ᐸᕐᓇᖅᑕᐅᓯᒪᔪᒧᑦ ᐸᕐᓇᐅᑦ

ᐅᑭᐅᖅᑕᖅᑐᒥᑦ ᖃᐅᔨᒪᓂᕐᒧᑦ ᑲᓇᑕ (POLAR)

ᐱᔾᔪᑎᖓ

ᑖᓐᓇ ᐸᕐᓇᑕᐅᓯᒪᔪᖅ ᐸᕐᓇᐅᑦ (ᐸᕐᓇᐅᑎ) ᓯᕗᒃᑲᖅᑕᕈᑕᐅᔪᖅ ᐱᒻᒪᕆᐅᓪᓗᓂ ᑐᑭᑖᕈᑕᐅᓂᐊᖅᖢᓂᓗ ᓇᓗᓇᐃᔭᖅᑕᐅᓯᒪᔪᖅ ᐃᑲᔪᖅᓯᓂᐊᖅᑐᖅ POLAR−ᑯᑦ ᐊᖅᑭᒋᐊᕆᓂᐊᖅᑎᓪᓗᒋᑦ ᐊᑐᕈᓐᓇᖅᑕᖏᓐᓂᒃ ᐊᑐᕈᒪᔭᖏᓐᓂᓪᓗ ᓯᕕᑐᔪᒧᑦ ᑕᑯᓐᓇᙳᐊᖅᑕᒥᓐᓄᑦ. ᐊᖏᔪᖅ, ᐊᑐᖅᑕᐅᒍᓐᓇᖅᑐᖅ ᑎᑎᕋᖅᑕᐅᓯᒪᔪᖅ ᑐᓴᖅᑎᑦᑎᒍᑎᒋᓗᒍ POLAR−ᑯᑦ ᐊᕐᕌᒍᓄᑦ ᑕᓪᓕᒪᓄᑦ ᖃᐅᔨᓴᕐᓂᐊᕐᓂᒃᑯᑦ ᐊᒻᒪ ᓴᓇᕐᕈᑏᑦ ᐊᑑᑎᖏᑕ ᖃᐅᔨᒪᔭᐅᓂᖏᓐᓂᑦ ᓇᓗᓇᐃᔭᐅᑦ¹ (ᖃᐅᔨᓴᕐᓂᐊᕐᓂᒃᑯᑦ ᓴᓇᕐᕈᑏᓪᓗ ᐊᑐᖅᑕᐅᒍᓐᓇᕐᓂᖏᓐᓄᑦ ᓇᓗᓇᐃᔭᐅᑦ), ᐊᕐᕌᒍᑕᒫᑦ ᐸᕐᓇᐅᑏᑦ, ᐃᖅᑲᓇᐃᔭᕐᓂᕐᒧᑦ ᖃᐅᔨᓴᕐᓂᕐᒧᑦ ᐊᖏᖃᑎᒌᒍᑏᑦ ᖃᐅᑕᒫᖅᓯᐅᑏᑦ ᐃᖅᑲᓇᐃᔭᖅᑎᓄᑦ ᑐᕌᖓᔪᑦ. ᐸᕐᓇᐅᑦ ᓇᓗᓇᐃᔭᐃᓯᒪᔪᖅ ᖃᓄᖅ ᑎᒥᖁᑎᒋᔭᐅᔪᖅ ᐱᓇᓱᐊᕐᒪᖔᖅ ᑲᔪᓯᓂᖃᑦᑎᐊᓂᕐᒧᑦ, ᑐᑭᒧᐊᖅᑎᑦᑎᑦᑎᐊᕐᓂᐊᒪᑦ ᐃᖅᑲᓇᐃᔭᖅᑎᖁᑎᒥᓐᓂᑦ ᑐᓴᐅᒪᑎᓪᓗᒋᓪᓗ ᓇᖕᒥᓂᓂᖃᑎᓂ ᑲᑐᔾᔨᖃᑎᒥᓐᓂᓪᓗ ᓱᓇᓂᒃ ᓂᕆᐅᕐᕕᖃᕐᒪᖔᑕ POLAR−ᑯᓐᓂᑦ.

ᑕᑯᓐᓇᖑᐊᖅᑕᖅ

ᐊᐅᓚᑕᐅᑦᑎᐊᕈᓐᓇᖅᑐᒥᒃ ᓯᕗᓂᒃᓴᖃᕐᓂᖅ ᑐᑭᒧᐊᖅᑎᑕᐅᔪᒥᒃ ᖃᐅᔨᒪᓂᕐᒧᑦ ᖃᑐᔾᔨᖃᑎᒌᓐᓂᑯᓪᓗ.

ᐱᓕᕆᐊᒃᓴᖅ

POLAR−ᑯᑦ ᐱᓕᕆᐊᒃᓴᖓ ᑲᔪᓯᑎᑦᑎᐊᕐᓗᒍ ᐊᐅᓚᓗᒍᓗ ᖃᐅᔨᒪᓂᖅ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ ᓯᕗᒃᑲᖅᑕᕐᓂᕐᒥᒍᑦ, ᓇᖕᒥᓂᖃᖃᑎᒥᓐᓄᑦ ᑲᑐᔾᔨᖃᑎᒌᖕᓂᒃᑯᓪᓗ ᐅᑭᐅᖅᑕᖅᑐᒥ ᖃᐅᔨᓴᕐᓂᐊᕐᓂᒃᑯᑦ ᖃᐅᔨᓴᕐᓂᕐᒥᒍ ᐊᒻᒪ ᓴᓇᕐᕈᑏᑦ ᐊᑐᖅᑕᐅᒍᓐᓇᕐᓂᖏᑕ ᖃᐅᔨᒪᓂᖏᑎᒍ.

ᑎᓕᔭᐅᔾᔪᑎ

POLAR−ᑯᑦ ᑎᓕᔭᐅᓪᔪᑎᒋᓯᒪᔭᖓ, ᑎᑎᕋᖅᑕᒥᓂᖅ ᒪᓕᒃᖢᒍ ᑲᓇᑕᒥ ᖁᑦᑎᒃᑐᒧᑦ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᐱᖁᔭᖅ, ᑲᒪᓂᐊᕐᓗᑎᒃ ᐊᒻᒪ ᐃᑲᔪᖅᑐᐃᓂᐊᕐᓗᑎᒃ ᓄᓇᓕᐅᔪᒧᑦ ᓈᖕᒪᒃᑐᒥᒃ ᓯᓚᕐᔪᐊᒧᓪᓗ ᓈᒻᒪᒡᓗᓂ ᖃᐅᔨᒪᓂᐅᑉ ᓴᖅᑭᖅᑕᐅᓯᒪᓂᖓ. POLAR−ᑯᑦ ᑲᔪᙱᖅᓴᐃᒋᐊᖃᕐᒪᑕ ᐊᑐᖅᑕᐅᒍᓐᓇᖅᑐᓂᑦ ᖃᐅᔨᓯᒪᔭᒥᓐᓂᑦ ᐅᖃᐅᔾᔭᐅᖃᑦᑕᕐᓂᒃᑯᑦ ᓇᓗᓇᐃᖏᑦᑐᓂᑦ-ᑕᑯᒃᓴᐅᔪᓂᑦ ᑐᑭᑖᕈᑎᒋᓂᐊᕐᓗᒋᑦ. ᐱᖁᔭᖅ ᑎᓕᓯᒪᖕᒪᑦ POLAR−ᑯᑦ ᐃᒪᐃᖁᓪᓗᒋᑦ:

