓯᓚᐅᖅᑐᑦ ᓯᕗᒻᒧᖕᓂᐊᕐᓗᑎᒃ ᒪᓕᒡᓗᒋᑦ ᑐᓴᖅᑕᐅᓚᐅᖅᑐᑦ ᐱᓇᓱᐊᕈᓯᕐᒥᑦ. ᐃᓚᐅᖃᑕᐅᔪᑦ ᑐᓵᔪᖕᓇᓚᐅᕐᒥᔪᑦ 2019-ᒥᑦ ᐱᓕᕆᐊᖑᔪᓂᑦ ᓄᓇᖅᖃᑎᒌᒃᑐᓄᑦ ᐊᖓᔪᖅᖄᖅ ᐱᐅᕆ ᐱᐊᓚᒑᕐᑦ (Perry Bellegarde) ᑲᑎᓯᒪᔪᑦ ᓄᓇᖅᖃᑎᒌᑦ ᑲᑎᒪᔨᓄᑦ ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓄᑦ ᐅᑭᐅᖑᔪᒥᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑲᑎᒪᓂᕐᒥᑦ. ᐃᖅᕿᓖᑦ ᓄᓇᖅᖃᑎᒌᓄᑦ ᐃᓐᓇᕆᔭᐅᔪᑦ ᒪᐃᒃ ᒥᑦᓱᓪ (Mike Mitchell) ᐊᒻᒪᓗ ᕈᐊᐴᑕ ᐅᔅᑲᐱᐅᐊᓯᓐᔅ-ᒧᑦ (Roberta Oshkabewisens), ᒦᑏ ᓄᓇᖅᖃᑎᒌᓄᑦ ᐃᓐᓇᕆᔭᐅᔪᖅ ᐊᒻᒪᓗ ᕘᓇ ᑎᒫᓐᑎᒡᓂ (Verna DeMontigny) ᐃᓐᓇᕆᔭᐅᔪᖅ ᕉᔅ ᐅᐊᐅᐊᑎ (Rose Wawatie) ᑐᓂᓯᓚᐅᖅᑐᑦ ᐅᒃᑯᐊᖅᐸᓪᓕᐊᓂᕐᒧᑦ ᒪᓕᒃᑕᐅᔪᓂᒃ ᐊᒻᒪᓗ ᑐᒃᓯᐊᓚᐅᖅᑐᑦ.

ᐅᑉᓗᖅ 5 ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓄᑦ ᖁᓕᑦ ᐅᑭᐅᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᔭᐅᓗᐊᓚᐅᖅᑐᑦ:

