ᐊᒃᐸᐃᑦ ᑲᓇᑕᒥ ᐆᒪᔪᖃᐅᖅᑐᖅ

ᐊᒃᐸᐃᑦ ᑲᓇᑕᒥ ᐆᒪᔪᖃᐅᖅᑐᖅ (NWA) ᑲᓇᖕᓇᖅᐸᓯᒻᒥ ᕿᑭᖅᑖᓘᑉ ᐅᐊᖕᓇᖅᐸᓯᐊᓂ ᓄᕗᐊᓂ ᑕᓪᓗᕈᑎᐅᑉ ᐃᒪᖓᑕ, ᓄᓇᕗᒻᒥ. ᑲᑎᓪᓗᑎᒃ 792 km2 ᑭᓛᒥᑕᑎᒍᑦ, ᑖᒃᑯᐊ NWA−ᑯᑦ ᓴᐳᔾᔨᒍᑎᒋᓪᓗᐊᑕᖅᑕᖏᑦ ᐱᓱᑦᑎᓂᑦ ᐅᒪᔪᓂᑦ ᐊᒻᒪᓗ ᑕᕆᐅᒥ ᐆᒪᔪᑦ ᓇᔪᒐᖃᑎᒌᖕᓂᖏᓐᓂᑦ ᐊᒃᑐᐊᖃᑎᒌᖕᓂᖏᓐᓂᓪᓗ ᑕᕆᐅᕐᒥᐅᑦ ᑎᖕᒥᐊᑦ ᐊᒻᒪᓗ ᐳᐃᔩᑦ ᑕᕆᐅᕐᒥᐅᑕᑦ.

ᓱᓇᐅᓂᖓᓂᒃ ᓇᓗᓇᐃᖅᓯᓂᖅ

ᐊᒃᐸᐃᑦ NWA ᓇᓗᓇᐃᖅᑕᐅᓚᐅᖅᓯᒪᔪᖅ 2010−ᒥ ᓴᐳᑎᔭᐅᖁᓪᓗᒋᑦ ᐃᓚᖏᑦ ᐊᖏᔫᑕᐅᓂᖅᐹᑦ ᑕᕆᐅᕐᒥᐅᑕᐃᑦ ᑎᖕᒥᐊᑦ ᐃᓂᖏᑦ ᑲᓇᑕᒥ, ᐱᖃᓯᐅᑎᑦᓱᒍ ᒥᑦᓴᐅᓴᖅᑕᐅᓯᒪᔪᖅ 130,000−ᓃᑦᑐᑦ ᓯᒃᑯᖏᑦ ᐃᔾᔪᔪᑦ ᐊᒃᐸᐃᑦ. ᐊᒃᐸᐃᑦ ᐃᓄᒃᑎᑐᑦ ᐅᖃᐅᓯᐅᒻᒪᑦ “ᐊᒃᐸᐃᑦ”.  ᓄᓇᒥᐅᓄᑦ ᑖᓐᓇ NWA ᐃᓗᓕᓕᒃ ᐊᖏᔪᓂᒃ ᑕᐃᔭᐅᓯᒪᔪᓂᒃ ᓄᓇᐃᑦ ᓯᕕᖓᓂᖏᓐᓂᒃ ᑎᑭᐅᑎᓯᒪᔪᓂᒃ 915−ᓂᑦ ᒥᑕᓂᒃ ᐃᓂᐅᔪᖅ ᐊᒃᐸᐃᑦ, ᑕᐃᔭᐅᒐᔪᑉᐸᑦᑐᖅ “ᐃᓐᓈᕈᑦ”. ᑕᕆᐅᖅ ᑖᒃᑯᓇᓂ NWA−ᒧᑦ ᑭᓪᓕᓕᐅᖅᑕᐅᓯᒪᔪᑦ ᓂᕆᓇᓱᐊᕐᕕᐅᓲᑦ ᐃᕙᕙᑦᑐᓄᑦ ᑕᕆᐅᕐᒥᐅᑕᓄᑦ ᑎᖕᒥᐊᓄᑦ ᐊᔾᔨᒌᖏᑦᑐᓄᓪᓗ ᐳᐃᔨᓄᑦ ᑐᓛᓐᓇᐅᓕᖅᑎᓪᓗᒍ. ᕿᑭᖅᑕᕐᔪᐊᖅ (ᖃᐅᔨᒪᔭᐅᔪᖅ ᐳᕋᐅᑕᓐ ᐊᐃᓚᓐᒥᒃ), ᖃᓂᓐᓂᖅᐹᖅ ᐃᓄᖕᓄᑦ ᓄᓇᒋᔭᐅᓪᓗᓂ ᐃᓂᓕᒃ 130 ᑭᓛᒥᑕᓪᓗᐊᓂᒃ ᐅᐊᓐᓇᖔᖓᓂ ᑖᒃᓱᒪ NWA.