• ᑲᔪᓯᑎᓪᓗᒍ ᖃᐅᔨᒪᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓂᒃ ᐊᖅᑭᒋᐊᖅᑕᐅᖁᓪᓗᒋᑦ ᑮᓇᐅᔭᓕᐅᕈᑎᒃᓴᐃᑦ, ᐊᕙᑎᒥᑦ ᑲᒪᑦᑎᐊᕐᓂᖅ, ᐃᓅᓯᖃᑦᑎᐊᕆᐊᖃᕐᓂᖏᓪᓗ ᓄᓇᓖᑦ ᑲᓇᑕᒥᐅᑕᐅᓕᒫᓪᓗ;
• ᖃᐅᔨᔭᐅᑎᓪᓗᒍ ᐱᕙᓪᓕᐊᓂᖓ ᖃᐅᔨᔭᐅᑎᑕᓂᐊᕐᓂᖓᑕᓗ ᖃᐅᔨᒪᓂᐅᑉ ᐊᓯᖏᑕ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᑦ, ᐱᖃᓯᐅᑎᓪᓗᒍ ᓯᓚᕐᔪᐊᕐ ᑲᔾᔨᖓ;
• ᓴᙱᑦᑎᒋᐊᒃᑲᓂᕐᓗᒍ ᑲᓇᑕᐅᑉ ᓯᕗᓕᕐᓂᖓ ᐅᑭᐅᖅᑕᖅᑐᒥ ᐃᓱᒫᓗᑕᐅᔪᓄ; ᐊᒻᒪᓗ,
• ᓴᖅᑭᑎᑦᑎᓂᒃᑯᑦ ᖃᐅᔨᓴᕐᓂᐊᕐᓂᕐᒧᑦ ᖃᐅᔨᓴᕐᕕᐅᒐᔭᖅᑐᒥᒃ ᑲᓇᑕᐅᑉ ᐅᑭᐅᖅᑕᑐᖓᓂ.

ᖃᓄᐃᓕᐅᕐᓂᐊᕐᓂᕗᑦ: ᑐᓴᖅᑎᑦᓯᒍᑎᒋᓗᒍ ᖃᐅᔨᒪᓂᖅᑖᕆᓯᒪᔭᖓ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᓄᓇᐃᑦ ᒥᒃᓵᓄᑦ

ᑲᔪᙱᖅᓴᐃᒍᑎᒋᓗᒍ ᐊᑑᑎᖃᑦᑎᐊᕐᓂᖅᐸᐅᒍᓐᓇᖅᑐᑦ ᑭᓪᓕᖃᖅᑎᑕᐅᔪᑦ ᖃᓄᐃᒋᐊᕈᑕᐅᒍᓐᓇᖅᑐᑦ, POLAR−ᑯᑦ ᑐᕌᒐᖃᕐᓂᐊᖅᑐᑦ ᑲᑐᔾᔨᖃᑎᒌᓐᓂᕐᒥᑦ ᖃᐅᔨᓯᒪᔭᖏᑕᓗ ᐅᖃᐅᔾᔭᐅᒍᑎᒋᖃᑦᑕᖅᓯᒪᔭᖏᑕ ᒥᒃᓵᓄᑦ ᐃᖅᑲᓇᐃᔮᕆᓗᒍ ᓯᕗᒃᑲᑕᖅᑕᖅ ᑭᙴᒪᔭᖏᓐᓄᑦ ᐅᑭᐅᖅᑕᖅᑐᒥ ᓄᓇᓖᑦ ᐊᐱᖅᑯᑕᐅᖃᑦᑕᖅᓯᒪᔪᓪᓗ ᑐᙵᕕᒋᓗᒋᑦ ᐊᒃᑐᐊᓂᓖᑦ ᑲᓇᑕᒧᑦ ᐊᒻᒪ ᓄᓇᕐᔪᐊᒥ ᓇᖕᒥᓂᖃᖃᑕᐅᔪᓄᑦ.

ᑎᒥᐅᔪᖅ ᒪᕐᕉᓐᓂᒃ ᐸᕐᓇᓂᕐᒧᑦ ᑕᐃᓯᓯᒪᔪᑦ, ᐊᒃᑐᐊᔫᓐᓂᒃ ᑎᓕᔭᐅᒍᑎᒋᓯᒪᔭᖓᓐᓄᑦ ᐃᓕᓐᓂᐊᑎᑦᑎᓂᕐᒧᓪᓗ: ᑲᔪᓯᑎᑦᑎᐊᕐᓗᒍ ᖃᐅᔨᒪᓂᖅᑖᖑᓯᒪᔪᖅ ᓴᖅᑭᖅᑎᑕᐅᓂᖓ ᐅᑭᐅᖅᑕᖅᑐᒥᓯᕗᒃᑲᑕᕐᕕᒋᓗᒍᓗ ᐊᐅᓚᑕᐅᓂᐊᕐᓂᖓ ᐅᑭᐅᖅᑕᖅᑐᒥ ᖃᐅᔨᒪᓂᐅᑉ ᑲᓇᑕᒥ ᓄᓇᕐᔪᐊᒥᓗ. ᑖᒃᑯᐊ ᑕᐃᔭᐅᓯᒪᔪᒃ ᑐᑭᒧᐊᖅᑎᑦᑎᔪᒃ POLAR−ᑯᑦ ᐊᑐᖅᑕᐅᑎᒋᒍᓐᓇᖅᑕᖏᓐᓂᑦ ᓴᖅᑭᖅᑎᑕᐅᕙᓪᓕᐊᓂᖓᓂᒃ, ᐅᖃᐅᓯᕆᓗᒍ ᐊᐅᓚᓪᓗᒍᓗ ᖃᐅᔨᒪᓂᖅ, ᐱᖃᓯᐅᔾᔨᓗᒍ ᓄᓇᖃᖅᑲᖅᓯᒪᔪᑦ ᖃᐅᔨᒪᓂᖓ, ᐊᑐᖅᑕᐅᒍᓐᓇᖅᑐᓂᑦ ᐅᖃᐅᔾᔭᐅᖃᑦᑕᕐᓂᒃᑯᑦ ᓇᓗᓇᐃᖏᑦᑐᓂᑦ-ᑕᑯᒃᓴᐅᔪᓂᑦ ᑐᑭᑖᕈᑎᒋᓂᐊᕐᓗᒋᑦ ᑲᓇᑕᒥ ᐅᑭᐅᖅᑕᖅᑐᒥ ᐊᓯᖏᓐᓂᓪᓗ ᐅᑭᐅᖅᑕᖅᑐᓂ. ᐱᕙᓪᓕᐊᑎᑕᐅᓂᖓ ᑭᖑᓪᓕᐅᓂᐊᖅᑐᓄᑦ POLAR−ᑯᑦ ᖃᐅᔨᒪᓕᖅᑕᖏᑦᑕ ᓯᕗᓕᖅᑎᖏᓐᓄᑦ ᐱᖃᑕᐅᑎᑦᑎᓂᒃᑯᑦ ᓄᓇᕐᔪᐊᒥ ᐅᖃᐅᔾᔭᐅᒍᑎᒋᖃᑦᑕᖅᓯᒪᔭᖏᑦ ᖃᐅᔨᓴᕐᓂᐅᑉ ᒥᒃᓵᓄᑦ ᓈᒪᒃᑐᓂᑦ ᑖᒃᑯᓅᖓ ᑕᐃᔭᐅᓯᒪᔫᓐᓄᑦ.