• ᐃᓱᓕᑎᓪᓗᒍ ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓄᑦ ᖁᓕᑦ ᐅᑭᐅᑦ, ᓄᓇᖃᖅᖄᖅᑐᑦ ᐃᓄᖏᑦ ᑕᑯᔪᒪᓚᐅᖅᑐᑦ ᐅᖃᐅᓯᖏᑦ ᐅᖃᓪᓚᒃᑕᐅᑦᑎᐊᕈᖕᓇᕐᓗᑎᒃ. ᐅᖃᐅᓯᖅ ᑭᖑᕚᖏᓐᓄᐊᖅᑕᐅᔭᕆᐊᖃᖅᑐᖅ ᐊᒻᒪᓗ ᓴᙱᒃᑎᑎᓪᓗᒍ ᓄᓇᓕᖏᓐᓂᑦ ᐃᓐᓇᕆᔭᐅᔪᑦ ᐱᑕᖃᕈᖕᓃᖅᓯᒪᓕᕋᓗᐊᖅᑎᓪᓗᒋᑦ.
• ᓄᓇᖃᖅᖄᖅᑐᑦ ᐃᓄᐃᑦ ᐊᒥᓱᓂᒃ ᓄᓇᕐᔪᐊᕐᒥᑦ ᐊᔾᔨᒌᒃᑐᓂᒃ ᐃᓱᒫᓘᑎᖃᖅᑐᑦ ᐆᒻᒪᖅᑎᑕᐅᒃᑲᓐᓂᕐᓂᖓᓄᑦ ᐅᖃᐅᓯᖏᑦ. ᐊᑐᖅᑕᐅᔪᖕᓇᖅᑐᑦ ᐊᒻᒪᓗ ᐋᖅᕿᐅᒪᔪᑦ ᐱᕙᓪᓕᐊᔭᐅᔪᑦ ᓄᓇᕐᔪᐊᕐᒥᑦ ᐆᒻᒪᖅᑎᒃᑲᓐᓂᖁᑉᓗᒍ ᐊᒻᒪᓗ ᐊᓯᐅᔨᑦᑕᐃᓕᓗᒋᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ ᐋᖅᕿᒋᐊᖅᑕᐅᔪᖕᓇᖅᑐᑦ ᐊᒻᒪᓗ ᐊᔪᙱᓐᓂᐊᕐᓗᑎᒃ ᓄᓇᖃᖅᖄᖅᑐᑦ ᐃᓄᖕᓄᑦ ᑲᓇᑕᒥᑦ;
• ᓯᕗᓕᐅᖅᑎᐅᓂᖏᑦ ᐊᒻᒪᓗ ᐱᓕᕆᐊᖃᕋᓱᖕᓂᖏᑦ ᓄᓇᖃᖅᖄᖅᑐᑦ ᐃᓄᐃᑦ ᑲᓇᑕᒥᑦ ᐃᓂᓕᐅᕆᓂᕐᒧᑦ ᐱᓕᕆᐊᖃᓚᐅᖅᑐᑦ ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓄᑦ ᐅᑭᐅᖑᔪᒥᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐊᒻᒪᓗ ᖁᓕᑦ ᐅᑭᐅᑦ-ᒧᑦ ᐃᓕᑕᕆᔭᐅᓯᒪᔭᕆᐊᖃᖅᑐᑦ ᐊᒻᒪᓗ ᐃᑲᔪᖅᑐᖅᑕᐅᓗᑎᒃ ᓯᕗᒻᒧᒃᑎᓪᓗᒋᑦ.
• ᖁᕕᐊᓲᑎᒋᓗᒍ ᐊᒻᒪᓗ ᐃᓕᑕᕆᔭᐅᓗᑎᒃ ᐆᒪᑎᓐᓂᖏᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ ᓄᓇᓕᖕᒥᑦ, ᓄᓇᖅᖃᑎᒌᓂᑦ ᐊᒻᒪᓗ ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᒃᑐᓂᑦ. ᐅᖃᖅᓯᒪᓂᖓ ᖁᓕᑦ ᐅᑭᐅᑦ-ᒥᑦ ᑕᐅᑐᒐᖃᕆᐊᖃᖅᑐᖅ ᐆᒪᓂᕆᔭᖓᓂᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᑦ. ᑕᑯᔭᐅᔪᒪᔪᑦ ᖃᓄᐃᖓᓂᐅᔪᑦ ᐃᓱᐊᓂᑦ ᖁᓕᑦ ᐅᑭᐅᑦ ᐃᓚᐅᔭᕆᐊᖃᖅᑐᖅ ᐊᒥᓱᙳᕆᐊᖅᓯᒪᓗᑎᒃ ᐅᖃᓪᓚᒃᑎᐅᔪᑦ ᓇᓃᓐᓂᐅᔪᓗᒃᑖᓂᒃ ᐅᖃᓪᓚᒃᑕᐅᓂᖓᑕ ᐊᒻᒪᓗ ᐊᑐᖅᑕᐅᓂᖓ ᓄᓇᖃᖅᖄᖅᑐᑦ ᐅᖃᐅᓯᖏᑦ ᐃᓅᓯᕆᔭᐅᔪᓗᒃᑖᓂᒃ;
• ᖁᓕᑦ ᐅᑭᐅᑦ ᑕᑯᒃᓴᐅᑎᑦᑎᔪᖅ ᐱᕕᖃᖅᑎᑦᑎᓂᕐᒥᒃ ᑲᓇᑕᒧᑦ ᐋᖅᕿᒃᓯᓂᐊᕐᓗᑎᒃ ᐆᒃᑑᑕᐅᔪᒥᒃ ᒪᕐᕉᒃ ᐊᒥᓲᓂᖅᓴᓂᒡᓘᓐᓃᑦ ᓄᓇᖅᖃᑎᒌᒃᑐᓂᑦ;
• ᑕᒪᓗᒃᑖᖅ ᐸᕐᓇᐅᑏᑦ ᒪᕐᕉᒃ ᐊᒥᓲᓂᖅᓴᐃᓪᓘᓐᓃᑦ ᓄᓇᖅᖃᑎᒌᓂᑦ ᖁᓕᑦ ᐅᑭᐅᑦ-ᒧᑦ ᓴᖅᕿᑦᑎᖃᑕᐅᑎᑦᑎᔭᕆᐊᖃᖅᑐᑦ ᐱᔪᖕᓇᐅᑎᖃᖅᑐᓂᒃ ᐊᒻᒪᓗ ᐊᔾᔨᒌᙱᑦᑐᓂᒃ ᐃᓚᒋᔭᐅᖃᑕᐅᔪᓂᒃ ᐊᒻᒪᓗ ᐃᓚᐅᑎᓪᓗᒋᑦ ᑐᕌᒐᐅᔪᑦ ᐱᒋᐊᖅᑎᑦᑎᔪᒃᓴᐅᑕᐅᔪᑦ ᐊᒻᒪᓗ ᐱᔪᒪᓕᖅᑎᑦᑎᓂᖃᕐᓗᑎᒃ. ᓄᓇᖅᖃᑎᒌᑦ ᑐᑭᒧᐊᒃᑎᕆᓂᕐᒧᑦ ᑲᑎᕐᒪᔪᑦ ᓴᖅᕿᑦᑎᔭᕆᐊᖃᖅᑐᑦ ᐃᑲᔪᕐᓂᐊᖅᑐᒥᒃ ᐱᔭᒃᓴᐅᑎᒋᔭᖓᓂᒃ ᖁᓕᑦ ᐅᑭᐅᑦ ᑲᓇᑕᒥᑦ.