ᐊᓯᖏᑦ ᑐᓴᕈᒥᓇᖅᑐᑦ ᓱᓕᔪᑦ ᐊᒃᐸᐃ NWA ᒥᒃᓵᓄᑦ:

• ᖃᐅᔨᒪᔭᐅᔪᖅ ᕇᑦ ᐸᐃᒥᒃ ᐊᒃᐸᐃᑦ, ᐱᖃᓯᐅᑎᒻᒥᔪᖅᑕᐅᖅ ᓄᓇᑐᓂᖓᓂᒃ ᐊᒃᐸᐃᑦ ᑎᖕᒥᐊᖃᕐᕕᐅᓂᖓᓂᒃ.
• ᑲᑎᓪᓗᒋᒃ ᐱᓕᕆᒍᑎᒋᓗᒍ ᖃᖁᓪᓗᐃᑦ NWA ᑎᖕᒥᐊᖃᕐᕕᐅᔪᖅ ᐱᒻᒪᕆᐅᓂᐅᖃᑕᐅᕗᖅ ᑕᕆᐅᕐᒥᐅᑕᐃᑦ ᑎᖕᒥᐊᖏᑦ ᑲᓇᓐᓇᖅᐸᓯᐊᓂ ᑲᓇᑕᒥ ᐅᑭᐅᖅᑕᖅᑐᒥ.
• ᐊᑕᐅᓯᖅ ᒪᕐᕉᓪᓘᓐᓃᑦ ᐃᓂᐅᔫᒃ ᑲᓇᑕᒥ ᐅᑭᐅᖅᑕᖅᑐᒥ, ᓴᓂᐊᓂ ᐊᒃᐸᑦ ᑐᓛᓲᑦ ᑎᖕᒥᐊᑦ ᑎᖕᒥᐊᖃᕐᕕᖓ, ᐊᒃᐸᐃᑦ, ᖃᑯᓪᓗᐃᑦ (15,000−ᓃᑦᑐᑦ ᐊᕐᓇᕕᐊᑦ ᐊᖑᑎᕕᐊᑦ) ᓇᐅᔭᓪᓗ (1,900− ᓃᑦᑐᑦ ᐊᕐᓇᕕᐊᑦ ᐊᖑᑎᕕᐊᑦ) ᐃᕙᕕᐅᕙᑦᑐᑦ.
• ᐳᐃᔨᑦ ᖃᐅᔨᒪᔭᐅᔪᑦ ᑕᕝᕙᓂ NWA−ᒥ ᐱᖃᓯᐅᔾᔪᑦ ᓇᓄᕐᓂᑦ, ᐊᐃᕕᕐᓂᑦ ᐊᒻᒪᓗ ᐊᔾᔨᒌᖏᑦᑐᓂᒃ ᓇᑦᓯᕐᓂᒃ.
• ᐊᒃᐸᐃᑦ ᑲᔪᓯᔪᒥᒃ ᐱᒻᒪᕆᐅᑎᓪᓗᒍ ᐱᖅᑯᓯᑐᖃᒃᑯᑦ ᐊᑐᖅᑕᐅᕙᑉᐳᖅ ᐃᓄᖕᓄᑦ ᓂᕿᑦᓴᓯᐅᕐᕕᐅᓪᓗᓂ.