POLAR-ᑯᑦ ᐃᓚᓕᐅᑎᓯᒪᔭᖓ ᐱᓪᓚᕆᖁᑎᒋᔭᖑᔪᖅ: ᐊᑐᖅᑕᐅᑎᑦᑎᓂᖅ ᑲᑐᔾᔨᖃᑎᒌᓐᓂᕐᓗ

POLAR−ᑯᑦ ᐱᓕᕆᖃᑎᖃᕐᓂᐊᖅᑐᑦ ᐊᒥᖅᑲᐅᑎᒋᓗᒍᓗ ᑐᓴᖅᑎᑦᑎᒍᑎ ᖃᐅᔨᒪᓂᕐᒥᑦ ᐊᑯᓐᓂᖃᕈᑕᐅᔪᖅ ᐊᑯᓐᓂᖃᕈᓐᓃᕈᑎᒋᓂᐊᕐᓗᒍ ᓴᖅᑎᖅᑎᑕᐅᒐᓱᐊᕐᓂᖓᓂ ᖃᐅᔨᒪᓂᖅᑖᖑᓯᒪᔪᖅ ᑐᓴᖅᑎᑕᐅᖃᑦᑕᕈᑎᒋᓯᒪᔭᖏᑦ ᒪᓕᒃᖢᒋᑦ. ᑕᒪᓐᓇ ᑐᕌᖅᑕᓕᒃ ᑕᒪᒃᑮᒃ ᐃᓂᐅᔫᒃ CHARS−ᑯᑦ ᐃᓕᓐᓂᐊᕐᕕᖓ ᐊᒻᒪᓗ ᑲᑐᔾᔨᖃᑎᒌᓐᓂᒃᑯᑦ ᐅᖃᓯᐅᖃᑦᑕᖅᓯᒪᔪᑦ ᑕᒪᒃᑮᓄᑦ POLAR−ᑯᑦ ᐱᖃᑕᐅᕕᒋᓂᐊᖅᑕᖏᑦ ᑲᔪᓯᑎᑕᐅᖁᓪᓗᒍ ᐊᐅᓚᑕᐅᖁᓪᓗᒍᓗ ᐅᑭᐅᖅᑕᖅᑐᒥ ᖃᐅᔨᒪᓂᖅ.

ᑕᒪᓐᓇ ᐱᓇᓱᐊᕐᓂᐅᓂᐊᖅᑐᖅ ᐅᖃᐅᓯᖃᕐᒪᑦ POLAR−ᑯᑦ ᐃᖅᑲᓇᐃᔭᕐᓂᐊᓂᖏᓐᓂᑦ ᑎᒥᐅᔪᓄᓪᓗ ᐃᓚᓕᐅᑎᔭᐅᓯᒪᔪᑦ ᐱᓪᓚᕆᖁᑎᒋᔭᐅᔪᑦ. POLAR−ᑯᑦ ᑐᓴᖅᑎᑦᑎᒍᑎᖃᕐᓂᐊᖅᑐᑦ ᓴᖅᑭᑎᑦᑎᒍᒪᓪᓗᑎᒃ ᐊᒥᓱᓄᑦ ᐱᕕᒃᓴᖃᕐᕕᐅᓗᓂ ᖃᐅᔨᒪᓂᕐᒧᑦ ᓴᖅᑭᑕᐅᓯᒪᔪᓄᑦ ᐊᑐᐃᓐᓇᖅᑎᑦᑎᕕᒋᓗᒍᓗ ᖃᐅᔨᓴᕐᓂᐊᕐᓂᖅ, ᓴᓇᕐᕈᑏᓪᓗ ᐊᒻᒪ ᓄᓇᖃᖅᑲᖅᓯᒪᔪᑦ ᖃᐅᔨᒪᓂᖏᑦ ᑭᖒᒪᔭᐅᔪᑦ ᐃᑲᔪᖅᓯᓂᐊᖅᑐᑦ ᑕᑯᒃᓴᕐᒥᒃ- ᖃᐅᔨᔭᐅᓯᒪᔪᑦ ᐊᑐᐊᒐᓕᐅᕈᑎᒋᓂᐊᕐᓗᒋᑦ ᑐᑭᑖᕈᑕᐅᖃᑦᑕᕐᓂᐊᖅᑐᓪᓗ.

ᑲᔪᓯᑎᑦᑎᓂᖅ ᖃᐅᔨᒪᓂᐅᑉ ᓴᖅᑭᖅᑎᑕᐅᓂᐊᕐᓂᖓᓂᒃ ᐅᑭᐅᖅᑕᖅᑐᒥ

POLAR−ᑯᑦ ᑲᒪᓂᐊᖅᑐᑦ ᐃᑲᔪᖅᑐᕐᓗᒍᓗ ᐅᖃᐅᔾᔭᐅᖃᑦᑕᓂᒃᑯᑦ ᑲᐅᔨᔭᐅᓯᒪᔪᑦ, ᓄᓇᓕᖕᒧᑦ ᐊᒃᑐᐊᔪᖅ ᐊᑐᖅᑕᐅᒍᓐᓇᖅᑐᓂᑦ ᐊᒻᒪ ᐊᑐᖅᑕᐅᒍᓐᓇᖅᑐᓂᑦ ᓯᓚᕐᔪᐊᒧᑦ ᓈᒻᒪᒃᑐᖅ ᖃᐅᔨᒪᓂᐅᕐ ᓴᖅᑭᖅᑕᐅᓂᖓ ᐱᔾᔪᑎᖃᕐᓗᓂ-ᐊᐅᓚᑕᐅᓂᐊᖅᑐᖅ.

POLAR−ᑯᑦ ᐃᒪᐃᓐᓂᐊᖅᑐᑦ:

• ᐊᐅᓚᑦᑎᓗᑎᒃ ᓄᓇᕐᔪᐊᒥ ᖃᐅᔨᓴᕐᕕᐅᓂᐊᖅᑐᒥᑦ ᖃᐅᔨᓴᕐᓂᐊᕐᓂᕐᒧᑦ ᓴᓇᕐᕈᑏᓪᓗ ᐊᑐᖅᑕᐅᒍᓐᓇᕐᓂᖏᓐᓂᑦ – ᑲᓇᑕᒥ ᖁᑦᑎᒃᑑᑉ ᐅᑭᐅᖅᑕᖅᑐᖓᓂ ᖃᐅᔨᓴᕐᕕᒃ;
• ᐊᖅᑭᑦᑎᐊᕐᓗᑎᒃ ᖃᐅᔨᓴᕐᓂᐊᕐᓂᕐᒧᑦ ᐊᒻᒪᓗ ᓴᓇᕐᕈᑎᑦ ᐊᑐᖅᑕᐅᒍᓐᓇᕐᓂᖏᑕ ᖃᐅᔨᔭᐅᓯᒪᓂᖏᓐᓄᑦ ᐸᕐᓇᐅᒻᒥᒃ (S&T ᐸᕐᓇᐅᑦ), ᑐᓴᖅᑎᑕᐅᒍᑕᐅᓯᒪᔪᖅ ᐱᖃᑕᐅᑎᑦᑎᖃᑦᑕᖅᓯᒪᓂᕐᒧᑦ ᐱᔪᓐᓇᐅᑎᓂᑦ ᑎᒍᒥᐊᖅᑎᐅᔪᓄᑦ, ᓇᖕᒥᓂᖃᖃᑕᐅᔪᓄᓪᓗ ᐊᒻᒪ ᑐᕌᖅᑕᐅᓯᒪᔪᓄᑦ ᑭᐅᔾᔪᑎᐅᓯᒪᔪᓄᑦ ᐊᐱᖅᑯᑎᓄᑦ;
• ᑮᓇᐅᔭᖃᖅᑎᓪᓗᒍ ᖃᐅᔨᓴᕐᓂᐊᕐᓂᖅ ᓴᓇᕐᕈᑎᓄᓪᓗ ᐱᓕᕆᐊᑦ ᒪᓕᒃᖢᒍ ᖃᐅᔨᓴᕐᓂᐊᕐᓂᕐᒧᑦ ᓴᓇᕐᕈᑏᓪᓗ ᐊᑐᖅᑕᐅᒍᓐᓇᕐᓂᖏᑕ ᖃᐅᔨᔭᐅᓯᒪᓂᖏᑕ ᐸᕐᓇᐅᑎᒧᑦ; ᐊᒻᒪ
• ᑐᕌᕐᓗᒍ ᓇᖕᒥᓂᖅ ᖃᐅᔨᓴᕐᓂᐊᕐᓂᕐᒧᑦ ᓴᓇᕐᕈᑎᓄᓪᓗ ᖃᐅᔨᓴᕐᓂᖅ ᐊᑐᖅᑕᐅᕙᒃᑐᓪᓗ ᓄᓇᒥᐅᑕᐃᑦ ᐃᓂᖏᓐᓄᑦ CHARS−ᑯᑦ ᐃᓕᓐᓂᐊᕐᕕᖓᓂ, ᑕᐃᔭᐅᔪᖅ, CHARS− ᐊᕙᑎᒦᑦᑐᓂᑦ ᖃᐅᔨᓴᕐᕕᒃ (ERA)

ᓯᕗᒃᑲᑕᕐᓂᖅ ᐊᐅᓚᑕᐅᓂᐊᕐᓂᖓᑕ Polar-ᑯᑦ ᖃᐅᔨᒪᓂᖓ ᑲᓇᑕᒥ ᓄᓇᕐᔪᐊᒥᓗ

POLAR−ᑯᑦ ᐱᔪᓐᓇᐅ ᓯᕗᓕᖅᑎᐅᓂᐊᖅᑐᑦ ᖃᐅᔨᔭᐅᑎᑕᐅᓕᖅᐸᑦ ᐊᐅᓚᑕᐅᓂᕆᓂᐊᖅᑕᖓᓂᓪᓗ ᖃᐅᔨᒪᓂᐅᑉ, ᓇᖕᒥᓂᖃᖃᑕᐅᔪᑦ ᑲᑐᔾᔨᖃᑕᐅᔪᓪᓗ ᑐᓴᐅᒪᑎᓪᓗᒋᑦ ᐅᑭᐅᖅᑕᖅᑐᒥ ᖃᐅᔨᒪᓂᖅ ᖃᐅᔨᒋᐊᕈᑕᐅᒍᓐᓇᖁᓪᓗᒍ ᐊᑐᐃᓐᓇᐅᑎᑕᐅᓂᖓᒍᑦ.

POLAR−ᑯᑦ ᐃᒪᐃᓐᓂᐊᖅᑐᑦ:

• ᑐᕌᖅᑕᕿᓪᓗᒍ ᐱᖃᑕᐅᓂᖅ ᑲᑐᔾᔨᖃᑎᒌᓐᓂᕐᓗ ᐅᑭᐅᖅᑕᖅᑐᒥ ᐊᒻᒪ ᓄᓇᖃᖅᑲᖅᓯᒪᔪᑦ ᓄᓇᓕᖏᓐᓂᑦ ᑎᒥᖁᑎᒋᔭᐅᔪᓂᓗ;
• ᐃᖅᑲᒋᔭᐅᑦᑎᐊᑎᑦᑎᓗᑎᒃ ᓄᓇᖃᖅᑲᖅᓯᒪᔪᓂᑦ, ᖃᐅᔨᓴᕐᓂᐊᕐᓂᕐᒥᑦ ᓴᓇᕐᕈᑎᓂᓪᓗ ᖃᐅᔨᒪᓂᐅᔪᒥᒃ;
• ᐊᖅᑭᓱᐃᓗᑎᒃ ᑐᓴᕆᐊᕈᑕᐅᒍᓐᓇᖅᑐᓂᒃ ᓇᓗᓇᐃᖅᓯᔪᓂᒃ ᖃᐅᔨᒪᓂᕐᒥᒃ ᐊᒥᓱᓂ ᑐᓴᖅᑎᑕᐅᒍᑎᒋᖃᑦᑕᖅᓯᒪᔭᕐᒥᓐᓂᑦ ᐅᖃᐅᔾᔭᐅᓂᒃᑯᑦ, ᐱᓕᕆᐊᑎᒍᑦ ᐱᒋᐊᖅᑎᑕᐅᓯᒪᔪᑎᒍᓪᓗ; ᐊᒻᒪᓗ
• ᓯᕗᓕᕐᕕᒋᓗᒍ ᑲᓇᑕᒥ ᐅᑭᐅᖅᑕᖅᑑᑉ ᐃᓱᒪᒋᔭᖏᑦ ᓄᓇᕐᔪᐊᒥ ᓄᓇᓕᐅᔪᓄᑦ.

ᒥᑭᔫᓪᓗᓂ ᑎᒥᐅᔪᖅ ᐊᖏᔪᒥᑦ ᑎᓕᔭᐅᔾᔪᑎᖃᖅᓯᒪᔪᖅ ᑕᑯᓐᓴᙳᐊᖅᑕᖃᖅᖢᓂᓗ ᐱᔪᒃᓴᐅᔮᕐᕕᒋᓪᓗᒍ, POLAR−ᑯᑦ ᐸᕐᓇᓯᒪᒋᐊᓖᑦ ᐊᑐᖅᑕᐅᓂᐊᖅᑎᓪᓗᒍ ᐊᑐᖅᑕᐅᒍᓐᓇᕐᓂᖃᑦᑕᕐᒪᑦ POLAR−ᑯᑦ ᐃᑲᔪᖅᑐᐃᓂᐊᖅᑐᑦ ᑲᑐᔾᔨᖃᑎᒌᓐᓂᕐᒥᒃ ᑐᓴᕈᑕᐅᓂᐊᖅᑐᒥᒃ ᐅᖃᐅᔾᔭᐅᒋᐊᕈᑕᐅᖃᑦᑕᖅᓯᒪᔪᓂᑦ ᑐᓴᖅᑎᒃᓯᒍᑎᒋᓗᒍᓗ ᑐᓴᖃᑦᑕᖅᓯᒪᔭᑎᒃ ᑐᑭᑖᕈᑎᖃᖅᐸᒃᑐᓄᑦ. ᑎᒥᐅᔪᖅ ᓇᖕᒥᓂᖃᖃᑎᒥᓐᓂᑦ ᑲᔪᓯᑎᑦᑎᕕᖃᕐᓂᐊᖅᑐᑦ ᖃᐅᔨᒪᓂᐅᖅ ᓴᖅᑭᖅᑎᑕᐅᓂᖓᓂᒃ, ᑐᓴᖅᑎᑦᑎᒍᑎᒋᓗᒍ ᐊᑐᖅᑕᐅᓕᖅᑎᓪᓗᒍᓗ. ᑐᓴᕆᐊᕐᕕᐅᔪᓐᓇᖅᑐᖅ ᐊᑑᑎᓕᓪᓗ ᖃᐅᔨᒪᓂᕐᒧᑦ ᐃᑲᔪᖅᓯᓂᐊᖅᑐᑦ POLAR−ᑯᑦ ᖃᓄᐃᓕᐅᕐᓂᖏᓐᓂᑦ ᐱᓇᓱᐊᕐᓂᖏᓐᓂᑦ ᓱᓕᔪᒥᑦ ᑲᑐᔾᔨᓕᖃᑕᐅᓂᕐᒥᒍᑦ, ᐊᐅᓚᔪᒥᒃ ᐃᖅᑲᒋᔭᖃᖅᖢᓂ ᓱᓕᔪᕆᔭᐅᒍᓐᓇᓂᕐᒥᓪᓗ.