ᓇᓗᓇᐃᖅᑕᐅᓂᖓ

ᐅᑉᓗᖅ 1 - ᒪᓐᑎ ᑕᖅᖀᓐᓇᕐᔪᐊᖅ (ᔭᓄᐊᕆ) 25, 2021

1 : 00 ᑐᙵᓱᒃᑎᑦᑎᓂᖅ ᐊᒻᒪᓗ ᓄᓇᒥᒃ ᓇᓗᓇᐃᖅᓯᓂᖅ

• ᕉᔅ ᐅᐊᐅᐊᑎ (Rose Wawatie), ᑭᑎᒐᓐ ᔨᐱ ᐊᓂᓯᓂᐊᐱᐊᒡ-ᒥᑦ (Kitigan Zibi Anishinabeg)

1 : 05 ᐅᒃᑯᐃᖅᓯᓂᕐᒧᑦ ᑐᒃᓯᐊᕐᓃᑦ: ᐃᖅᑭᓖᑦ, ᐃᓄᐃᑦ ᐊᒻᒪᓗ ᒦᑏ

• ᒪᐃᒃ ᒥᑦᓱᓪ (Mike Mitchell), AFN-ᒥᑦ ᐃᓐᓇᕆᔭᐅᔪᖅ-ᖃᐅᔨᒪᓂᖃᖅᑐᖅ
• ᑕᐃᕕᑎ ᓯᖁᐊᖅ, ᐃᓄᒃ ᐃᓐᓇᕆᔭᐅᔪᖅ
• ᕘᓇ ᑎᒫᓐᑎᒡᓂ (Verna DeMontigny), ᒦᑏ ᓄᓇᖅᖃᑎᒌᓄᑦ ᐃᓐᓇᕆᔭᐅᔪᖅ

1 : 15 ᑐᙵᓱᒃᑎᑦᑎᑉᓗᑎᒃ

ᐅᖃᓪᓚᒃᑐᑦ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

ᐅᖃᓪᓚᒃᑏᑦ

• ᐅᐱᓐᓇᖅᑐᖅ ᓯᑏᕕᓐ ᒋᐅᓪᐹᓪᑦ (Steven Guilbeault), ᒥᓂᔅᑕ ᑲᓇᑕᒥᑦ ᐱᖅᖁᓯᓕᕆᔨᒃᑯᓐᓄᑦ
• ᓄᓇᖅᖃᑎᒌᒃᑐᓄᑦ ᐊᖓᔪᖅᖄᖅ ᐱᐅᕆ ᐱᐊᓚᒑᕐᑦ (Perry Bellegarde), ᑲᑎᒪᔩᑦ ᐃᖅᕿᓖᑦ ᓄᓇᖅᖃᑎᒌᒃᑯᓐᓄᑦ
• ᐊᖓᔪᖅᖄᖅ ᓇᑖᓐ ᐅᐱᐊᑦ (Natan Obed) ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂᑦ
• ᐊᖓᔪᖅᖄᖅ ᑭᓚᒥᐊᓐᑦ ᑦᓵᑎᐅᕐ (Clément Chartier), ᒦᑏ ᓄᓇᖅᖃᑎᒌᑦ ᑲᑎᒪᔨᖏᓐᓂᑦ

2 : 00 ᑎᑎᕋᖅᓯᒪᔪᖅ ᑐᕌᖓᔪᒥᑦ ᐊᒻᒪᓗ ᑲᑎᒪᓂᕐᒥᒃ

ᑲᒪᔭᒋᔭᐅᔭᕆᐊᓖᑦ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

2 : 15

ᐅᖃᓪᓚᒃᑎ ᐱᓕᕆᐊᖃᖅᑐᖅ ᐱᕙᓪᓕᐊᓂᐅᑉ ᒥᒃᓵᓄᑦ ᐊᑐᓕᖅᑎᑕᐅᓂᖓᑕ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᐱᖁᔭᖅ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