ᑐᑭᓯᒋᐊᒃᑲᓐᓂᕕᒃᓴᖅ ᐊᒃᐸᐃᑦ NWA ᒥᒃᓵᓄᑦ  ᓇᐃᓈᖅᓯᒪᔪᒥ ᑕᑲᓇᓂ ᐊᓪᓕᕐᒥ.

ᐊᐅᓚᑦᓯᓂᖅ

ᒪᓕᓪᓗᒍ ᑲᓇᑕᒥ ᐆᒪᔪᓕᕆᓂᕐᒧᑦ ᐱᖁᔭᖅ, NWA−ᖑᔪᑦ ᓴᐳᑎᔭᐅᓯᒪᔪᑦ ᐊᐅᓚᑕᐅᓪᓗᑎᓪᓗ ᒪᓕᑦᓱᒍ ᐆᒪᔪᓕᕆᓂᕐᒧᑦ ᐃᓂᐅᔪᓄᑦ ᐊᑐᐊᒐᑦ. ᐱᔾᔪᑕᐅᓂᖏᑦ ᑖᒃᑯᐊ NWA−ᖑᔪᑦ ᓴᐳᔾᔨᓂᕐᒧᑦ ᐱᐅᖅᓱᐊᓂᕐᒧᓪᓗ ᐆᒪᔪᓂᑦ ᐊᒻᒪᓗ ᐆᒪᔪᓄᑦ ᓇᔪᖓᐅᔪᓂᒃ. ᑕᒪᓐᓇ ᐱᔾᔪᑎᒋᓪᓗᒍ ᐊᒻᒪᓗ ᒪᓕᓪᓗᒍ ᒪᓕᒐᖅ, ᐱᓇᓱᐊᕐᓂᓕᒫᑦ NWA−ᒦᑦᑐᑦ ᐊᕝᕕᐊᑐᐃᓐᓇᕆᐊᓖᑦ ᐱᐅᖅᓱᖅᑕᐅᓂᖓᓂᒃ ᐆᒪᔪᑦ ᓄᖅᑲᖓᑎᑕᐅᒍᓐᓇᓂᕐᒧᑦ. ᑭᓯᐊᓂᓕ, ᐊᒥᓲᓂᖅᓴᐃᑦ NWA−ᖑᔪᑦ ᐊᑐᐃᓐᓇᐅᖏᒻᒪᑕ ᑭᒃᑯᑐᐃᓐᓇᕐᓄᑦ ᐊᓯᓕᒫᖏᓪᓗ ᐱᓇᓱᐊᕐᓂᐅᒍᒪᔪᑦ ᐱᔪᓐᓇᖏᑎᑕᐅᔪᑦ ᐃᓘᓐᓇᐃᓐᓂ NWA−ᖑᔪᓂ. ᑭᓯᐊᓂᓕ, ᐃᓚᖏᑦ ᐱᓇᓱᐊᕐᓃᑦ ᐱᔪᓐᓇᖅᑎᑕᐅᒍᓐᓇᖅᑐᑦ ᐊᖅᑯᑎᒋᓗᒍ ᑎᑎᕋᖅᓯᒪᔪᖅ I.1 ᐆᒪᔪᓕᕆᓂᕐᒧᑦ ᐃᓂᐅᔪᓂ ᐊᑐᐊᒐᕐᓄᑦ ᐱᔪᓐᓇᐅᑎᑖᖅᑎᑦᓯᓂᕐᒧᑦ ᒪᓕᑦᓯᐊᑐᐊᖅᐸᑕ ᐊᐅᓚᑦᓯᒍᒪᓂᕐᒧᑦ ᐸᕐᓇᑕᐅᒥᒪᔪᓂᒃ ᑐᕌᒐᕆᔭᐅᓗᑎᒃ ᑕᕝᕗᖓ NWA−ᒧᑦ. ᑐᑭᓯᒋᐊᒃᑲᓐᓂᕕᑦᓴᖅ, ᖃᐅᔨᒋᐊᕐᕕᒋᓗᒍ NWA ᐊᐅᓚᑦᓯᓂᕐᒧᑦ ᐊᒻᒪᓗ ᐱᓕᕆᐊᒃᓴᓄᑦ ᑎᑎᕋᕐᕕᐅᓯᒪᔪᒥ.