ᑎᒥᐅᓂᕐᒧᑦ ᑐᑦᑕᕐᕕᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ, POLAR−ᑯᑦ ᐱᖃᑕᐅᖏᓐᓇᓂᐊᖅᑐᑦ ᓄᓇᓕᐅᔪᓂᑦ ᓄᓇᖏᓐᓂ ᑲᔪᓯᓂᖃᖅᓯᐊᕋᓗᐊᕐᒪᖔᖅ ᐃᖅᑲᓇᐃᔮᖓ ᐃᖅᑲᐃᒋᓗᒋᑦ ᓄᓇᓕᖕᒥ ᓯᕗᓪᓕᐅᔾᔭᐅᒍᒪᔪᑦ ᐅᑎᖅᑎᓪᓗᒋᓪᓗ ᐊᑑᑎᖃᕐᓂᖏᑦ ᐅᑭᐅᖅᑕᖅᑐᒧᑦ. ᐊᑐᓕᖅᑎᑕᐅᓂᖓ POLAR−ᑯᑦ ᐃᓄᐃᑦ ᐃᖅᑲᓇᐃᔭᖅᑎᐅᒋᐊᖃᕐᓂᖏᓐᓄᑦ ᐸᕐᓇᐅᑦ (IEP) ᓴᖅᑭᑎᑦᑎᓂᐊᖅᑐᖅ POLAR−ᑯᑦ ᐊᐅᓚᑕᖏᓐᓂᑦ ᐃᖅᑲᓇᐃᔭᖅᑎᑖᕐᓂᖏᑎᒍᑦ, ᓴᖅᑭᑎᑦᑎᓂᒃᑯᑦ ᐃᖅᑲᓇᐃᔭᖅᑎᖃᕐᓂᖏᑎᒍᓪᓗ ᐃᓄᖕᓂᑦ. POLAR−ᑯᑦ ᑐᓂᓯᓂᐊᖅᑐᑦ ᐱᕙᓪᓕᐊᓂᖓᓄᑦ ᓴᙱᓂᖅᓴᖅ ᐅᑭᐅᖅᑕᖅᑐᒥ ᖃᐅᔨᓴᕐᓂᐊᕐᓂᕐᒧᑦ ᓴᓇᕐᕈᑎᓄᓪᓗ ᐊᑐᐊᒐᕐᒥᒃ ᐃᓕᓐᓂᐊᕋᑦᑎᓂᓪᓗ ᒪᓕᒃᖢᒍ ᑖᓐᓇ ᐃᓄᐃᑦ ᐃᖅᑲᓇᐃᔭᖅᑎᐅᒋᐊᖃᕐᓂᖏᓐᓄᑦ ᐸᕐᓇᐅᑦ – ᑲᔪᓯᑎᑦᑎᒍᑕᐅᓂᐊᕐᒪᑦ ᐃᓄᐃᑦ ᐱᕕᒃᓴᖃᖅᑎᑕᐅᓂᖏᓐᓂᑦ ᐊᒥᖅᑲᐅᔾᔨᓗᑎᒃ ᖃᐅᔨᒪᓂᕐᒥᓐᓂᑦ, ᑕᓯᐅᖅᓯᒍᑎᒋᓗᒋᑦ ᓴᖅᑭᑎᑦᓯᖃᑕᐅᒍᑎᒋᓗᒋᓪᓗ ᖃᐅᔨᒪᓂᖅᑖᓂᒃ ᑎᒥᐅᔪᒥ ᐊᒻᒪ ᒐᕙᒪᑐᖃᒃᑯᓐᓂ ᐱᓕᕆᔨᐅᔪᓂᑦ.

ᑭᒃᑰᓂᕗᑦ: ᐱᓪᓚᕆᖁᑎᒋᔭᕗᑦ

ᑎᒥᐅᓪᓗᓂ, POLAR−ᑯᑦ ᓇᓗᓇᐃᖅᓯᓯᒪᔪᑦ ᑎᓴᒪᓂᑦ ᐱᓪᓚᕆᖁᑕᐅᔪᓂᑦ ᑐᑭᒧᐊᒍᑕᐅᓂᐊᖅᖢᓂᑦ ᖃᐅᑕᒫᑦ ᐃᖅᑲᓇᐃᔮᓄᑦ ᐱᓕᕆᖃᑎᖃᕐᓂᒥᒍᓪᓗ ᐃᖅᑲᓇᐃᔭᖅᑎᐅᖃᑎᒥᓐᓂᑦ, ᓇᖕᒥᓂᖃᖃᑎᒥᓐᓂᑦ, ᐱᔪᓐᓇᐅᑎᓂᑦ ᑎᒍᒥᐊᖅᑎᓂᑦ ᐊᓯᖏᓐᓂᓪᓗ ᓇᖕᒥᓂᖃᖃᑕᐅᔪᒥᒃ:

ᖃᐅᔨᒪᓂᖅ

• ᓴᖅᑭᑎᑕᐅᓂᖓ, ᓴᐳᒻᒥᔭᐅᓂᖓ, ᐅᓂᒃᑳᖑᓂᖓ ᐊᐅᓚᑕᐅᓂᖓᓗ ᑐᓴᖅᑎᑕᐅᒍᑕᐅᓯᒪᔪᑦ ᖃᐅᔨᒪᓃᓪᓗ.
• ᐊᐅᓚᑦᑎᓗᓂ ᐋᖅᑭᒋᐊᖅᑕᐅᓯᒪᔪᒥᒃ ᖃᐅᔨᓴᕐᓂᒃᑯᑦ ᓄᐊᑕᐅᓯᒪᔪᓂᑦ ᑲᒪᑦᑎᐊᓂᕐᒧᑦ ᐊᒻᒪ ᐊᑐᖅᑕᐅᕙᒃᑐᑦ ᐱᔾᔪᑏᑦ.
• ᑲᒪᒋᑦᑎᐊᕐᓗᒋᑦ ᓄᓇᖃᖅᑲᖅᓯᒪᔪᑦ ᖃᐅᔨᒪᓂᖏᑦ ᐊᒻᒪ ᖃᐅᔨᓴᕐᓂᐊᕐᓂᒃᑯᑦ ᖃᐅᔨᔭᐅᓯᒪᔪᑦ ᐊᑐᐃᓐᓇᐅᑎᑕᐅᔪᑦ ᑲᓇᑕᒥᐅᑕᓄᑦ ᐅᖃᓕᒫᖅᑕᐅᒍᓐᓇᕐᓗᑎᒃ ᐅᖃᐅᓯᖏᑦ ᐱᒡᒐᕐᓇᖏᓪᓗᑎᒃ.