ᐱᔾᔪᑕᐅᔫᑉ ᒥᒃᓵᓄᑦ ᐅᖃᓪᓚᒃᑎ

• ᐹᓪ ᐱᓚᑎᐄ (Paul Pelletier), ᐊᖓᔪᖅᖄᖅ ᓄᓇᖃᖅᖄᖅᑐᑦ ᐅᖃᐅᓯᓕᕆᔨᒃᑯᖏᓐᓂᑦ, ᑲᓇᑕᒥᑦ ᐱᖅᖁᓯᓕᕆᔨᒃᑯᑦ

ᑕᒪᐃᓐᓄᑦ ᐊᐱᖅᖁᑎᒃᓴᓕᖕᓄᑦ

ᐅᑉᓗᖅ 2 - ᑐᒡᓕᐊ ᑕᖅᖀᓐᓇᕐᔪᐊᖅ (ᔭᓄᐊᕆ) 26, 2021

11 : 30 ᐅᒃᑯᐃᖅᓯᓂᕐᒧᑦ ᑐᒃᓯᐊᕐᓃᑦ: ᐃᓄᐃᑦ, ᒦᑏ ᐊᒻᒪᓗ ᐃᖅᑭᓖᑦ

• ᔨᒥ ᑐᕌᑦᓱᕐ-ᒧᑦ (Jimmy Durocher), ᒦᑏ ᓄᓇᖅᖃᑎᒌᓄᑦ ᐃᓐᓇᕆᔭᐅᔪᖅ
• ᑕᐃᕕᑎ ᓯᖁᐊᖅ, ᐃᓄᒃ ᐃᓐᓇᕆᔭᐅᔪᖅ
• ᒪᐃᒃ ᒥᑦᓱᓪ (Mike Mitchell), AFN-ᒥᑦ ᐃᓐᓇᕆᔭᐅᔪᖅ-ᖃᐅᔨᒪᓂᖃᖅᑐᖅ

11 : 40 ᐅᖃᓪᓚᒃᑐᖅ ᑭᒡᒐᖅᑐᐃᔪᖅ ᑲᓇᑕᒥᑦ ᒐᕙᒪᒃᑯᓐᓂᑦ

ᐅᖃᓪᓚᒃᑎ

• ᒋᐅᕆ ᐊᓇᓐᑕᓴᖓᕇ-ᒧᑦ (Gary Anandasangaree), ᒪᓕᒐᓕᐅᕐᕕᒡᔪᐊᕐᒧᑦ ᑎᑎᕋᖅᑎ ᒥᓂᔅᑕᒧᑦ ᑲᓇᑕ-ᓄᓇᖃᖅᖄᖅᑐᑦ ᐱᓕᕆᖃᑎᒌᒃᑯᓐᓄᑦ.

11 : 45 ᐱᔾᔪᑕᐅᔪᒥᒃ ᐅᖃᐅᓯᖃᖅᑐᑦ

ᐱᐅᓛᑦ ᐊᑐᖅᑕᐅᖃᑦᑕᖅᑐᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ: ᐅᑎᖅᑎᑦᑎᓂᖅ, ᐆᒻᒪᖅᑎᑦᑎᒃᑲᓐᓂᕐᓂᖅ, ᐱᓕᕆᐊᖑᓂᖓᖓ ᐊᒻᒪᓗ ᓴᙱᒃᑎᑎᕆᓂᖅ

ᑲᒪᔨᐅᔪᖅ

• ᒋᐅᕆ ᐊᓇᓐᑕᓴᖓᕇ-ᒧᑦ (Gary Anandasangaree), ᒪᓕᒐᓕᐅᕐᕕᒡᔪᐊᕐᒧᑦ ᑎᑎᕋᖅᑎ ᒥᓂᔅᑕᒧᑦ ᑲᓇᑕ-ᓄᓇᖃᖅᖄᖅᑐᑦ ᐱᓕᕆᖃᑎᒌᒃᑯᓐᓄᑦ.

ᐱᔾᔪᑕᐅᔫᑉ ᒥᒃᓵᓄᑦ ᐅᖃᓪᓚᒃᑎ

• ᐃᖢᐊᖅᓴᐃᔨ ᓗᐊᓇ ᐅᐊᓄᔅᑕ7 ᐅᐃᓕᐊᒻᔅ (Lorna Wanosts’a7 Williams)

12 : 15 ᐱᐅᓛᑦ ᐊᑐᖅᑕᐅᖃᑦᑕᖅᑐᑦ ᑲᑎᒪᖃᑕᐅᔪᓗᒃᑖᑦ: ᐅᖃᐅᓯᖏᓐᓄᑦ: ᐅᑎᖅᑎᑦᑎᓂᖅ, ᐆᒻᒪᖅᑎᑦᑎᒃᑲᓐᓂᕐᓂᖅ, ᐱᓕᕆᐊᖑᓂᖓᖓ ᐊᒻᒪᓗ ᓴᙱᒃᑎᑎᕆᓂᖅ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᑦ

ᑲᒪᔨᐅᔪᖅ

• ᒋᐅᕆ ᐊᓇᓐᑕᓴᖓᕇ-ᒧᑦ (Gary Anandasangaree), ᒪᓕᒐᓕᐅᕐᕕᒡᔪᐊᕐᒧᑦ ᑎᑎᕋᖅᑎ ᒥᓂᔅᑕᒧᑦ ᑲᓇᑕ-ᓄᓇᖃᖅᖄᖅᑐᑦ ᐱᓕᕆᖃᑎᒌᒃᑯᓐᓄᑦ.