ᐊᒃᐸᐃᑦ ᐊᐅᓚᑕᐅᔪᖅ ᑲᓇᑕᒥ ᐆᒪᔪᓕᕆᓂᕐᒧᑦ ᐱᔨᑦᓯᖅᑎᓄᑦ (CWS) ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᔾᔨᕐᓂᖓᑕ ᑲᓇᑕᒥ (ECCC) ᐃᓄᖕᓄᓪᓗ ᕿᑭᖅᑕᕐᔪᐊᒥ, ᓄᓇᕗᑦ ᐃᓚᒋᓪᓗᓂᐅᒃ ᐊᐅᓚᑦᓯᖃᑎᒌᖕᓂᕐᒧᑦ ᐊᖏᖃᑎᒌᒍᑕᐅᓯᒪᔫᑉ ᑕᕝᕘᓇ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐃᑲᔫᑎᓄᑦ ᐊᖏᖃᑎᒌᖑᑎᒥ ᑕᕝᕗᖓ ᑲᓇᑕᒥ ᐆᒪᔪᑦ ᐃᓂᖏᑕ ᐊᒻᒪᓗ ᑎᖕᒥᐊᑦ ᑐᓛᓲᑦ ᐃᓂᖏᓐᓂ ᓄᓇᕗᒻᒥ (IIBA). ᓱᓗᓖᑦ ᐊᐅᓚᑦᓯᖃᑎᒌᑦᑐᑦ ᑲᑎᒪᔨᕋᓛᖏᑦ (ACMC) ᐱᒋᐊᖅᑎᑕᒥᓂᖅ ᑕᕝᕘᓇ IIBA−ᑯᑦ ᐅᖃᐅᔾᔨᒋᐊᕈᑕᐅᕙᑦᑐᑦ ᐃᓘᓐᓇᖏᓐᓂ  NWA−ᑯᑦ ᐊᐅᓚᑦᓯᓂᕐᒧᑦ ᐱᔭᕆᐊᖃᓪᓚᕆᑦᑐᑎᒍᓪᓗ ᐊᑐᐊᒐᓕᕆᓂᕐᒧᑦ ᑐᑭᑖᕈᑕᐅᓯᒪᔪᑦ ᐊᑦᑐᐃᓂᓕᒃ ᑖᑦᓱᒥᖓ NWA−ᒥᒃ, ᐱᖃᓯᐅᑎᓗᒍ ᐃᓄᖕᓄᑦ ᐊᑐᖅᑕᐅᓂᖓ ᑖᓐᓇ NWA, ᐱᔪᓐᓇᐅᑎᑖᕐᓂᕐᒧᑦ ᑐᒃᓯᖃᐅᑎᑦ, ᖃᐅᔨᓴᖅᑐᓕᕆᓂᒃᑯᑦ ᐊᐅᓚᑦᓯᓂᖅ ᑕᕝᕘᓇ NWA, ᐳᓚᕋᖅᑎᓄᑦ ᐊᑐᖅᑕᐅᓂᖓ ᐃᓂᐅᔫᑉ, ᐊᒻᒪᓗ ᐊᐅᓚᑕᐅᓂᖓ ᓴᐳᐳᔾᔭᐅᓂᖓᑦᑕᓗ ᐆᒪᔪᑦ ᓇᔪᒐᐅᔪᓪᓗ ᐆᒪᔪᓄᑦ.