ᑲᑐᔾᔨᖃᑎᒌᓐᓂᖅ

• ᐃᖅᑲᓇᐃᔭᖃᑎᒌᒡᓗᒋᑦ ᓇᖕᒥᓂᖃᖃᑕᐅᔪᑦ ᑎᒍᒥᐊᖅᑎᐅᔪᓪᓗ ᓴᖅᑭᑎᑦᑎᓂᐊᕐᒪᑕ ᖃᐅᔨᒪᓂᖅᑕᒥᒃ ᐊᒻᒪ ᓴᓇᕐᕈᑎᑎᒍᓪᓗᒪᐊᒥᖅᑲᐅᑎᒋᓂᐊᖅᑕᒥᓐᓂᑦ ᑐᓴᖅᑎᑦᑎᒍᑎᒋᓗᒋᑦ ᐊᐅᓚᑦᑎᒍᒍᑕᐅᔪᑦ ᐅᓪᓗᒥ.
• ᐱᖃᐅᔾᔨᓂᖅ ᐅᑭᐅᖅᑕᖅᑐᒥ ᐊᒻᒪ ᓄᓇᖃᖅᑲᖅᓯᒪᔪᑦ ᓄᓇᓕᖏᓐᓂᑦ, ᐃᑲᔪᖅᑐᐃᖁᓪᓗᒋᑦ ᓯᕗᓕᕐᓂᖓᓂᒃ ᖃᐅᔨᒪᓂᕐᒧᑦ ᓴᖅᑭᑎᑦᑎᓂᕐᒥᒃ ᐊᐅᓚᑦᑎᓂᕐᒥᓪᓗ.

ᐃᖅᑲᒋᔭᖃᕐᓂᖅ

• ᐊᕙᑎᒥᑦ, ᑖᔅᓱᒥᖓᑦᑕᐃᓐᓇᖏᑦᑐᖅ ᖃᔨᒪᔭᖃᕐᓂᒃᑯᑦ, ᐊᒥᖅᑲᐅᑎᖃᕐᓂᒃᑯᑦ ᐊᑐᖅᑕᐅᖃᑦᑕᖅᓯᒪᔪᓂᒃ, ᐃᓄᖕᓄᑦ ᐅᕙᑦᑎᓄᓪᓗ.
• ᓈᓚᒡᓗᒋᑦ ᓇᖕᒥᓂᖃᖃᑎᕗᑦ, ᑲᑐᔾᔨᖃᑎᕗᑦ ᑎᒍᒥᐊᖅᑎᐅᖃᖅᑎᓪᓗ ᑐᑭᓯᓗᒋᑦ ᓯᕗᓪᓕᐅᑎᒍᒪᔭᖏᑦ, ᐱᓇᐃᓗᒃᑕᐅᔪᑦ ᐃᓱᒫᓘᑕᐅᔪᓪᓗ.

ᓱᓕᕆᔭᐅᒍᓐᓇᕐᓂᖅ

• ᐱᓕᕆᖃᑎᒌᓐᓂᐅᔪᑎᒍᑦ ᓱᓕᓂᖃᕐᓂᖃᕐᓗᓂ ᒪᑐᐃᖓᓂᖃᕐᓗᓂᓗ, ᑕᒪᒃᑮᓐᓄᑦ ᐱᓕᕆᖃᑎᒌᓄᑦ ᓯᓚᑎᖃᖅᑎᒌᖕᓂᑯᓪᓗ.
• ᒥᑭᓪᓕᑎᕐᓂᖃᕐᓂᒃᑯᑦ ᒪᑐᐃᖓᓂᖃᕐᓂᑯᓪᓗ ᐃᓱᒪᒃᓴᖅᓯᐅᕈᑎᖃᑦᑎᐊᓂᕐᒧᑦ.
• ᑲᔪᓯᔪᒥᒃ ᒪᑐᐃᖓᓂᖃᕐᓂᑯᓪᓗᒍ ᑐᓴᐅᒪᖃᑎᒌᖕᓂᕐᒧᑦ ᑐᓴᖅᑕᐅᔭᖃᕆᐊᓕᖕᓂᒃ, ᐱᖃᓯᐅᑎᓗᒋᑦ ᐱᕕᒃᓴᖃᕐᕕᐅᔪᑦ ᐊᐳᖅᑕᕈᑕᐅᔪᓪᓗ.
• ᖃᐅᔨᒪᒋᐊᑦᑎᐊᕐᓗᒋᑦ ᑐᓴᖅᑎᑦᑎᒍᒍᑕᐅᔪᑦ ᐅᑎᖅᑎᑕᐅᒐᓗᐊᕐᒪᖔᑕ ᐅᑭᐅᖅᑕᖅᑐᒥ ᓄᓇᖃᖅᑲᖅᓯᒪᔪᓪᓗ ᓄᓇᓕᖏᓐᓄᑦ ᑐᓴᖅᑎᑦᑎᒍᑕᐅᓗᑎᒃ.

ᓱᓇᐃᑦ ᑲᔪᓯᑎᒐᓱᐊᕐᓂᐊᖅᑕᕗᑦ: ᐸᕐᓇᐅᒻᒧᑦ ᑐᕌᖅᑕᐅᔪᑦ

2020

• ᖃᐅᔨᓴᕐᓂᐊᖅᑏᑦ ᖃᐅᔨᓴᖅᑏᓪᓗ ᐊᑐᖅᐸᒃᑐᑦ CHARS−ᑯᑦ ᐃᓕᓐᓂᐊᑎᑦᑎᕕᖓᑕ ᖃᐅᔨᓴᕐᕕᖏᓐᓂᑦ ᐊᓯᖏᓐᓂᓪᓗ ᐱᓕᕆᕕᐅᒍᓐᓇᖅᑐᓂᒃ ᐱᔾᔪᑎᒧᑦ−ᑐᑭᒧᐊᒍᑕᐅᔪᓂᒃ, ᑲᑐᔾᔨᖃᑎᒌᖕᓂᒃᑯᑦ ᖃᐅᔨᓴᕐᓂᕐᒧᑦ ᖃᐅᔨᓴᕐᓂᐊᕐᓂᒧᓪᓗ ᒪᓕᒃᖢᒍ POLAR−ᑯᑦ ᖃᐅᔨᓴᕐᓂᐊᕐᓂᕐᒧᑦ ᓴᓇᕐᕈᑏᓪᓗ ᐊᑐᖅᑕᐅᒍᓐᓇᕐᓂᖏᑕ ᖃᐅᔨᔭᐅᓯᒪᓂᖏᓐᓄᑦ ᓇᓗᓇᐃᔭᐅᖅᑎᒧᑦ.
• POLAR−ᑯᑦ ᐱᔪᓐᓇᕐᓂᑎᒃ ᐊᑐᖅᖢᒍ ᓇᖕᒥᓂᖃᑎᒋᒍᑕᐅᔪᓂᑦ ᐱᓇᓱᐊᖅᑐᑦ ᑲᓇᑕᐅᑉ ᐱᔪᒪᔭᖓᓄᑦ ᑕᒪᒃᑭᖅᐳᑦ ᐅᑭᐅᖅᑕᖅᑐᒧᑦ ᓄᓇᕐᔪᐊᓪᓗ ᑲᔾᔨᖓᓄᑦ.
• POLAR−ᑯᑦ ᐱᖃᑕᐅᔪᑦ ᐱᔪᓐᓇᐅᑎᓄᑦ ᑎᖑᒥᐊᖅᑎᐅᔪᓄᑦ, ᓄᓇᓕᖕᒥ ᑎᒥᐅᔪᓄᑦ ᐊᒻᒪ ᑎᒍᒥᐊᖅᑎᐅᔪᓄᑦ ᑕᒪᑐᒪ ᒥᒃᓵᓄᑦ ᐱᓕᕆᖃᑎᒌᒍᓐᓇᖅᓯᖁᔨᒧᑦ ᓴᙱᑦᑎᒋᐊᕐᓗᓂᒋᓪᓗ ᓇᖕᒥᓂᖃᖃᑎᖃᕐᓂᖓ.