ᑲᑎᒪᔩᑦ

• ᐃᖢᐊᖅᓴᐃᔨ ᐋᓚᓐ ᑯᐊᕐᐱᐅᕐ-ᒥᑦ (Alan Corbiere), ᔪᐊᒃ ᓯᓚᑦᑐᖅᓴᕐᕕᒡᔪᐊᕐᒥᑦ
• ᓯᐅᕆᓐ ᐸᕆᐊᓐᑑ-ᒥᑦ (Sharon Parenteau), ᓗᐃ ᕆᐅᓪ ᐱᓕᕆᕝᕕᖕᒥᑦ

3 : 00 ᑕᒪᓗᒃᑖᕐᒧᑦ ᐅᒃᑯᐊᖅᐸᓪᓕᐊᓂᖅ ᐱᐅᓛᑦ

ᐊᑐᖅᑕᐅᖃᑦᑕᖅᑐᑦ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

ᐅᑉᓗᖅ 3 - ᕿᑎᐊ ᑕᖅᖀᓐᓇᕐᔪᐊᖅ (ᔭᓄᐊᕆ) 27, 2021

11 : 30 ᐅᒃᑯᐃᖅᓯᓂᕐᒧᑦ ᑐᒃᓯᐊᕐᓃᑦ: ᒦᑏ, ᐃᖅᑭᓖᑦ ᐊᒻᒪᓗ ᐃᓄᐃᑦ

• ᑕᐃᕕᑎ ᓯᖁᐊᖅ, ᐃᓄᒃ ᐃᓐᓇᕆᔭᐅᔪᖅ
• ᒪᐃᒃ ᒥᑦᓱᓪ (Mike Mitchell), AFN-ᒥᑦ ᐃᓐᓇᕆᔭᐅᔪᖅ-ᖃᐅᔨᒪᓂᖃᖅᑐᖅ
• ᐊᓇᑦ ᒨᕆᔅ (Annette Maurice), ᒦᑏ ᓄᓇᖅᖃᑎᒌᓂᑦ ᐃᓐᓇᕆᔭᐅᔪᖅ

11 : 40 ᐅᖃᓪᓚᒃᑐᖅ ᑭᒡᒐᖅᑐᐃᔪᖅ ᑲᓇᑕᒥᑦ ᒐᕙᒪᒃᑯᓐᓂᑦ

ᐅᖃᓪᓚᒃᑎ

• ᑦᓵᕈᓪᔅ ᓯᓘᕕ (Charles Slowey), ᒥᓂᔅᑕᐅᑉ ᑐᖏᓕᖓ, ᓄᓇᓕᖕᒧᑦ ᐊᒻᒪᓗ ᐃᓕᑕᖅᓯᓂᕐᒧᑦ ᐱᓕᕆᐊᓖᑦ, ᑲᓇᑕᒥᑦ ᐱᖅᖁᓯᓕᕆᔨᒃᑯ

11 : 45 ᓇᐃᓈᖅᓯᒪᔪᖅ ᑐᓴᓚᐅᖅᑕᑉᑎᖕᓂᑦ ᐅᖃᖃᑎᖃᕐᓂᕐᒧᑦ ᑲᑎᒪᓂᕐᓂᑦ ᑮᓇᐅᔭᖃᖅᑎᑕᐅᓂᕐᒧᑦ

ᐋᖅᕿᐅᒪᔪᒧᑦ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

12 : 00 ᐱᔾᔪᑕᐅᔪᒥᒃ ᐅᖃᐅᓯᖃᖅᑐᑦ “ᐆᒻᒪᖅᑎᑦᑎᒃᑲᓐᓂᕐᓂᖅ'Ōlelo Hawai‘i ᐅᖃᐅᓯᕐᒥᑦ ᐊᒻᒪᓗ ᖃᓄᖅ ᑮᓇᐅᔭᖃᖅᑎᑕᐅᓂᖅ ᐱᕙᓪᓕᐊᓯᒪᓂᖓ ᐱᐊᓂᑦᑎᐊᖅᓯᒪᓂᒃᑯᑦ ᐊᒻᒪᓗ ᐊᒃᓱᕈᕐᓇᖅᑐᒃᑰᕐᓂᒃᑯᑦ”

ᐅᖃᓪᓚᒃᑎ

• ᓕᐅᕆ ᑭᒧᕋ (Larry Kimura), ᓯᓚᑦᑐᖅᓴᕐᕕᒡᔪᐊᖅ ᕼᐊᐅᐊᐃ

12 : 30 ᑐᑭᓯᑎᑦᑎᓂᖅ ᑲᑎᒪᖃᑕᐅᔪᓗᒃᑖᓂᒃ - ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ

ᐋᖅᕿᐅᒪᔪᖅ

• ᑲᒪᔨ ᔫᓕ ᑕᑉᕈᓯᓐ (Julie Dabrusin), ᒪᓕᒐᓕᐅᕐᕕᒡᔪᐊᕐᒥᑦ ᑎᑎᕋᖅᑎ ᒥᓂᔅᑕᒧᑦ ᑲᓇᑕᒥᑦ ᐱᖅᖁᓯᓕᕆᔨᒃᑯᓐᓄᑦ

ᑲᑎᒪᔩᑦ

• ᒥᐊᓕ ᔭᐃᓐ ᓅᕆᔅ (Mary Jane Norris), Norris Research Inc.,-ᑯᓐᓂᑦ
• ᐊᓗᑭ ᑰᑦᑎᖅ, ᓄᓇᕗᑦ ᑐᙵᕕᒃᑯᓐᓂᑦ
• ᒫᒃ ᓕᒃᓕᐅ (Marc Leclair), ᒦᑏ ᓄᓇᖅᖃᑎᒌᑦ ᑲᑎᒪᔨᖏᓐᓂᑦ