ᓄᓇᕗᒻᒥ, ᓄᓇᕗᒻᒥᐅᑦ ᐃᓄᐃᑦ, ᒪᓕᓪᓗᒍ ᓄᓇᕗᒻᒧᑦ ᐊᖏᖃᑎᒌᒍᑦ (NA), ᐊᖑᓇᓱᐊᕈᓐᓇᖅᑐᑦ ᐆᒪᔪᓂᒃ, ᒪᓐᓂᑕᕐᕕᐅᒍᓐᓇᑐᓪᓗ ᑐᓛᕙᑦᑐᓄᑦ ᑎᖕᒥᐊᓄᑦ ᒪᓐᓂᓂᒃ ᖁᓂᕈᕐᓂᓪᓗ ᑮᓇᐅᔭᓕᐅᕈᑎᖃᕈᓐᓇᓂᕐᒧᑦ, ᐃᓅᖃᑎᒌᓄᑦ ᐊᒻᒪᓗ ᐱᖅᑯᓯᕐᒧᑦ ᑭᖒᒪᔭᐅᔪᑦ (ᐃᓚᖓ 5 ᓄᓇᕗᒻᒧᑦ ᐊᖏᖃᑎᒌᒍᑎᐅᑉ).  ᐊᒃᐸᐃᑦ NWA ᐱᓪᓗᒍ ᑭᓇᑐᐃᓐᓇᖅ ᐊᓯᖏᑦ ᐊᑎᖃᖃᑕᐅᙱᑦᑐᑦ ᓄᓇᑖᕈᑎᒥ ᐱᔪᓐᓇᖅᑎᑕᐅᙱᑦᑐᑦ; ᑕᐃᒪᐃᒻᒪᑦ, ᓄᓇᕗᒻᒥᐅᑕᐅᙱᑦᑐᑦ ᐱᔪᓐᓇᐅᑎᑖᕆᐊᓖᑦ ᐊᒃᐸᓕᐊᕈᒪᔪᑦ ᐅᕝᕙᓘᓐᓃᑦ ᐱᓕᕆᒍᒪᔪᖅ ᐊᒃᐸᐃ NWA ᐊᑐᕐᓗᒍ. ᐱᓕᕆᓃᑦ ᐱᔪᓐᓇᖅᑎᑕᐅᑐᐃᓐᓇᕆᐊᓖᑦ ᒪᓕᓪᓗᒍ ᐱᐅᖅᓱᐊᓂᕐᒧᑦ ᑎᑎᕋᖅᑕᐅᓯᒪᔪᑦ ᑕᕝᕙᓂ NWA−ᒥ ᐊᐅᓚᑦᓯᓂᕐᒧᑦ ᐸᕐᓇᐅᑎᒥ (ᐱᕙᓪᓕᐊᔭᐅᔪᖅ ᒪᓐᓇᐅᔪᒥ).

ᑐᑭᓯᒋᐊᒃᑲᓐᓂᕕᒃᓴᖅ ᐱᕕᖃᖅᑎᑕᐅᓂᕐᒧᑦ ᐊᒻᒪᓗ ᐱᔪᓐᓇᖅᑎᑕᐅᓂᕐᒧᑦ ᐊᒃᐸᐃᑦ NWA−ᒥᒃ ᖃᐅᔨᒋᐊᕐᕕᒋᓗᒍ ᐅᓇ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᔾᔨᕐᓂᖓᓄᑦ ᑲᓇᑕᒥ ᐊᕕᑦᑐᖅᑕᐅᓯᒪᓂᒃᑯᑦ ᐊᓪᓚᕕᒃ.

ᐃᓂᐅᔪᒥ ᓄᓇᙳᐊᖅ

ᑖᓐᓇ ᓄᓇᙳᐊᖅ ᓇᓗᓇᐃᖅᓯᒍᑕᐅᓂᕐᒧᑦ ᐊᑐᖅᑐᖅ ᑭᓯᐊᓂ ᐊᑐᖅᑕᐅᔭᕆᐊᖃᕋᓂᓗ ᓇᓗᓇᐃᖅᓯᒍᑕᐅᓗᓂ ᒪᓕᒐᖅᑎᒍᑦ ᑭᓪᓕᖃᖅᑎᑕᐅᔪᓂᑦ.