2023

• ᐱᓕᕆᕕᐅᓂᖓ ᐱᖃᑕᐅᑎᑦᑎᓂᕐᒧᑦ, POLAR−ᑯᑦ ᐱᕚᓪᓕᖅᑎᓯᒪᔭᖓ CHARS−ᑯᑦ ᐃᓕᓐᓂᐊᕐᕕᖓ ᖃᐅᔨᒪᓂᖅᑖᑲᓐᓂᑎᑦᑎᓂᕐᒧᑦ ᐅᓂᒃᑳᖃᕈᓐᓇᕐᓂᕐᒧᓪᓗ ᑕᒪᑐᒪᖓᓕᖓᔪᓂᑦ.
• POLAR−ᑯᑦ ᑐᕌᖅᑕᖃᖅᖢᑎᒃ ᐱᓇᓱᐊᕐᓂᒃᑯᑦ ᐅᖃᐅᔾᔭᐅᖃᑦᑕᓂᒃᑯᑦ ᖃᐅᔨᒪᔭᖅᑖᕐᓂᕐᒥᑦ ᖃᐅᔨᓴᕐᓂᐊᕐᓂᕐᒧᑦ, ᖃᐅᔨᓴᕐᓂᕐᒧᑦ ᓴᓇᕐᕈᑏᓪᓗ ᐊᑐᖅᑕᐅᒍᓐᓇᕐᓂᖏᓐᓂᑦ ᓴᖅᑭᑎᑦᑎᒍᒪᕐᓗᑎᒃ ᐊᑑᑎᓕᖕᓂᑦ ᐊᑐᖅᑕᐅᒍᓐᓇᖅᑐᓂᒃ ᓱᒃᑲᔪᒥ ᐊᓯᔾᔨᐸᓪᓕᐊᔪᒧᑦ ᐅᑭᐅᖅᑕᖅᑐᒧᑦ.
• POLAR−ᑯᑦ ᐃᓕᓴᕆᔭᐅᓯᒪᔪᑦ ᒐᕙᒪᑐᖃᒃᑯᑦ ᐱᓕᕆᔨᖏᓐᓄᑦ ᐱᓇᓱᐊᖅᓯᐊᕐᓂᖓ ᐱᔾᔪᑎᒋᓪᓗᒍ ᑲᔪᓯᑎᑦᑎᓂᒃᑯᑦ ᐊᑐᕈᒪᔭᕐᒥᓐᓂᑦ ᒪᓕᒃᖢᒍ ᑎᑎᕋᖅᑕᐅᓯᒪᔪᖅ 23 ᓄᓇᕗᒻᒧᑦ ᐊᖏᖃᑎᒌᖑᑦ.

2025

• POLAR−ᑯᑦ ᐃᓕᓴᕆᔭᐅᓯᒪᔪᑦ ᑐᑦᑕᕐᕕᒃᓴᐅᓂᖏᓐᓂᑦ ᑲᓇᑕᒥ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᒧᑦ ᑎᒥᐅᓂᖓᓂᒃ.
• POLAR−ᑯᑦ ᖃᐅᔨᒪᓂᖅᑖᕆᓯᒪᔭᖏᑦ ᐊᑐᖅᑕᐅᔪᑦ ᐊᑐᐊᒐᓕᐅᖅᑎᓄᑦ ᑐᓴᖅᑎᑦᑎᒍᑎᒋᕙᒃᖢᒋᑦ ᑕᑯᒃᓴᓂᒃ−ᑐᙵᕕᓖᑦ ᑐᑭᑖᕋᓱᐊᕈᑕᐅᔪᖃᓕᕋᐃᖕᒪᑦ.
• ᐊᑑᑎᖏᑦ ᐱᕙᓪᓕᐊᓂᕐᒧᑦ ᐊᒻᒪ ᓇᖕᒥᓂᖃᖃᑎᒌᑦ ᐱᓕᕆᐊᖏᑦ ᐊᐅᓚᑕᐅᓪᓗᑎᒃ ᐃᑲᔪᖅᑐᖅᑕᐅᓪᓗᑎᓪᓘᓐᓃᑦ POLAR−ᑯᓐᓄᑦ ᐃᓕᓴᕆᔭᐅᓯᒪᕗᑦ ᐱᔪᓐᓇᐅᑎᓂᑦ ᑎᒍᒥᐊᖅᑎᐅᔪᓄᑦ, ᐅᑭᐅᖅᑕᖅᑐᒥᐅᑕᓄᑦ ᐊᓯᖏᓐᓄᓪᓗ ᑎᒍᒥᐊᖅᑎᐅᔪᓄᑦ.
• POLAR−ᑯᑦ ᐃᖅᑲᓇᐃᔭᖅᑎᐅᕗᑦ ᓂᕈᐊᖅᓯᒪᓪᓗᓂᔾᔪᒃ ᑕᒪᓐᓇ ᐅᑭᐅᖅᑕᖅᑐᒥ ᑐᓱᒋᔭᐅᓪᓗᑎᓪᓗ ᓄᓇᕐᔪᐊᒥ.