2 : 45 ᐱᐊᓂᒃᐸᓪᓕᐊᔪᑦ ᑕᒪᕐᒥᓗᒃᑖᖅ - ᓄᓇᖃᖅᖄᖅᑐᑦ ᐅᖃᐅᓯᖏᓐᓄᑦ ᑮᓇᐅᔭᖃᖅᑎᑦᑎᓂᕐᒧᑦ

ᐋᖅᕿᐅᒪᔪᖅ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

ᐅᑉᓗᖅ 4 − ᓯᑕᒻᒥᖅ ᑕᖅᖀᓐᓇᕐᔪᐊᖅ (ᔭᓄᐊᕆ) 28, 2021

11 : 30 ᐅᒃᑯᐃᖅᓯᓂᕐᒧᑦ ᑐᒃᓯᐊᕐᓃᑦ: ᐃᓄᐃᑦ, ᐃᖅᑭᓖᑦ ᐊᒻᒪᓗ ᒦᑏ

• ᒪᐃᒃ ᒥᑦᓱᓪ (Mike Mitchell), AFN-ᒥᑦ ᐃᓐᓇᕆᔭᐅᔪᖅ-ᖃᐅᔨᒪᓂᖃᖅᑐᖅ
• ᑕᐃᕕᑎ ᓯᖁᐊᖅ, ᐃᓄᒃ ᐃᓐᓇᕆᔭᐅᔪᖅ
• ᕼᐃᐅᕆᐊᑦ ᓴᐃᓐᑦ ᐱᐅᕐ (Harriet St.Pierre), ᒦᑏ ᓄᓇᖅᖃᑎᒌᓄᑦ ᐃᓐᓇᕆᔭᐅᔪᖅ

11 : 40 ᐅᖃᓪᓚᒃᑐᖅ ᑭᒡᒐᖅᑐᐃᔪᖅ ᑲᓇᑕᒥᑦ ᒐᕙᒪᒃᑯᓐᓂᑦ

ᐅᖃᓪᓚᒃᑎ

• ᐅᐱᓐᓇᖅᑐᖅ ᒫᒃ ᒥᓗ (Marc Miller), ᒥᓂᔅᑕ ᑲᓇᑕᒥᑦ ᓄᓇᖃᖅᖄᖅᑐᓂᒃ ᐱᔨᑦᑎᕋᐃᔨᒃᑯᓐᓄᑦ

11 : 45 ᓇᐃᓈᖅᓯᒪᔪᖅ ᑐᓴᖅᑕᐅᓚᐅᖅᑐᓂᑦ ᐅᖃᖃᑎᖃᖅᑎᓪᓗᒋᑦ ᐱᔾᔪᑎᒋᑉᓗᒍ ᑎᑎᕋᕐᕕᖓ ᑲᒥᓯᓇᐅᔫᑉ ᓄᓇᖃᖅᖄᖅᑐᓄᑦ

ᐅᖃᐅᓯᓕᕆᔨᒃᑯᓐᓄᑦ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

12 : 00 ᐱᔾᔪᑕᐅᔪᒥᒃ ᐅᖃᐅᓯᖃᖅᑐᑦ

ᐅᖃᓪᓚᒃᑎ

• ᕋᕖᓂᐊ ᕼᐃᖏᓐᔅ (Rawinia Higgins), ᓂᐅ ᔩᓚᓐᒥᑦ ᒪᐅᕆ ᐅᖃᐅᓯᕐᒧᑦ ᑲᑎᒪᔩᑦ

12 : 30 ᑐᑭᓯᑎᑦᑎᓂᖅ ᑕᒪᓗᒃᑖᕐᒧᑦ - OCIL, ᐃᓕᑕᐅᔪᑦ ᐊᒻᒪᓗ ᐱᐅᓛᑦ ᐊᑐᖅᑕᐅᖃᑦᑕᖅᑐᑦ ᑕᐃᒪᐅᔪᒥᑦ ᐅᖃᐅᓯᕐᒧᑦ ᑲᒥᓯᓇᐅᑉ ᑲᓇᑕᒥᑦ ᐊᒻᒪᓗ

ᐊᓯᖏᓐᓂᑦ ᓄᓇᓂᑦ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

ᑲᑎᒪᔨᐅᔪᑦ

• ᐋᓐ ᑯᕐᔅᑎ ᐊᐃᑭᐅ (Anne Kirste Aikio), ᐅᖃᐅᓯᕐᒥᒃ ᒥᐊᓂᖅᓯᓂᕐᒧᑦ ᑎᑎᕋᖅ, ᓵᒥ ᒪᓕᒐᓕᐅᕐᕕᒡᔪᐊᖅ (Sámi Parliament)

2 : 30 ᐱᐊᓂᒃᐸᓪᓕᐊᔪᑦ ᑕᒪᕐᒥᓗᒃᑖᖅ - OCIL:

ᐅᖃᐅᓯᓕᕆᔨᒃᑯᓐᓄᑦ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

ᐅᑉᓗᖅ 5 - ᑕᓪᓕᒫᑦ ᑕᖅᖀᓐᓇᕐᔪᐊᖅ (ᔭᓄᐊᕆ) 29, 2021

11 : 30 ᐅᒃᑯᐃᖅᓯᓂᕐᒧᑦ ᑐᒃᓯᐊᕐᓃᑦ: ᐃᖅᑭᓖᑦ, ᐃᓄᐃᑦ ᐊᒻᒪᓗ ᒦᑏ

• ᕘᓇ ᑎᒫᓐᑎᒡᓂ (Verna DeMontigny), ᒦᑏ ᓄᓇᖅᖃᑎᒌᓄᑦ ᐃᓐᓇᕆᔭᐅᔪᖅ
• ᑕᐃᕕᑎ ᓯᖁᐊᖅ, ᐃᓄᒃ ᐃᓐᓇᕆᔭᐅᔪᖅ
• ᒪᐃᒃ ᒥᑦᓱᓪ (Mike Mitchell), AFN-ᒥᑦ ᐃᓐᓇᕆᔭᐅᔪᖅ-ᖃᐅᔨᒪᓂᖃᖅᑐᖅ

11 : 40 ᐅᖃᓪᓚᒃᑐᖅ ᑭᒡᒐᖅᑐᐃᔪᖅ ᑲᓇᑕᒥᑦ ᒐᕙᒪᒃᑯᓐᓂᑦ

ᐅᖃᓪᓚᒃᑏᑦ

• ᐅᐱᓐᓇᖅᑐᖅ ᑭᐅᕈᓕᓐ ᐱᐊᓂᐊᑦ (Carolyn Bennet), ᒥᓂᔅᑕ ᑲᓇᑕ-ᓄᓇᖃᖅᖄᖅᑐᑦ ᐱᓕᕆᖃᑎᒌᒃᑯᓐᓄᑦ

11 : 45 ᐱᔾᔪᑕᐅᔪᖅ - ᓄᓇᕐᔪᐊᕐᒥᑦ ᐅᑭᐅᕐᒥᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ ᐊᒻᒪᓗ ᓯᕗᒻᒧᖕᓂᖅ ᖁᓕᑦ

ᐅᑭᐅᓂᑦ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

ᐱᔾᔪᑕᐅᔫᑉ ᒥᒃᓵᓄᑦ ᐅᖃᓪᓚᒃᑎ

• ᐃᖢᐊᖅᓴᐃᔨ ᓗᐊᓇ ᐅᐊᓄᔅᑕ7 ᐅᐃᓕᐊᒻᔅ (Lorna Wanosts’a7 Williams)

12 :15 ᓄᓇᖅᖃᑎᒌᓄᑦ ᐊᖓᔪᖅᑳᖅ ᐱᐅᕆ ᐱᐊᓚᒑᕐᑦ (Perry Bellegarde) ᐊᕗᓐᓂᕕᒃ (ᑎᓯᐱᕆ) 2019 ᐱᓕᕆᐊᖑᔪᖅ ᑲᑎᓯᒪᔪᑦ ᓄᓇᖅᖃᑎᒌᑦ ᑲᑎᒪᓂᖏᑦ ᑕᕐᕆᔭᒐᐃᑦ

12 : 25 ᑕᒪᓗᒃᑖᖅ ᑲᑎᒪᔪᑦ 1: 2022-2032 ᓄᓇᕐᔪᐊᕐᒥᑦ ᖁᓕᓄᑦ ᐅᑭᐅᓂᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ

2032 ᖃᓄᐃᖓᓃᑦ ᓄᓇᖃᖅᖄᖅᑐᑦ

ᐅᖃᐅᓯᖏᓐᓄᑦ

• ᑲᒪᔨᐅᔪᖅ ᔩᓇ ᐅᐃᓪᓴᓐ (Gina Wilson), ᒥᓂᔅᑕᐅᑉ ᑐᖏᓕᖓ, ᐊᔾᔨᒌᙱᑦᑑᑕᐅᔪᓄᑦ ᐊᒻᒪᓗ ᐃᓚᐅᑎᑕᐅᓂᖏᑦ ᐊᒻᒪᓗ ᒪᒃᑯᒃᑐᐃᑦ ᐊᒻᒪᓗ ᐊᖓᔪᒃᖡᑦ ᐃᓚᒋᔭᐅᔪᑦ ᒥᓂᔅᑕᒧᑦ ᑐᖏᖓᓄᑦ ᑲᓇᑕᒥᑦ ᐱᖅᖁᓯᓕᕆᔨᒃᑯᓐᓄᑦ