ᓇᐃᓈᖅᓯᒪᑎᓪᓗᒋᑦ ᑎᑎᕋᕐᕕᒋᓯᒪᔪᖅ

ᖃᐅᔨᒪᔭᐅᓕ: ᐊᔾᔨᒌᖏᓂᖅᑕᖃᖅᐸᑦ ᑖᒃᑯᓇᓂ ᑐᓴᕆᐊᕈᑎᑦᓴᐅᔪᓂ ᐅᓂᒃᑳᖅᑕᐅᓯᒪᔪᓂ ᑕᕝᕙᓂ ᐃᑭᐊᖅᑭᕕᒃᑯᑦ ᒪᑉᐱᒐᕐᒥ, ᑐᓴᕋᑦᓴᓕᐅᖑᓯᒪᔪᑦ ᓇᓕᐊᒃ ᑕᕝᕙᓂ NWA−ᑯᑦ ᐃᑭᐊᖅᑭᕕᖓᓐᓂ ᐊᒻᒪᓗ ᒪᓕᒐᖓ, ᒪᓕᒐᖅ ᑲᔪᓯᑎᑦᓯᔪᖅ, ᒪᓕᒐᖅᑎᒍ ᐱᔪᓐᓇᕐᓂᖃᖅᑎᑕᐅᒍᑕᐅᖕᒪᑦ ᐱᓕᕆᓂᕐᒧᑦ.

ᖃᐅᔨᒋᐊᕐᕕᒋᑎᒍ

ᐊᕙᑎᓕᕆᔨᒃᑯᑦ ᐊᒻᒪᓗ ᓯᓚᐅᑉ ᐊᓯᔾᔨᕐᓂᖓᓂᒃ ᑲᓇᑕᒥ - ᐅᑭᐅᖅᑕᖅᑐᒥ ᑲᓇᑕᒥᐅᓄᑦ ᐆᒪᔪᓕᕆᓂᕐᒧᑦ ᐱᓕᑦᓯᕐᕕᒃ
933 ᒥᕝᕕᒃ ᐊᖅᑯᑎᖓ, ᓇᑎᖓ 3
ᑎᑎᖅᑲᒃᑯᕕᐊ 1870
ᐃᖃᓗᐃᑦ, ᓄᓇᕗᑦ
X0A 0H0

ᐅᖄᓚᐅᑖ: 867-975-4642
ᐊᑭᖃᖏᑦᑐᖅ ᐅᖄᓚᕕᒃᓴᖅ: 1-800-668-6767 (ᑲᓇᑕᒥ ᑭᓯᐊᓂ)
ᐃᕐᖐᕐᓈᖅᑕᐅᑎᒃᑯᑦ: enviroinfo@ec.gc.ca

ᑕᒪᑐᒧᖓ ᑐᕌᖓᔪᑦ ᖃᕆᑕᐅᔭᒃᑯᑦ

• ᑲᓇᑕᒥ ᐆᒪᔪᓕᕆᓂᕐᒧᑦ ᐱᖁᔭᖅ
• ᐆᒪᔪᓕᕆᓂᕐᒧᑦ ᐃᓂᐅᔪᓄᑦ ᐊᑐᐊᒐᑦ
• ᐊᒃᐸᐃᑦ NWA ᑎᑎᕋᖅᑕᐅᓯᒪᔪᖅ ᑐᑭᓯᒋᐊᕈᑎᒃᓴᖅ
• ᐊᒃᐸᐃᑦ NWA ᒎᒍᒃᑯᒃ ᓄᓇᙳᐊᑎᒍᑦ (ᖃᐅᔨᒪᒋᐊᑦᓯᐊᕆᑦ ᒎᒍᒃᑯᑦ ᓄᓇᖑᐊᖅ ᑐᑭᓯᒋᐊᕈᑎᐅᒻᒪᑦ ᓂᑦᑕᑎᑦᓯᖏᑦᑐᖅ ᓄᓇᖑᐊᓪᓚᕆᒻᒥᒃ ᐅᕝᕙᓘᓐᓃᑦ ᐃᓂᐅᔪᑦ ᐊᑎᖏᓐᓂᑦ)