ᐃᓱᓕᓐᓂᖓ

ᑲᔪᓯᓂᖓ ᑖᔅᓱᒪ ᐸᕐᓇᐅᑎᐅᑉ ᑐᙵᕕᖃᖅᐳᖅ ᐃᓚᖓᓂ POLAR−ᑯᑦ ᐱᔪᓐᓇᕐᓂᖓᓂᒃ ᑐᙵᕕᖃᑦᑎᐊᓂᕐᒧᑦ ᑲᔪᓯᓂᖓᓄᑦ ᐱᕈᖅᐸᓪᓕᐊᓂᖓᓄᓪᓗ ᐱᓕᕆᕕᐅᓂᖓ, ᐊᑑᑎᓕᖕᓂᑦ ᐊᑐᐊᒐᓕᐅᖃᑦᑕᓂᒃᑯᑦ, ᐱᓕᓐᓂᐊᕈᑎᑎᒍᑦ ᐱᓕᕆᓂᖏᑎᒍᓪᓗ. ᐊᕐᕌᒍᓂ ᑕᓪᓕᒪᓂ ᐊᒡᒋᖅᑐᓂ, POLAR−ᑯᑦ ᐱᕈᖅᐸᓪᓕᐊᓂᕐᒥᑦ ᐱᓇᓱᐊᒐᖃᕐᓂᐊᖅᑐᑦ ᓴᖅᑭᑎᑦᑎᕙᓪᓗᑎᒃ ᐅᓪᓗᒥᓯᐅᑎᑎᒍᑦ ᐊᑑᑎᓕᒃᑎᒍᓪᓗ ᐃᓕᓐᓂᐊᕈᑎᑎᖓᒍᑦ ᐋᖅᑭᒃᐸᓪᓕᐊᑐᐃᓐᓇᕐᓂᐊᖅᑐᓂᑦ ᐊᑑᑎᖃᖅᖢᑎᒡᒍᑦ ᐊᒃᑐᐃᓂᕐᒥᑦ ᑲᓇᑕᐅᑉ ᐅᑭᐅᖅᑕᖅᑐᖏᓐᓂᒃ ᑲᓇᑕᒥᓗ ᓄᓇᕐᔪᐊᒥᓗ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᕙᒃᑐᓂ ᓄᓇᓕᐅᔪᓂ. ᐊᕐᕌᒍ 2025 ᒥᒃᓵᓂ, POLAR−ᑯᑦ ᑐᙵᕕᒋᔭᐅᓕᕈᒪᓛᖅᑐᑦ ᐅᑭᐅᖅᑕᖅᑐᒥ ᖃᐅᔨᒪᓕᖅᑕᐅᓗᑎᒃ ᐱᔪᓐᓇᖅᓯᓂᕐᒥᒍᑦ ᑲᑐᔾᔨᖃᑎᒌᖕᓂᒃᑯᑦ ᖃᐅᔨᕙᒃᑕᒥᓐᓂᑦ ᐅᖃᐅᔾᔭᐅᒋᐊᕈᑎᒋᓯᒪᔭᒥᒍᑦ ᖃᐅᔨᓴᕐᓂᕐᒧᑦ ᑲᓇᑕᒥ. POLAR−ᑯᑦ ᖃᐅᔨᒪᓂᖏᑦ ᐊᑐᖅᑕᐅᕙᖕᓂᐊᖅᐳᑦ ᐃᑲᔪᖅᓯᒪᓗᒍ ᑐᑭᑖᕈᑎᖃᕐᓂᖅ ᑐᓴᐅᒪᔭᓂ ᒪᓕᒃᖢᒋᑦ ᑖᒃᑯᓄᖓ ᐱᔪᓐᓇᐅᑎᓂᑦ ᑎᒍᒥᐊᖅᑎᐅᔪᓄᑦ, ᓄᓇᓕᐅᔪᓄᑦ, ᓄᓇᖃᖅᑳᖅᓯᒪᔪᑦ ᑎᒥᖁᑎᖏᓐᓄᑦ, ᒐᕙᒪᓄᑦ ᐊᒻᒪ ᓄᓇᕐᔪᐊᒥ ᓇᖕᒥᓂᖃᖃᑎᖏᓐᓄᑦ.

ᐊᑕᖏᖅᑐᒥᒃ ᑐᓴᖅᑎᑦᑎᒍᑎᓂᑦ ᑕᒪᔅᓱᒪ ᐸᕐᓇᐅᑎᐅᑉ ᒥᒃᓵᓄᑦ ᐃᖅᑲᓇᐃᖅᑕᐅᒍᒫᕐᓂᐊᖅᑐᖅ ᕿᒥᕐᕈᔭᐅᕙᒡᓗᓂᓪᓗ POLAR−ᑯᑦ ᑲᑎᒪᔨᖏᓐᓄᑦ ᐊᕐᕌᒍᐃᑦ ᐱᖓᓱᑦ ᓈᒐᐃᒃᐸᑕ. ᑖᓐᓇ ᐸᕐᓇᐅᑦ ᓄᑖᒻᒪᕆᐅᕗᖅ, ᑐᓴᖅᑎᑦᑎᒍᑏᓪᓗ ᑲᔪᓯᓂᖃᕐᓂᐊᖅᖢᑎᒃ ᐊᕐᕌᒍᑦ ᑕᓪᓕᒪᑦ ᐊᓂᒍᒐᓱᐊᕐᓂᖏᓐᓂ.

ᑐᓴᕆᐊᒃᑲᓐᓂᕕᒃᓴᖅ POLAR−ᑯᑦ ᒐᕙᒪᒃᑯᑦ ᑲᑎᒪᕕᖓᓃᖔᖅᑐᑦ ᐅᓂᒃᑳᓂᕐᒧᑦ ᐱᔭᕆᐊᖃᖅᑕᖏᑎᒍᑦ, ᐱᖃᓯᐅᔾᔨᓪᓗᑎᒃ ᐱᓕᕆᕕᖕᒥ ᖃᐅᔨᔭᒥᓂᕐᓂᑦ ᓇᓗᓇᐃᔭᖅᑕᐅᓯᒪᔪᓂ (DRF), ᐱᓕᕆᕕᐅᑉ ᐸᕐᓇᐅᑎᖏᑦ ᐊᒻᒪ ᐱᓕᕆᕕᐅᑉ ᖃᐅᔨᔭᐅᓯᒪᔪᓄᑦ ᐅᓂᒃᑲᑦ ᐅᖃᓕᒫᖅᑕᐅᔪᓐᓇᖅᑐᑦ ᐅᕙᓂ POLAR’s website ᐊᒻᒪ GC Infobase. ᑐᑭᓯᒋᐊᒃᑲᓐᓂᕕᒃᓴᖅ POLAR−ᑯᑦ ᐊᐅᓚᓂᖓᑕ ᐊᖅᑭᒃᓯᒪᓂᖓᓂᒃ, ᐃᓕᓐᓂᐊᕋᒃᓴᓂᑦ ᐊᐅᓚᓂᖏᓐᓂᓪᓗ, ᐅᕗᙵᕈᓐᓇᖅᑐᑎᑦ POLAR’s website.

Footnotes

_________________________

1. CHARS−ᑯᑦ ᐱᖁᔭᖓ ᑐᕌᖓᔪᖅ “ᖃᐅᔨᓴᕐᓂᐊᕐᓂᕐᒧᑦ ᓴᓇᕐᕈᑏᓪᓗ ᐊᑐᖅᑕᐅᒍᓐᓇᕐᓂᖏᑕ ᐸᕐᓇᐅᒻᒧᑦ”. “ᖃᐅᔨᓴᕐᓂᐊᕐᓂᕐᒧᑦ ᓴᓇᕐᕈᑏᓪᓗ ᐊᑐᖅᑕᐅᒍᓐᓇᕐᓂᖏᓐᓄᑦ ᖃᐅᔨᔭᐅᓯᒪᓂᖏᑕ ᓇᓗᓇᐃᔭᐅᑦ” ᐊᒃᑐᐊᓂᖏᑕᓗ ᐊᑐᓕᖅᑎᒃᓯᓂᕐᒧᑦ ᐸᖕᓇᐅᒻᒧᑦ ᑲᑐᔾᔨᒍᑕᐅᓗᓂ ᑎᓕᔭᐅᔾᔭᐅᔪᑕᐅᓯᒪᔪᒥᒃ ᑲᔪᓯᑎᑦᑎᒍᓐᓇᕐᒪᑕ.