ᐅᖃᓪᓚᒃᑏᑦ

• ᒥᓂᔅᑕ ᑭᓕᐊᕋ ᒨᕆᓐ ᑖᓪ ᑰᓪ (Clara Morin Dal Col)
• ᕈᑦ ᖃᕕᐅᖅ

1 : 30 ᑕᒪᓗᒃᑖᖅ ᑲᑎᒪᔪᑦ 2: 2022-2032 ᓄᓇᕐᔪᐊᕐᒥᑦ ᖁᓕᓄᑦ ᐅᑭᐅᓂᑦ ᓄᓇᖃᖅᖄᖅᑐᑦ ᐅᖃᐅᓯᖏᑦ

ᑲᓇᑕᐅᑉ ᖃᓄᖅᑑᕆᓂᕐᒧᑦ ᐊᑐᖅᑕᖓᑦ ᖁᓕᑦ

ᐅᑭᐅᒧᑦ ᑲᒪᔨᐅᔪᖅ

• ᔩᓇ ᐅᐃᓪᓴᓐ (Gina Wilson), ᒥᓂᔅᑕᐅᑉ ᑐᖏᓕᖓ, ᐊᔾᔨᒌᙱᑦᑑᑕᐅᔪᓄᑦ ᐊᒻᒪᓗ ᐃᓚᐅᑎᑕᐅᓂᖏᑦ ᐊᒻᒪᓗ ᒪᒃᑯᒃᑐᐃᑦ ᐊᒻᒪᓗ ᐊᖓᔪᒃᖡᑦ ᐃᓚᒋᔭᐅᔪᑦ ᒥᓂᔅᑕᒧᑦ ᑐᖏᖓᓄᑦ ᑲᓇᑕᒥᑦ ᐱᖅᖁᓯᓕᕆᔨᒃᑯᓐᓄᑦ

ᐅᖃᓪᓚᒃᑏᑦ

• ᑯᕆᔅᑐᓪ ᒫᑎᓐ-ᓚᐱᐊᓐᔅᑭ (Crystal Martin-Lapenskie), ᐃᓅᖃᑎᒌᓄᑦ ᐃᓄᐃᑦ ᒪᒃᑯᒃᑐᓄᑦ ᑲᑎᒪᔨᒃᑯᓐᓂᑦ
• ᐊᖓᔪᖅᖄᖅ ᑭᓚᒥᐊᓐᑦ ᑦᓵᑎᐅᕐ (Clément Chartier), ᒦᑏ ᓄᓇᖅᖃᑎᒌᑦ ᑲᑎᒪᔨᖏᓐᓂᑦ
• ᓯᐹᔅᑎᐊᓐ ᒎᐳᓪ (Sébastien Goupil), ᑎᑎᕋᖅᑎ, ᑲᓇᑕᒥᑦ ᑲᑎᒪᔩᑦ UNESCO-ᑯᓐᓄᑦ

2 : 30 ᑲᑎᒪᔪᑦ

ᐱᐊᓂᒃᐸᓪᓕᐊᔪᑦ:

• ᑲᒪᔨ ᒫᑎᐅ ᑯᐊᓰᑦ (Mathieu Courchene)

ᐱᐊᓂᖕᓂᖅᒧᑦ ᐅᖃᐅᓯᒃᓴᑦ

ᐅᖃᓪᓚᒃᑏᑦ

• ᐅᐱᓐᓇᖅᑐᖅ ᓯᑏᕕᓐ ᒋᐅᓪᐹᓪᑦ (Steven Guilbeault), ᒥᓂᔅᑕ ᑲᓇᑕᒥᑦ ᐱᖅᖁᓯᓕᕆᔨᒃᑯᓐᓄᑦ
• ᑕᐃᕕᑎ ᓵᑐᕌᓐ (David Chartrand), ᐊᖓᔪᖅᖄᑉ ᑐᖏᓕᖓ ᐊᒻᒪᓗ ᐃᓅᖃᑎᒌᓄᑦ ᐅᖃᓪᓚᒃᑎᐅᑎᑕᐅᔪᖅ, ᒦᑏ ᐃᓅᖃᑎᒌᓄᑦ ᑲᑎᒪᔨᒃᑯᓐᓄᑦ
• ᓇᑖᓐ ᐆᐸᑦ, ᐊᖏᔪᖅᑳᖅ, ᐃᓄᐃᑦ ᑕᐱᕇᑦ ᑲᓇᑕᒥ

3 : 20 ᐅᒃᑯᐊᖅᐸᓪᓕᐊᓂᕐᒧᑦ ᑐᒃᓯᐊᕐᓃᑦ

• ᒪᐃᒃ ᒥᑦᓱᓪ (Mike Mitchell), AFN-ᒥᑦ ᐃᓐᓇᕆᔭᐅᔪᖅ-ᖃᐅᔨᒪᓂᖃᖅᑐᖅ ᐊᒻᒪᓗ ᓄᑰᒥᔅ ᕈᐊᐴᑕ ᐋᔅᑲᐱᐅᐊᐃᓯᓐᔅ
• ᕘᓇ ᑎᒫᓐᑎᒡᓂ (Verna DeMontigny), ᒦᑏ ᓄᓇᖅᖃᑎᒌᓄᑦ ᐃᓐᓇᕆᔭᐅᔪᖅ
• ᕉᔅ ᐅᐊᐅᐊᑎ (Rose Wawatie), ᑭᑎᒐᓐ ᔨᐱ ᐊᓂᓯᓂᐊᐱᐊᒡ-ᒥᑦ (Kitigan Zibi Anishinabeg)